بۇگىندە پلاستماسس ءوندىرىسى ۇلعايىپ بارا جاتىر. ەكولوگياعا زيان كەلتىرەتىن قالدىقتاردىڭ كوبەيۋى تۇتاس الەمدى الاڭداتىپ وتىر, دەپ حابارلايدى Egemen.kz.
ءبىز كۇندەلىكتى ومىردە پلاستماسس زاتتاردى جانە پلاستماسس قاپتاماداعى زاتتاردى ءجيى تۇتىنامىز. ءىرى ءوندىرۋشى كومپانيالار پلاستماسس ءوندىرىسىن جىلدان جىلعا ۇلعايتىپ جاتىر. ولاردىڭ كىشىگىرىم ەكو اكتسيالارى وڭدەلۋى قيىن جانە قايتا وڭدەۋگە كەلمەيتىن قالدىقتاردى ازايتۋعا قاۋقارسىز.
عالىمدار بۇل وندىرىسكە بەلگىلى ءبىر دەڭگەيدە شەكتەۋ قويماسا نەمەسە ارنايى زاڭمەن رەتتەمەسە 2050 جىلعا قاراي پلاتماسستى تۇتىنۋ ەكى ەسەگە وسەدى دەپ بولجاپ وتىر.
وسىعان وراي مىندەتتى جاھاندىق كەلىسىم قۇرۋ ۇسىنىسى ورتاعا سالىندى. Economist Impact تالداۋ ورتالىعى مەن Nippon Foundation جەكە قايىرىمدىلىق ۇيىمى باسقاراتىن ۆack to Blue زەرتتەۋ توبىنىڭ پىكىرىنشە, ءبىر رەتتىك پلاستيكتى قايتا وڭدەۋدى ۇلعايتۋ نەمەسە تۇتىنۋدى ازايتۋ بويىنشا قولدانىستاعى باعدارلامالار تەك ءسوز جۇزىندە قالىپ جاتىر. سوندىقتان جان-جاقتى جاھاندىق جوسپار قاجەت.
بىرىككەن ۇلتتار ۇيىمى كەلەسى جىلدىڭ سوڭىنا دەيىن زاڭدى كۇشى بار شارتتى ازىرلەۋ ماقساتىندا قاراشا ايىندا ۋرۋگۆايدا قورشاعان ورتانىڭ پلاستيكپەن لاستانۋىنا قارسى كەلىسىم بويىنشا كەلىسسوزدەردى باستاعان. كەلىسسوزگە 175-كە جۋىق ەل قاتىستى.
جيىندا ءبىر رەتتىك پلاستيككە قاتاڭ تىيىم سالۋ تۋرالى ۇندەۋ, سونىمەن قاتار ءىرى ءوندىرىس كومپانيالارىنا قايتا وڭدەۋ مەن قالدىقتاردى كادەگە جاراتۋ جاۋاپكەرشىلىگىن جۇكتەۋگە ارنالعان مىندەتتى شارتتار ۇسىنىلدى.
«ەگەر بۇل كەلىسسوز قولداۋ تاپپاسا, زاڭدى كۇشىنە ەنبەسە وسى عاسىردىڭ ورتاسىنا دەيىن پلاستماس قالدىقتار 451 ميلليون تونناعا دەيىن جەتەدى», دەيدى ۆack to Blue زەرتتەۋ توبى.