ادامزات دەگەن اۋىلدان بولعانداردىڭ ءبارى اۋەلى اللادان سوڭ, اتا-انانى ايتادى. بارلىق ەلدە سولاي, ءبىزدىڭ قازاقتا ەكىباستان. «ايتار بولساڭ, اللانى ايت» دەپ تەبىرەنگەن بۇقاردىڭ ءوزى «ونىنشى تىلەك تىلەڭىز: ون اي سەنى كوتەرگەن, ومىرتقاسى ۇزىلگەن, ايازدى كۇندە اينالعان, بۇلتتى كۇندە تولعانعان, تار قۇرساعىن كەڭىتكەن, تاس ەمشەگىن جىبىتكەن, اناڭ ءبىر اڭىراپ قالماسقا» دەپتى.
وسى ءبىر ۇلى ءسوزدى تەمىرقازىق تۇتقان «قازاق گازەتتەرى» جشس ۇجىمى كەشە ايەلدەر مەن قىز-كەلىنشەكتەردى كاسىبي مەرەكەسىمەن قۇتتىقتاپ, سىي-سياپات جاساپ, شاعىن مەرەكەلىك كونتسەرت ۇيىمداستىردى.
ايەلدەردىڭ حالىقارالىق مەرەكەسى قارساڭىندا كەز كەلگەن قىز-كەلىنشەككە ماڭايىنداعى جاقىن-جۋىعى, تۋمالاستارىنىڭ نيەتى ءوز الدىنا, ۇجىمداعىلاردىڭ ىقىلاسى ءبىر بولەك. «كوڭىل كوڭىلدەن سۋ ىشەدى» دەمەي مە؟ سوندىقتان دا بولار مۇنداعى مەرەكەلىك داستارقان جاي ەمەس, رۋحاني اڭگىمەگە باي داستارقان بولدى. «قازاق گازەتتەرى» جشس باس ديرەكتورىنىڭ مىندەتىن اتقارۋشى ۆلاديمير كۋرياتوۆ پەن باس ديرەكتوردىڭ ورىنباسارى قامبار احمەتتىڭ قۇتتىقتاۋ سوزىنەن سوڭ ولەڭ مەن جىردىڭ كوشكىنى دومبىرا مەن گيتارانىڭ سۇيەمەلدەۋىمەن شىرقالعان اندەر قوسىنىنا ۇلاستى.
مۇقاعاليدىڭ «ايەل دەگەن ادەمى عوي, ادەمى, ادەمىلىك بىزگە كوپتىك ەتپەيدى» دەپ تۇيىندەلەتىن شۋماقتارى ءجۇرسىن ەرماننىڭ «قاي جەردە, مەيلى, قاي ەلدە, الەمنىڭ ءمانى – ايەلدە» دەگەن جىرىنا جالعاسىپ جاتتى. جانە بۇل ولەڭنىڭ شۋماعىن ءبىرى باستاپ, ەكىنشىسى ءىلىپ اكەتىپ وتىرعاندا... كوڭىل كوتەرىلەدى-اق. وسى ۇجىمداعى دۇيسەنالى الىماقىن, باتىرحان سارسەنحان اتتى جاس اقىندار ءوز تۋىندىلارىن عانا وقىپ قويماي, اعىلشىن, قىتاي, تۇرىك, ورىس تىلىندە ولەڭدەر جۇپتادى. ال انگە كەزەك كەلگەندە ءاۋ دەمەيتىن قازاق جوق. دومبىرادا – «دۋدار-اي», گيتارادا – «ساۋلەم-اي», تاعى باسقا قازاق اندەرى شىرقالدى.
ارۋلار تويى, انالار مەيرامى قۇتتى بولسىن!