باتىل بالا قارىنداسىن ورتتەن قۇتقاردى

ەكى جاستاعى قارىنداسىن جانىپ جاتقان ۇيدەن امان الىپ شىعىپ, قۇتقارىپ قالعان نۇريدەن امانتاي قازىر ەل اۋزىندا. اتاسى مەن اجەسى سول ورتتە كۇيىك شالىپ, قايتىس بولدى. ال نۇريدەننىڭ ءوزىنىڭ قولى مەن بەتى كۇيىپ قالعان. بۇل كەزدە اتا-اناسى جۇمىستا ەكەن. قايعىلى وقيعا بىلتىر جەلتوقسان ايىن­دا بولىپ, ءتىلسىز جاۋدان ءۇي تولىقتاي دەرلىك جانىپ كەتىپتى.

– ءورت شىققاندا ۇيدە اتام, اجەم جانە قارىنداسىم بولدىق. ءبىز تاماق ءىشىپ وتىر ەدىك, پەش تۇرعان شىعا بەرىس بولمەدە تارس ەتە قالعان دىبىس شىقتى. اتام مەن اجەم نە بولعا­نىن قاراۋعا دالىزگە  كەتتى. ۇزاق ۋاقىت كەلمەي قويدى. سوڭدا­رىنان بارسام, پەشتىڭ ماڭايى تۇگەلدەي جانىپ جاتىر ەكەن. بۇل بولمەدەگى ەسىكتەن شىعۋ مۇمكىن ەمەستىگىن ءتۇسىندىم دە, اس ۇيگە جۇگىرىپ بارىپ, قارىنداسىمدى تەرەزە الدىنا شىعار­دىم. اناما تەلەفون سوعىپ ايتتىم. تەرەزە الدىنا شىعىپ الىپ, ودان سەكىرگەلى تۇرعاندا كورشىلەر كەلدى. قارىنداسىمدى شىعارىپ بەرىپ, سوڭىنان ءوزىم ءتۇستىم, – دەيدى نۇريدەن.

اتا-اجەسى دە دالاعا شىعىپ ۇلگەرگەن ەكەن. ايتسە دە دەنەلەرىنىڭ 40-60 پايىزىن جالىن شارپىپ وتكەن. دارىگەرلەر اتاسى مەن اجەسىن جانساقتاۋ بولىمىنە, نۇريدەندى جاي پالاتاعا جاتقىزعان ەكەن. بىراق اۋىر جاراقاتتان اتا-اجەسى وڭالماي, باقيلىققا وزدى.

– مەن كەلگەندە ءۇي لاپىلداپ جانىپ جاتتى. اتا-ەنەم جان ساقتاۋ بولىمىنە ءتۇستى. نۇريدەن جاي پالاتاعا. ەكى كۇننەن كەيىن اتام قايتىس بولدى. ودان ەكى اپتادان كەيىن ەنەم. قازىر كۇيەۋىمنىڭ تۋىستارىنىڭ ەكى بولمەلى پاتەرىندە تۇرامىز. ولاردىڭ وزىندە بەس بالا بار, – دەيدى نۇريدەننىڭ اناسى ناديرا اكيشەۆا.

نۇريدەننىڭ قارىنداسىنان بولەك اپكەسى مەن اعاسى بار. ءورت شىققان كۇنى ولار مەكتەپتە بولعان ەكەن. ال قازىر وتباسى باسپاناعا مۇقتاج. جاقىندا نۇريدەن وقيتىن №36 مەكتەپكە قاراعاندى قالاسى ءبىلىم ءبولىمىنىڭ باسشىسى ەسەنتاي ءاشىم ارنايى كەلىپتى. باتىلدىق كورسەتكەن نۇريدەنگە ريزاشىلىعىن ءبىلدىرىپ, ءبىلىم ءبولىمى اتىنان كىشكەنتاي باتىرعا ۆەلوسيپەد تارتۋ ەتتى.

قاراعاندى