مەملەكەت باسشىسى پارلامەنت سەناتىنىڭ توراعاسى ماۋلەن اشىمباەۆتى قابىلدادى, دەپ حابارلايدى Egemen.kz اقورداعا سىلتەمە جاساپ.
پرەزيدەنتكە جوعارعى پالاتانىڭ زاڭ شىعارۋ قىزمەتى تۋرالى باياندالدى. سەناتتىڭ پارلامەنتتەگى قىزمەتى باستالعاننان بەرى 21 زاڭ ماقۇلدانىپ, قابىلدانعان. ونىڭ ىشىندە ەڭبەك داۋلارىن شەشۋ, تۇرعىن ءۇي-كوممۋنالدىق شارۋاشىلىق, تسيفرلىق اكتيۆتەر, سونداي-اق سالىق كودەكسىنە وزگەرىستەر مەن تولىقتىرۋلار ەنگىزۋ تۋرالى زاڭدار قارالعان.
ماۋلەن اشىمباەۆتىڭ مالىمەتى بويىنشا قازىرگى ۋاقىتتا سەناتتا مەملەكەت باسشىسىنىڭ تاپسىرماسىمەن ازىرلەنگەن ماڭىزدى زاڭ جوبالارى قارالىپ جاتىر. اتاپ ايتقاندا, الداعى كەزەڭدە 2023 جىلعا ارنالعان رەسپۋبليكالىق بيۋدجەتتى ناقتىلاۋدى, الەۋمەتتىك كودەكستى, سونداي-اق اكىمشىلىك رەفورما, ادام قۇقىقتارى جانە ازاپتاۋلاردىڭ الدىن الۋ, مەملەكەتتىك قىزمەت ماسەلەلەرىنە قاتىستى زاڭ جوبالارىن قاراستىرۋ جوسپارلانىپ وتىر.
پرەزيدەنتكە پالاتانىڭ سوت جۇيەسىن رەفورمالاۋ جانە پروتسەسسۋالدى زاڭنامانى جەتىلدىرۋ جۇمىستارى تۋرالى اقپارات بەرىلدى. قاسىم-جومارت توقاەۆتىڭ تاپسىرمالارىن ورىنداۋ اياسىندا سەناتتا جۇمىس توبى قۇرىلعان. بۇل توپ 60-تان استام وتىرىس وتكىزىپ, 350-گە جۋىق ۇسىنىس جيناعان. اتالعان جۇمىستىڭ ناتيجەسىندە ەكى زاڭ جوباسى ازىرلەندى.
سونىمەن قاتار مەملەكەت باسشىسىنا سەنات جۇمىسىنداعى وڭىرلىك كۇن ءتارتىبىن نىعايتۋعا, الەمدىك جانە ءداستۇرلى دىندەر كوشباسشىلارى سەزىنىڭ يدەيالارىن ىلگەرىلەتۋگە باعىتتالعان ءىس-شارالار تانىستىرىلدى.
قاسىم-جومارت توقاەۆ ەلىمىزدى الەۋمەتتىك-ەكونوميكالىق تۇرعىدا كەشەندى دامىتۋ جونىندەگى رەفورمالاردى ودان ءارى قولداۋعا باعىتتالعان زاڭنامالىق قىزمەتتى جالعاستىرۋ قاجەت ەكەنىن اتاپ ءوتتى.