وقۋ-اعارتۋ ءمينيسترى عاني بەيسەمباەۆ شىمكەنت قالاسىنا جۇمىس ساپارىمەن كەلدى. مينيستر الدىمەن وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىندە بولىپ, وقۋ ورداسىنىڭ ماتەريالدىق-تەحنيكالىق بازاسىمەن تانىستى. ۆەدومستۆو باسشىسى وقىتۋشى, ستۋدەنتتەرمەن بولعان كەزدەسۋدە ءبىلىم ساپاسى مەن ۇستازداردىڭ بىلىكتىلىگى جايلى ءسوز قوزعادى.
عاني بەيسەمباەۆ 2025 جىلعا دەيىن ەلىمىزدە «جايلى مەكتەپ» باعدارلاماسى بويىنشا 401 مەكتەپ سالۋ جوسپارلانعانىن ايتتى. سول ارقىلى ءبىلىم ۇيالارى الەمدىك ۇلگىدەگى وزىق مەكتەپتەردىڭ دەڭگەيىنە جەتپەك. بۇدان بولەك 7 مىڭ مەكتەپ ءبىلىم بەرۋدىڭ يننوۆاتسيالىق تەحنولوگيالارىنا كوشەدى. سونىڭ ىشىندە اۋىل مەكتەپتەرىنىڭ ماتەريالدىق-تەحنيكالىق بازاسىن نىعايتۋ, قاجەتتى قۇرال-جابدىقتارمەن جاراقتاندىرۋ جاعىنان ولاردى قالا مەكتەپتەرىنەن قالىس قالدىرماۋ دا مينيسترلىكتىڭ كۇن تارتىبىنەن تۇسپەك ەمەس. اتالعان ماقساتقا وراي وسى جىلدان باستاپ اۋىل مەكتەپتەرىنىڭ وقۋشىلارىنا ارنايى رەسپۋبليكالىق وليمپيادا ۇيىمداستىرىلادى. مينيستر بولاشاق پەداگوگتەردى دايىندايتىن جوعارى وقۋ ورىندارى كەلەشەك مامانداردىڭ ساپاسىنا ءجىتى نازار اۋدارۋ كەرەگىن جەتكىزدى.
ءىس-ساپار بارىسىندا مينيستر شىمكەنت قالالىق پوليتسيا دەپارتامەنتىندە بولدى. دەپارتامەنت باستىعى قايرات دالبەكوۆ وقۋ-اعارتۋ مينيسترىنە جەدەل باسقارۋ ورتالىعىنىڭ جۇمىسىمەن تانىستىردى.
– مەگاپوليستە 246 مەكتەپ بار, سونىڭ 151-ءى – مەملەكەتتىك, قالعان 95-ءى – جەكەمەنشىك ءبىلىم ۇيالارى. اتالعان مەكتەپتەر بەينەباقىلاۋ كامەرالارىمەن جانە SOS دابىل تۇيمەلەرىمەن تولىقتاي جابدىقتالعان ءارى پوليتسيا دەپارتامەنتىنىڭ جەدەل باسقارۋ ورتالىعىنا قوسىلعان. بەينەباقىلاۋ ينسپەكتورى ءاربىر ءىس-قيمىلدى قاداعالاپ وتىرادى. مۇنداي شارا ەڭ الدىمەن بالالاردىڭ قاۋىپسىزدىگىن قامتاماسىز ەتۋ ءۇشىن كەرەك. وسىنىڭ ناتيجەسىندە بىلتىر كامەلەتكە تولماعاندار اراسىنداعى قىلمىستار مەن قۇقىق بۇزۋشىلىقتاردىڭ سانى شامالى ازايدى. دەگەنمەن, شەشىمىن تاپپاعان ماسەلەلەر دە جوق ەمەس. ماسەلەن, ينتەرنەت جىلدامدىعى ناشار. بۇگىندە جەدەل باسقارۋ ورتالىعىنىڭ قىزمەتى تىكەلەي تسيفرلىق جۇيەنىڭ ساپاسىنا بايلانىستى بولىپ وتىر. ەكىنشى ماسەلە كۇزەت اگەنتتىگى ماماندارىنىڭ كاسىبي شەبەرلىگىنە قاتىستى. ولاردىڭ تاراپىنان كەيدە جاقسى جۇمىس ناتيجەسىمەن كورىنە الماۋ دا قاۋىپسىزدىك سالاسىندا ماسەلە تولىق شەشىلمەگەنىن اڭعارتادى. مەكتەپتەر كۇزەت اگەنتتىكتەرىمەن تىكەلەي كەلىسىمشارت جاسايتىندىقتان كاسىبي شەبەرلىكتى ارتتىرۋعا دا باسا كوڭىل بولگەن ءجون, – دەدى ق.دالبەكوۆ.
ع.بەيسەمباەۆ قالا اكىمدىگىنىڭ وكىلدەرىنەن پوليتسياعا جانە ءبىلىم باسقارماسىنا اقپاراتتىق-كوممۋنيكاتسيالىق جەلىلەردىڭ ساپاسىن جاقسارتۋعا كومەك كورسەتۋىن سۇرادى. سونداي-اق مينيستر بەينەكامەرالاردى ورناتۋ كەزىندە ولاردىڭ ساپاسىن دا نازاردان تىس قالدىرماۋعا شاقىردى جانە وقۋشىلار سانى مەكتەپتىڭ شىنايى مۇمكىندىگىنەن اسىپ كەتپەۋى كەرەگىن ەسكەرتتى. «شىمكەنت بالالار ءۇشىن قاۋىپسىز قالا بولۋعا ءتيىس», دەدى ول.
سونداي-اق ۆەدومستۆو باسشىسى «SOS» تۇيمەسىنىڭ قالاي جۇمىس ىستەيتىنىن تەكسەرىپ كوردى. ول ءتورت مىڭنان استام وقۋشى وقيتىن قالاداعى پۋشكين اتىنداعى №1 مەكتەپ-گيمنازياسىمەن شۇعىل بايلانىسقا شىقتى.
ساپار اياسىندا مينيستر قالاداعى №65 مەكتەپ-گيمنازياسىنىڭ جانىنان قوسىمشا سالىنىپ جاتقان عيمارات قۇرىلىسىمەن تانىستى. وتكەن جىلدىڭ ناۋرىز ايىندا ىرگەتاسىنىڭ قازىعى قاعىلعان ءبىلىم ورداسىندا كەلەشەكتە 600 بالا وقيدى. ال ونىڭ قۇرىلىسى جوسپارعا سايكەس بيىلعى جىلدىڭ سوڭىنا دەيىن اياقتالادى دەپ وتىر.
شىمكەنت