قازاقستاندىقتاردىڭ 85 ميلليون تەڭگەسىن جىمقىرعان ايەل ەلگە ەكستراديتسيالاندى, دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.
ۋكراينا باس پروكۋرورىنىڭ ءوفيسى قازاقستان رەسپۋبليكاسى باس پروكۋراتۋراسىنىڭ قارجى پيراميداسىنىڭ قىزمەتىن ۇيىمداستىرعانى جانە باسقارعانى ءۇشىن قىلمىستىق جاۋاپكەرشىلىككە تارتۋ ءۇشىن قازاقستان ازاماتشاسى ك.-نى ەكستراديتسيالاۋ تۋرالى ءوتىنىشىن قاناعاتتاندىردى.
تەرگەۋ بارىسىندا اتالعان ادامنىڭ 2017-2018 جىلدار كەزەڭىندە تۇرعىن ءۇي ساتىپ الۋعا جاردەمدەسۋگە ۋادە بەرىپ, قازاقستاندىق ازاماتتاردىڭ 85 ميلليون تەڭگەدەن استام اقشالاي قاراجاتىن الداپ العانى انىقتالدى.
پروكۋراتۋرا مالىمەتىنشە, ۇستالعان ازاماتقا حالىقارالىق ىزدەۋ جاريالانعان.
بيىل قاڭتاردا كۇدىكتىنى ۋكراينا اۋماعىندا سول ەلدىڭ قۇقىق قورعاۋ ورگاندارى ۇستادى. قازىرگى ۋاقىتتا ول استانا قالاسىنىڭ تەرگەۋ يزولياتورىنا قامالدى.