جول اپاتى مالايسارى باتىر كوشەسىندە بولدى, دەپ حابارلايدى Egemen.kz Pavlodarnews.kz-كە سىلتەمە جاساپ.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, 3 ناۋرىز كۇنى ءۇش كولىك – ماز, اۆتوبۋس جانە Chery اۆتوكولىگى سوقتىعىسقان. سالدارىنان 11-باعىتتاعى اۆتوبۋستىڭ جولاۋشىسى مەديتسينالىق كومەككە جۇگىنگەن. اتالعان فاكتى بويىنشا تەكسەرىس جۇرگىزىلۋدە, ساراپتاما تاعايىندالدى.
وبلىستىق جەدەل جاردەم ستانتسياسى جول-كولىك وقيعاسى سالدارىنان ءۇش ادام زارداپ شەككەنىن حابارلادى. وقيعا ورنىندا مەديتسينالىق اپاتتار ورتالىعىنىڭ ماماندارى جۇمىس ىستەدى.
– زارداپ شەككەن ەكى ادامدى مەديتسينالىق اپاتتار ورتالىعىنىڭ ماماندارى, بىرەۋىن جەدەل جاردەم قىزمەتكەرى قاراپ شىقتى. ولاردىڭ ۇشەۋى دە № 1 قالالىق اۋرۋحاناعا جەتكىزىلدى, – دەيدى ستانتسياداعى ماماندار.
ۇشەۋىنىڭ جاعدايى دا ورتاشا دارەجەدە. كوبىندە مي جاراقاتى تىركەلگەن.