بۇگىن ورتالىق جانە ايماقتىق مەملەكەتتىك ورگانداردىڭ ءباسپاسوز حاتشىلارىنا ارنالعان سەميناردا اقپارات جانە قوعامدىق دامۋ ءمينيسترى دارحان قىدىرالى مەملەكەتتىك قىزمەتشىلەردىڭ جۋرناليستەرگە جاۋاپ بەرۋ مەرزىمى قىسقاراتىنىن حابارلادى, دەپ جازادى Egemen.kz.
«اقپاراتقا قول جەتكىزۋ ماسەلەلەرى جونىندەگى زاڭعا دا تۇزەتۋلەر ازىرلەندى. ۇسىنىلعان وزگەرىستەر, ازاماتتاردىڭ اقپاراتقا قول جەتكىزۋ قۇقىعىن زاڭسىز شەكتەگەن مەملەكەتتىك ورگانداردىڭ جاۋاپكەرشىلىگىن كۇشەيتەدى. ەندى ءجۋرناليستىڭ ساۋالىنا جاۋاپ بەرۋ مەرزىمى قىسقارادى. قازىر 7 كۇن بولسا, ەندى ول 3-5 كۇن بولىپ قىسقارادى», دەدى مينيستر.
ءمينيستردىڭ ايتۋىنشا, بۇل اقپاراتتىق اشىقتىقتى ارتتىرۋمەن قاتار, جاۋاپكەرشىلىكتى دە كۇشەيتە تۇسپەك.
«سونداي-اق اقپاراتتىق قاۋىپسىزدىك دوكتريناسى ىسكە اسىرىلادى. دوكترينانىڭ نەگىزگى مىندەتى – وتاندىق مەديا كەڭىستىكتىڭ باسەكەگە قابىلەتتىلىگىن ارتتىرۋ جانە ەلدىڭ اقپاراتتىق دەربەستىگىن قامتاماسىز ەتۋ», دەدى د.قىدىرالى.
سونىمەن بىرگە مينيستر قازىر تالقىلانىپ جاتقان «ماسس-مەديا» تۋرالى زاڭ جوباسىنىڭ نەگىزگى ماقساتى دا جۋرناليستەر مارتەبەسىن كوتەرۋ, وتاندىق كونتەنتتى قولداۋ جانە ۇلتتىق اقپاراتتى قورعاۋ ەكەنىن اتاپ ءوتتى.
ايتا كەتەيىك, استانا قالاسىندا مەملەكەتتىك ورگاندار ءباسپاسوز حاتشىلارىنا ارنالعان سەمينار ءوتىپ جاتىر.