كەشە گرەكيادا پويىز اپاتى بولىپ, سالدارىنان 36 ادام قازا تاپتى. اپاتقا ايىپتى ادام ءوز كىناسىن مويىندادى, دەپ حابارلايدى Egemen.kz.
بۇل تۋرالى گرەكيانىڭ قۇقىق قوعاۋ ورگاندارى مالىمدەدى. لاريسا قالاسىنىڭ ماڭىندا بولعان پويىز اپاتىنان كەيىن پوليتسيا ستانتسيا باستىعىن تۇتقىنعا العان. ول جولاۋشىلار پويىزىن قاتەلەسىپ دۇرىس ەمەس جولعا باعىتتاعانىن ايتىپ, كىناسىن مويىندادى.
«مەن قاتەلەسىپ, جولاۋشىلار پويىزىن باسقا جولعا باعىتتاپ جىبەردىم», دەدى ستانتسيا باستىعى.
كىنالى 2 ناۋرىزدا تەرگەلەدى. گرەكيانىڭ قىلمىستىق كودەكسىنىڭ 291-بابىنا سايكەس, تاسىمالداۋ قاۋىپسىزدىگىن بۇزىپ, بىرنەشە ادامنىڭ ولىمىنە اكەپ سوقتىرعان اۋىر قىلمىس جاساعانى ءۇشىن قىلمىستىق ءىس قوزعالدى. وعان 10 جىلدان باستاپ ءومىر بويىنا باس بوستاندىعىنان ايىرۋ جازاسى كەسىلۋى مۇمكىن.
سونىمەن قاتار گرەكيا كولىك دەپارتامەنتىنىڭ باسشىسى كوستاس كارامانليس تەمپيدەگى تەمىرجول اپاتىنان سوڭ وتستاۆكاعا كەتەتىنىن مالىمدەدى.
جۇك پويىزى مەن جولاۋشىلار پويىزى لاريسا قالاسىنىڭ ماڭىنداعى تەمپي قالاسىندا سوقتىعىسقان. سالدارىنان پويىز رەلستەن شىعىپ, كەيبىر ۆاگوندار ورتەنىپ كەتتى. سوڭعى مالىمەتتەر بويىنشا, 36 ادام قايتىس بولدى, 66 ادام اۋرۋحاناعا جاتقىزىلدى, ولاردىڭ التاۋى رەانيماتسيادا.