جوعارى ءبىلىم سالاسىنداعى ىنتىماقتاستىقتى ودان ءارى ىلگەرىلەتۋ ماقساتىندا قازاقستاننىڭ بولگارياداعى ەلشىسى ۆيكتور تەمىرباەۆ اۋليە كلەمەنت وحريدسكي اتىنداعى سوفيا ۋنيۆەرسيتەتىنىڭ رەكتورى اناستاس گەردجيكوۆپەن كەزدەستى, دەپ حابارلايدى Egemen.kz.
كەزدەسۋ بارىسىندا سوفيا ۋنيۆەرسيتەتى مەن قازاقستاننىڭ جەتەكشى جوعارى وقۋ ورىندارى اراسىنداعى ءوزارا ءتيىمدى ارىپتەستىكتى ارتتىرۋ بويىنشا ناقتى باستامالار قارالدى. اتاپ ايتقاندا, 2018 جىلدىڭ قازان ايىندا ءال-فارابي اتىنداعى قازۇۋ-مەن ارىپتەستىك كەلىسىم نەگىزىندە قۇرىلعان ءال-فارابي عىلىمي-ءبىلىم بەرۋ جانە مادەني ورتالىعىنىڭ قابىرعاسىندا قازاق ءتىلىن وقىتۋ تاجىريبەسىن ودان ءارى ىلگەرىلەتۋگە اڭگىمەلەسۋشىلەردىڭ ەرەكشە نازارى اۋدارىلدى. سونىمەن قاتار قازاقستاندىق ديپلومات ۋنيۆەرسيتەت باسشىلىعىنا جان-جاقتى قولداۋ كورسەتكەنى ءۇشىن العىسىن ءبىلدىرىپ, بولگار ستۋدەنتتەرى اراسىندا قازاق ءتىلىن ۇيرەنۋگە دەگەن قىزىعۋشىلىقتىڭ ارتىپ كەلە جاتقانىنا جانە وسى ءپاندى «تۇركولوگيا» فاكۋلتەتىنىڭ وقۋ جوسپارىنا ەنگىزگەنىنە ريزاشىلىعىن ءبىلدىردى.
سونىمەن قاتار جوعارى بىلىكتى كادرلاردى دايارلاۋ جونىندەگى مەملەكەتتىك ماقساتتى ورىنداۋعا قوسقان ۇلەسى تۇرعىسىنان ۆ.تەمىرباەۆ بولگاريا ۋنيۆەرسيتەتىنىڭ رەكتورىن 2023 جىلدىڭ كۇزىندە استانا مەن الماتىدا وتەتىن «International Education Fair» حالىقارالىق ءبىلىم بەرۋ كورمەسىنە قاتىسۋعا شاقىردى.
جيىندا ۆ.تەمىرباەۆ قر پارلامەنتىنىڭ تومەنگى پالاتاسى – ءماجىلىس جانە جەرگىلىكتى وكىلەتتى ورگاندار – ءماسليحاتتار دەپۋتاتتارىنىڭ كەزەكتەن تىس سايلاۋىنا ەگجەي-تەگجەيلى توقتالا وتىرىپ, مەملەكەتتىك بيلىك ينستيتۋتتارىن قايتا جاڭعىرتۋ شەڭبەرىندە قازاقستاندا جۇرگىزىلىپ جاتقان وزگەرىستەر جايلى اقپارات بەردى.
سوڭىندا تاراپتار كەزدەسۋ بارىسىندا بەلگىلەنگەن بارلىق ماسەلەلەر بويىنشا جۇمىس بايلانىستارىن جالعاستىرۋعا كەلىستى.