2022 جىلدان باستاپ ۇلتتىق ستاتيستيكا بيۋروسىنىڭ ماماندارى ءوزىن-ءوزى جۇمىسپەن قامتىعان قازاقستاندىقتار اراسىندا ەڭ باي ادامداردى انىقتاۋ شكالاسىنا وزگەرىس ەنگىزدى. قازىر اۋقاتتى كاسىپكەرلەر مەن تاۋەلسىز جۇمىسشىلار ساناتىنا ەنۋ ءۇشىن 2021 جىلعىداي 500 مىڭ تەڭگە ەمەس, 1 ملن تەڭگە تابىس بولۋى كەرەك, دەپ حابارلايدى Egemen.kz.
قازاقستاندا بارلىعى 8,9 ملن جۇمىسپەن قامتىلعان ادام بار. ونىڭ 6,8 ملن-ى جالدامالى جۇمىسشىلار, 2,1 ملن-ى ءوزىن-ءوزى جۇمىسپەن قامتىعاندار. ۇلتتىق ستاتيستيكا بيۋروسىنىڭ ماماندارى سوڭعى ساناتقا جەكە كاسىپكەرلەردى, ءار ءتۇرلى جەكە سەرىكتەستىكتەر قۇرىلتايشىلارى قاتىسۋشىلارىن, وندىرىستىك كووپەراتيۆتەردىڭ مۇشەلەرىن, جەكە جۇمىس ىستەيتىن ادامدار مەن جەكە شارۋاشىلىق ءونىمىن ساتاتىنداردى جاتقىزادى.
جالپى قازاقستانداعى ءوزىن-ءوزى جۇمىسپەن قامتىعانداردىڭ تابىسى ءماز ەمەس. وسى ساناتتاعىلاردىڭ 24,8%-ى (528,9 مىڭ ادام) بىلتىرعى ءتورتىنشى توقساندا ايىنا 60 مىڭ تەڭگەدەن 100 مىڭ تەڭگەگە دەيىن تابىس تاپقان. تاعى 358,9 مىڭ ازامات ەڭ تومەنگى جالاقىدان تومەن تابىس تاپتى: 37,4 مىڭ تەڭگەدەن 60 مىڭ تەڭگەگە دەيىن. تاعى جارتى ملن-عا جۋىق ءوزىن-ءوزى جۇمىسپەن قامتىعانداردىڭ تابىسى 100 مىڭ تەڭگەدەن 150 مىڭ تەڭگەگە دەيىن بولدى. وسىلايشا, ءوزىن-ءوزى جۇمىسپەن قامتىعانداردىڭ جالپى سانىندا مەديانالىق تابىستان (204 مىڭ تەڭگە) ايتارلىقتاي تومەن جالاقى الاتىن تاۋەلسىز جۇمىسشىلار باسىم بولدى: 81,4% نەمەسە 1,7 ملن ازامات.
تابىسى 500 مىڭ تەڭگەدەن اساتىن اۋقاتتى كاسىپكەرلەردىڭ ۇلەسى از بولىپ شىقتى: بار بولعانى 1% نەمەسە 22,3 مىڭ ادام. ونىڭ تەڭ جارتىسى جالاقىسى 500 مىڭ تەڭگەدەن 800 مىڭ تەڭگەگە دەيىن (10,3 مىڭ ادام). 2022 جىلدىڭ قازان –جەلتوقسان ايلارىندا ءوزىن-ءوزى جۇمىسپەن قامتىعان 6 مىڭعا جۋىق قازاقستاندىق ايىنا 800 مىڭ تەڭگەدەن 1 ملن تەڭگەگە دەيىن السا, وسىنشاما ادام ميلليونەر بولىپ ەسەپتەلدى. 2022 جىلدىڭ ءبىرىنشى توقسانىندا تابىسى 1 ملن تەڭگەدەن كوپ ءوزىن-ءوزى جۇمىسپەن قامتىعان ازاماتتار بىرنەشە ەسە ازايدى: بار بولعانى 1,2 مىڭ ادام.
ميلليونەر كاسىپكەرلەردىڭ وڭىرلەر بويىنشا سانى بىركەلكى ەمەس. تابىسى 1 ملن تەڭگەدەن كوپ بارلىق تىركەلگەن ءوزىن-ءوزى جۇمىسپەن قامتۋشىلاردىڭ 89%-ى الماتىلىقتار (5,3 مىڭ ادام) بولدى. تاعى 9%-ى, ياعني 541 ادام استانا قالاسى مەن اقمولا وبلىسىندا تۇرادى. وتە از ۇلەس (شامامەن 2%) ماڭعىستاۋ جانە ۇلىتاۋ وڭىرلەرىندە. باسقا وڭىرلەردە ميلليونداعان تابىسى بار ءوزىن-ءوزى جۇمىسپەن قامتىعاندار جوق.
ساناتتاعى بارلىق ازاماتتاردىڭ 95,1%-ى قالا تۇرعىندارى (5,7 مىڭ ادام) بولىپ شىقتى. تەك 293 ادام (4,9%) اۋىلدا كاسىپپەن اينالىسىپ, 1 ملن تەڭگە تابىسقا قول جەتكىزگەن.
ميلليونەرلەردىڭ جارتىسىنا جۋىعى ساۋدا سالاسىندا جۇمىس ىستەۋ ارقىلى وسىنداي جوعارى تابىسقا قول جەتكىزگەن (44,8%). تابىسى 1 ملن تەڭگەدەن كوپ ءوزىن-ءوزى جۇمىسپەن قامتىعانداردىڭ 21%-دان استامى جىلجىمايتىن م ۇلىك سالاسىندا بيزنەس يەلەرى نەمەسە تاۋەلسىز ساراپشىلار بولدى. قۇرىلىس سالاسى ءۇشىنشى ورىندا (13,3%). ميلليونداعان تابىسى بار ءوزىن-ءوزى جۇمىسپەن قامتىعاندار ەڭ از سالا اۋىل, ورمان جانە بالىق شارۋاشىلىعى (1,2%).
شۆەيتساريالىق Credit Suisse (CS) بانكىنىڭ الەمنىڭ ءارتۇرلى ەلدەرىندەگى ءال-اۋقات دەڭگەيى تۋرالى Global Wealth Report 2022 اناليتيكالىق ەسەبىنىڭ دەرەكتەرىنە سۇيەنسەك, 2021 جىلدىڭ سوڭىنا قاراي قازاقستانداعى دوللارلىق ميلليونەرلەردىڭ ۇلەسى رەسپۋبليكانىڭ ەرەسەك تۇرعىندارىنىڭ 0,3%-ىن قۇرادى. ءابسوليۋتتى تۇردە بۇل 36,9 مىڭ ادام. 2020 جىلمەن سالىستىرعاندا مۇنداي دەڭگەيدەگى قازاقستاندىقتاردىڭ سانى 50,9% ءوستى. پاندەميانىڭ ءبىرىنشى جىلىندا بايلىعىن ميلليونداعان اقش دوللارىمەن ولشەيتىن بايلار, دەرەككوزگە سۇيەنسەك, ەلدە 24,5 مىڭ ادام بولعان.