ەلىمىزدە جاستار جۇمىسسىزدىعى 3,8 پايىزدى قۇرايدى. رەسمي دەرەككە سۇيەنسەك, رەسپۋبليكا بويىنشا جۇمىسسىز جاستاردىڭ باسىم بولىگى – استانا قالاسىندا. وزەكتى ماسەلەنىڭ ءتۇيىنىن تارقاتۋ ءۇشىن جاۋاپتىلار ەلوردانىڭ بەس اۋدانىندا بىرتىندەپ «جاستارعا قىزمەت كورسەتۋ ورتالىعىن» اشۋدى قولعا الىپ وتىر.
مۇنداعى باستى ماقسات – مەملەكەتتىك جاستار ساياساتىن جۇزەگە اسىرۋ, جاستاردى قولداۋعا باعىتتالعان مەملەكەتتىك باعدارلامالار جانە جاستار اراسىنداعى جۇمىسسىزدىق, تۇرعىن ءۇي, ءبىلىم, دەنساۋلىق جانە تاعى باسقا دا باعىتتار بويىنشا كونسۋلتاتيۆتىك كومەك كورسەتۋ. جاستارعا قىزمەت كورسەتۋ ورتالىعى العاش بولىپ ەسىل اۋدانىنىڭ قابانباي باتىر داڭعىلى, 58ب مەكەنجايىندا سالتاناتتى تۇردە اشىلدى.
– جالپى, جاستار ساياساتىنىڭ باستى جۇمىستارىنىڭ ءبىرى – ولارعا جان-جاقتى قولداۋ كورسەتۋ, باعىت-باعدار بەرۋ. وسى باعىتتا وتكەن جىلدان باستاپ, ەلوردا جاستارىنا كەڭەس بەرۋ, جۇمىسقا ورنالاستىرۋ ماقساتىندا «جاستارعا قىزمەت كورسەتۋ ورتالىقتارى» كومەك كورسەتىپ كەلەدى. مىسالى, بىلتىر ءتورت اۋداننان بەس ورتالىق اشىلدى. ءبىز ءبىر جىلدىڭ ىشىندە 10 مىڭعا جۋىق جاسقا كەڭەس بەردىك. ناتيجەسىندە, 3,5 مىڭعا جۋىق ازاماتتى جۇمىسقا ورنالاستىردىق. مامانداردىڭ جول سىلتەۋىمەن ءۇيلى بولعاندارى دا بار. «ەلوردا جاستارى» باعدارلاماسى بويىنشا جاستارعا 5 پايىزدىق جەڭىلدەتىلگەن نەسيە بەرىلەدى, – دەدى استانا قالاسى جاستار ساياساتى باسقارماسىنىڭ باسشىسى قايرات قامباروۆ.
ورتالىقتا مەملەكەتتىك تۇرعىن ءۇي باعدارلامالارى, جۇمىسقا ورنالاسۋ ماسەلەلەرى, ۆولونتەرلىك قىزمەت, جاستار باستامالارىن قولداۋ, قۇقىقتىق جانە پسيحولوگيالىق كومەك كورسەتىلەدى. مۇندا كوۆوركينگ ءبولىمى دە جۇمىس ىستەيدى.
– بىزگە جاستار الەۋمەتتىك جەلىلەر ارقىلى دا بايلانىسقا شىعادى. وندا سۇرانىسقا يە بوس جۇمىس ورىندارى جاريالانىپ وتىرادى. وسى رەتتە جۇمىس قىزىقتىرعان وقىرماندارعا بىرنەشە مۇمكىندىكتى قاراستىرىپ, ولاردىڭ پوشتالارىنا جولدايمىن, – دەدى «استانا جاستارى» جاستار رەسۋرستىق ورتالىعىنىڭ قىزمەتكەرى جانگۇل قامبار.