پرەزيدەنت قاسىم-جومارت توقاەۆ «قازمۇنايگاز» ۇك» اق باسقارما توراعاسى ماعزۇم مىرزاعاليەۆتى قابىلدادى, دەپ حابارلايدى Egemen.kz اقورداعا سىلتەمە جاساپ.
مەملەكەت باسشىسىنا «قازمۇنايگاز» ۇك» اكتسيونەرلىك قوعامىنىڭ بىلتىرعى وندىرىستىك جۇمىستارىنىڭ نەگىزگى قورىتىندىسى تۋرالى ەسەپ بەرىلىپ, الداعى كەزەڭگە ارنالعان جوسپارى تانىستىرىلدى.
بەرىلگەن مالىمەتكە سايكەس كومپانيا كومىرسۋتەكتەردى ءوندىرۋ, وڭدەۋ جانە تاسىمالداۋ بويىنشا بەلگىلەنگەن كورسەتكىشتەرگە قول جەتكىزدى. بيىل «قازمۇنايگاز» 23 ميلليون توننادان استام مۇناي ءوندىرۋدى جوسپارلاپ وتىر. پرەزيدەنتكە وزەن كەن ورنىن وڭالتۋ جونىندە دە ەسەپ بەرىلدى. بۇل جوبانىڭ ەكونوميكالىق قانا ەمەس, سونداي-اق الەۋمەتتىك ماڭىزى بار.
بۇدان بولەك, ماعزۇم مىرزاعاليەۆ كومپانيانىڭ گەولوگيالىق قورلارىن ۇلعايتۋ پەرسپەكتيۆالارى تۋرالى باياندادى. ونىڭ ايتۋىنشا, بۇگىندە جاڭا جوبالارعا ينۆەستيتسيا بەلسەندى تۇردە تارتىلىپ جاتىر.
مەملەكەت باسشىسىنا «جاسىل جوبالاردى» دامىتۋ جونىندە بەرگەن تاپسىرماسىنىڭ ورىندالۋ بارىسى تۋرالى مالىمەت بەرىلدى. «قازمۇنايگاز» باسشىسى كومپانيانىڭ كاسىپورىندارى ورنالاسقان وڭىرلەردە حالىقتى ساپالى اۋىزسۋمەن قامتاماسىز ەتۋگە باعىتتالعان جوبالاردىڭ جۇزەگە اسىرىلۋ بارىسى تۋرالى ايتتى.
كەزدەسۋ سوڭىندا قاسىم-جومارت توقاەۆ ينۆەستيتسيالىق جوبالاردى ىسكە اسىرۋعا قاتىستى بىرقاتار تاپسىرما بەردى. سونداي-اق قازاقستاندىق مۇناي وڭدەۋ زاۋىتتارىنىڭ, اسىرەسە كوكتەمگى ەگىس جۇمىستارى قارساڭىندا ۇزدىكسىز جۇمىس ىستەۋىن قامتاماسىز ەتۋ قاجەتتىگىنە ەرەكشە نازار اۋداردى.