قاسىم-جومارت توقاەۆتىڭ توراعالىق ەتۋىمەن سەنات بيۋروسىنىڭ وتىرىسى بولدى, دەپ حابارلادى وسى پالاتانىڭ ءباسپاسوز قىزمەتى.
جوعارعى پالاتانىڭ 26 ماۋسىمدا بولاتىن كەزەكتى وتىرىسىنىڭ كۇن ءتارتىبى قارالدى. سەنات وتىرىسىنا «دەنەشىنىقتىرۋ جانە سپورت تۋرالى» زاڭناماعا دەنەشىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى ىلەسپە زاڭ جوباسى شىعارىلاتىن بولدى. دەپۋتاتتار, سونداي-اق, كەيبىر زاڭنامالىق اكتىلەرگە قازاقستان رەسپۋبليكاسىنىڭ پوشتا تۋرالى زاڭناماسىنىڭ نورمالارىن دۇنيەجۇزىلىك پوشتا وداعى اكتىلەرىنىڭ نورمالارىمەن بىرىزدەندىرۋ ماسەلەلەرى بويىنشا تۇزەتۋلەر ەنگiزۋ تۋرالى زاڭ جوباسىن قارايدى.
كۇن تارتىبىنە ودان باسقا حالىقارالىق قۇجاتتاردى راتيفيكاتسيالاۋ تۋرالى بەس زاڭ جوباسى ەنگىزىلدى. باس كوميتەتتەردىڭ توراعالارى زاڭ جوبالارىنىڭ سەنات وتىرىسىنا ازىرلىك بارىسى تۋرالى باياندادى. بيۋرودا, سونداي-اق, تاياۋدا ماجىلىستەن تۇسكەن زاڭ جوبالارى ءبولىنىپ بەرىلدى.
پالاتا توراعاسى ق.توقاەۆ پارلامەنتارالىق اسسامبلەيانىڭ دامۋىنا بەلسەندى قاتىسقانى جانە تاۋەلسىز مەملەكەتتەر دوستاستىعىنا قاتىسۋشى ەلدەر حالىقتارى اراسىندا دوستىقتى نىعايتقانى ءۇشىن تمد پاا-نىڭ قۇرمەت گراموتالارىن سەناتورلار ەرمەك جۇماباەۆ پەن ۆلاديمير بوبروۆقا تابىس ەتتى. سەناتتىڭ بىرقاتار دەپۋتاتتارى «نۇر وتان» پارتياسىنىڭ جاڭا ۇلگىدەگى بيلەتتەرىنە يە بولدى.
بيۋرو, سونداي-اق, استانا, الماتى قالالارى مەن ەلىمىزدىڭ وبلىستارى ءماسليحاتتارىنىڭ ءبىر توپ دەپۋتاتىن «قازاقستان رەسپۋبليكاسى ءماسليحاتتارىنىڭ 20 جىلدىعىنا وراي جانە وتاندىق قۇقىقتىق جۇيەنى جەتىلدىرۋگە باعىتتالعان قىزمەتى ءۇشىن» پارلامەنت سەناتىنىڭ قۇرمەت گراموتاسىمەن ماراپاتتاۋ تۋرالى قاۋلى قابىلدادى. وبلىستىق, قالالىق جانە اۋداندىق ءماسليحاتتاردىڭ دەپۋتاتتارىن قوسقاندا 63 ادام سەنات ناگراداسىن الاتىن بولدى.