ءاليحان سمايىلوۆ جەتىسۋ وبلىسىنداعى بىرقاتار نىسان جۇمىسىمەن تانىستى

ۇكىمەت باسشىسى قالاداعى 1981 جىلدان بەرى جۇمىس ىستەپ تۇرعان «باسقۋات» قازاندىعىنا باردى. قۋاتى شامامەن 200 گكال/ساعات بولاتىن قازاندىق بۇگىندە 500-دەن استام كوپ پاتەرلى جانە 1 000 جەكە تۇرعىن ءۇيدى, 20 مەكتەپتى, 25 بالاباقشانى, 10 اۋرۋحانانى جانە 90 اكىمشىلىك عيماراتتى جىلۋمەن قامتاماسىز ەتىپ وتىر. سونىمەن قاتار تالدىقورعانداعى قۇرىلىس جۇمىستارىنىڭ قارقىنى مەن جىل سايىنعى جۇكتەمەنىڭ ۇلعايىپ كەلە جاتقانىن ەسكەرە وتىرىپ, قازاندىق قۋاتىن ساعاتىنا 300 گكال-عا دەيىن ارتتىرۋ جانە وبەكتىنى گازعا اۋىستىرىپ, جاڭعىرتۋ جوسپارلانىپ وتىر.

ءاليحان سمايىلوۆ قازاندىقتى جاڭعىرتۋ تۇتىنۋشىلارعا كورسەتىلەتىن قىزمەتتەردىڭ ساپاسىن ارتتىرىپ, قالانىڭ ەكولوگيالىق احۋالىن جاقسارتۋعا جانە جىلۋ شىعىنىن تومەندەتۋگە مۇمكىندىك بەرەتىنىن اتاپ ءوتتى.

«قازاندىقتى گازعا اۋىستىرۋدىڭ ماڭىزى زور, بۇل ونىمدىلىكتى جاقسارتىپ, ەكولوگيالىق ماسەلەلەردى شەشۋگە ايتارلىقتاي ۇلەس قوسادى. وبلىس اكىمدىگى جوبا بويىنشا جۇمىستى جەدەلدەتۋى كەرەك. ۇكىمەت ءوز تاراپىنان قاجەتتى كومەك كورسەتەدى», دەدى ۇكىمەت باسشىسى.

ودان كەيىن پرەمەر-مينيستر كابەلدىك-وتكىزگىش ونىمدەردىڭ تۇرلەرىن شىعاراتىن «تالدىقورعانكابەل» كاسىپورنىنىڭ جۇمىسىمەن تانىستى. زاۋىت ءوز ونىمدەرىن قازاقستاننىڭ بارلىق وڭىرلەرىنە, سونداي-اق ازەربايجان, قىتاي, قىرعىزستان, پولشا, رەسەي, وزبەكستان جانە باسقا دا بىرقاتار ەلدەرگە شىعارىپ وتىر.

جالپى جەتىسۋ وبلىسىندا 514 ونەركاسىپ كاسىپورنى جۇمىس ىستەيدى, وندا 4 مىڭنان استام ادام ەڭبەك ەتەدى. وتكەن جىلى وڭىردە 280 ملرد-تان استام تەڭگەنىڭ وندىرىستىك ونىمدەرى شىعارىلدى, 17 جاڭا نىسان پايدالانۋعا بەرىلدى. 2023 جىلى ينۆەستيتسيالىق قۇنى 24,4 ملرد تەڭگەنى قۇرايتىن تاعى 8 جوبانى ىسكە قوسۋ جوسپارلانعان.

ۇكىمەت باسشىسىنىڭ ايتۋىنشا, ەنەرگەتيكا, ماشينا جاساۋ كاسىپورىندارىندا, سونداي-اق مەملەكەت قاراجاتى ەسەبىنەن وبەكتىلەر سالۋ كەزىندە وتاندىق ءونىمدى پايدالانۋدى ىنتالاندىرۋ قاجەت. وسىعان بايلانىستى يندۋستريا جانە ينفراقۇرىلىمدىق دامۋ مينيسترلىگىنە نورماتيۆتىك-قۇقىقتىق اكتىلەرگە ءتيىستى وزگەرىستەر ەنگىزۋ ماسەلەسىن پىسىقتاۋ تاپسىرىلدى.

تالدىقورعانداعى شاعىن اۋدانداردىڭ بىرىندە ءاليحان سمايىلوۆ حالىقتىڭ الەۋمەتتىك وسال توپتارىنا جاتاتىن ازاماتتار ءۇشىن سالىنعان 60 پاتەرلىك تۇرعىن ءۇيدى ارالاپ كوردى. ۇكىمەت باسشىسى 2022 جىلدىڭ قورىتىندىسى بويىنشا وبلىستا قۇرىلىس جۇمىستارىنىڭ كولەمى 4%-دان استام وسكەنىن اتاپ ءوتتى.

«وبلىس اكىمدىگى وسى قارقىنمەن بەلگىلەنگەن جوسپارلاردى ءتيىمدى ىسكە اسىرۋدى جالعاستىرۋى قاجەت. سونىمەن قاتار  قۇرىلىس ءجۇرىپ جاتقان اۋداندارعا ينفراقۇرىلىمدى كەشىكتىرمەي, دەر كەزىندە تارتىپ بەرۋ ماڭىزدى», دەدى پرەمەر-مينيستر.

ساپار بارىسىندا ۇكىمەت باسشىسى اقشاتوعان اۋىلىنداعى جاڭا فەلدشەرلىك-اكۋشەرلىك پۋنكتتىڭ جۇمىسىمەن تانىستى. وندا بيىلعى قاڭتار ايىنان باستاپ جەرگىلىكتى تۇرعىندار مەديتسينالىق كومەك پەن ەكپەلەردىڭ نەگىزگى تۇرلەرىن الا الادى. الداعى ءۇش جىلدا وڭىردە تاعى 118 العاشقى مەديتسينالىق-سانيتارلىق كومەك نىسانى, ونىڭ ىشىندە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 59 مەديتسينالىق نىسان اشۋ جوسپارلانىپ وتىر.