ءبىر كارتينانى سالدىڭ دا, ۇقساتتىڭ. ول جاي عانا ورىنداۋشىلىق. ال تۋىندىعا جان ءبىتىرۋ ءۇشىن سۋرەتشى ىشكى الەمىندە الاي-دۇلەي ارپالىسقا تۇسەدى. وزىندەگى كوڭىل كۇي ىرعاقتارىن, جان سەزىمىن سول كارتيناعا سىعىپ بەرە السا عانا شىعارماشىلىق شەشىم تاۋىپ, ءار بوياۋ ءوز ورنىنا قونادى. الماتىعا «اي ساۋلەسى» دەپ اتالعان كومپوزيتسيالىق توپتاماسىمەن كەلگەن يسپان سۋرەتشىسى حوسە ماريا كانو تۇنگى شىراقتىڭ جۇمباق جارىعىنان تىلسىم سىر ىزدەيدى.
تەك ءبىر عانا تاقىرىپقا 19 شىعارما ارناعان سۋرەتشىنىڭ قولتاڭباسى بەينەلەۋ ونەرىنىڭ زاماناۋي ۇلگىدەگى جاڭعىرىعى دەرسىز. قابىرعاعا ىلىنگەن 19 اي بەينەسى 19 ءتۇرلى اسەر سىيلايدى.
«مەنىڭ سۋرەتتەرىم كورەرمەندى قۇپيا الەمگە قۇشتار ەتەدى. بوياۋمەن ەمەس, جانىممەن جازامىن. ويىمنىڭ استارىن ءتۇسىنۋدى كورەرمەننىڭ تۇيسىگىنە قالدىرامىن. ءومىردىڭ جاڭا بەينەسىن ونەر ارقىلى اشۋعا تىرىسۋىمىز قاجەت», – دەپ تەبىرەنەدى حوسە ماريا كانو.
قىلقالام يەسىن مۇنداي باتىل قادامعا اكەلگەن تابيعاتقا دەگەن ىستىق ىقىلاس, بالكىم, شەكسىز الەمدى رومانتيكالىق اسپەكتىدە قابىلداي الۋى. اسپان شىراعىنىڭ اينالاسىندا وربىگەن وي تولعامداردا سۋرەتشىنىڭ جانى مەن جۇرەگى قورشاعان ورتانىڭ ءاربىر تالشىعىنا دەگەن سۇيىسپەنشىلىكپەن توعىسقان. تۇستىك قاتىناستارى بوياۋدىڭ جاتىقتىعى مەن ۇيلەسىمىنە قاراي ۇمتىلادى.
اۆتور دۇنيە جارالعالى ادامزات اسپانىن كەزگەن اي ساۋلەسى ادامداردىڭ ءومىر ىرعاعىنا, كوڭىل كۇيىنە تىكەلەي اسەر ەتەتىن قۋاتتى قۇبىلىس ەكەنىنە كوڭىل بولەدى. بىردە نۇرلانىپ, بىردە تۇنجىراي تۇسكەن اي سۇلباسى جاي عانا اسپان دەنەسى ەمەس, جاراتۋشىنىڭ كەمەلدىگىن ايگىلەيتىن اقىلدى شىراق دەپ قابىلدايدى. ەڭ قىزىعى رومانتيكالىق-اڭىزعا اينالعان اي تاقىرىبىنا سۋرەتشى كەزدەيسوق كەلمەگەن. ءاربىر شىعارماشىلىق ادامى بەلگىلى ءبىر تىلسىم كۇشتەن رۋحاني قۋات الاتىنى سەكىلدى, اي – كانونىڭ شىعارماشىلىقتاعى بويتۇمارى. ءبىر بويىنا بىرنەشە ونەر توعىسقان كانو ەۋروپاعا تانىمال «مەكانو» پوپ-توبىندا ءان شىرقاعاندا «اي بالاسى» اتتى باللاداسىمەن كورەرمەن جۇرەگىن جاۋلاعان. كەيىنىرەك بۇل ءان اۆتوردىڭ ەڭ تانىمال شىعارماسىنا اينالعان. لوندون ساحناسىندا باس پارتياسىن ايگىلى پلاسيدو دومينگو شىرقايتىن «اي» وپەراسى دا يسپاندىق تالانت كانونىڭ شىعارماسى.
«اي ساۋلەسى» توپتاماسىنداعى بارلىق كارتينالار «ورتەۋ ونەرى» تەحنيكاسىندا ورىندالعان. بەينەلەۋ ونەرىندە بۇل باعىتتى ەنكاۋستيكا دەپ اتايدى. سۋرەتشىنىڭ پاليتراسىنا كىرەتىن نەگىزگى بايلانىستىرۋشى كومپونەنت – بالاۋىز. ءمارمار نەمەسە تاقتاعا جاعىلعان بوياۋلاردى قايتا ەرىتىپ, كۇيدىرىلگەن بالاۋىز بوياۋلارىمەن كەنەپكە كەسكىندەۋ ءادىسى ەجەلگى مىسىردا بەلگىلى بولعان. ونەرتانۋشىلاردىڭ پايىمىنشا, مىسىر قولونەرشىلەرىنىڭ مۇنداي ءادىستى قولدانۋى تاجىريبەلىك ويلاردان تۋىنداسا كەرەك.
قابىرلەر مەن مۋميالاردى بوياۋدا شەبەرلەر ۋاقىت اعىسىنا توتەپ بەرەتىن بەرىك ماتەريال رەتىندە بالاۋىزدى پايدالانعان. جازباشا دەرەككوزدەردە ەنكاۋستيكا تەحنيكاسى تۋرالى بارلىق قۇپيا ايتىلا بەرمەيتىنىنە قاراماستان, كەيىنگى بۋىن سۋرەتشىلەردىڭ اتالعان تەحنيكاعا قىزىعۋشىلىعى تومەندەمەگەن.
– كانو مادريد, لوندون, ميلان, شانحاي, بەيجىڭ, حانوي, كيەۆ, ماسكەۋ, پراگا, ۆارشاۆادا قانشاما كورمە وتكىزدى. سۋرەتشىنىڭ ەنكاۋستيكالىق قۇپياسى بار, سوندىقتان ول بالقىتىلعان بوياۋلارمەن تاقتالارعا ەمەس, كەنەپكە جازادى. حيۋگو ريفكيند «تايمس» گازەتىنىڭ «ونەر بەتتەرىندەگى» ماقالاسىندا جازعانداي: «كانو كارتينالارىنىڭ بەتى ءمولدىر تەرەڭدىككە يە, سوندىقتان ولار كارتينالارعا قاراعاندا مۇسىندەرگە كوبىرەك ۇقسايدى».
ال ماركو ليۆينگستون كانونىڭ كاتالوگىنا ارناعان ەسسەسىندە: «ونىڭ شىعارمالارىندا عالامنىڭ ءوزى سياقتى جۇمباق جانە تۇسىنىكسىز الەم جاسالادى», دەپ تولعانادى. سۋرەتتىڭ دەڭگەيىن كوبىنە-كوپ ونىڭ ساپاسى ەمەس, تۇتىنۋشىنىڭ تالعامى شەشەدى. دەگەنمەن, حوسە ماريا كانو الەمدىك سۋرەت نارىعىندا كارتينالارى ەڭ قىمبات ساتىلاتىن تۇلعا.
حالىقتار ءبىر-ءبىرىنىڭ مادەنيەتىن تانۋ ارقىلى جاقىنداسا تۇسەدى. الەمدى شارلاعان, مويىندالعان قولتاڭبانىڭ قازاق كورەرمەنىمەن قاۋىشۋى ەل مادەنيەتىندەگى جارقىن وقيعا, – دەيدى ونەرتانۋشى ماريا كوپەليوۆيچ.
الماتى