قازاقستان قۇراماسىنىڭ پاراسپورتشىلارى بىلتىرعى بارىس جىلىندا زور تابىسقا قول جەتكىزدى. 2022 جىلى جالاۋى جەلبىرەگەن بىرقاتار حالىقارالىق باسەكەدە ءتاۋىر ناتيجە كورسەتىپ, جانكۇيەرلەردى شاتتىققا بولەگەن كەزى از بولعان جوق. ماسەلەن, وتانداستارىمىز ءبىر جىل بەدەرىندەگى سان ءتۇرلى دودادا 62 التىن, 63 كۇمىس جانە 62 قولا مەدال, جالپى – 187 جۇلدە ولجالادى. بۇل – پاراسپورتشىلار ءۇشىن جاقسى كورسەتكىش.
مادەنيەت جانە سپورت مينيسترلىگى ۇسىنعان مالىمەت بويىنشا, قازاقستان پاراسپورتشىلارى اراسىندا ەل قورجىنىنا ەڭ كوپ مەدالدى پارا پاۋەرليفتينگ (51 مەدال, ونىڭ 22-ءسى التىن), ءجۇزۋ (42 مەدال, ونىڭ 15-ءسى التىن) جانە پارا جەڭىل اتلەتيكا (41 مەدال, ونىڭ 13-ءى التىن) وكىلدەرى سالعان ەكەن. كەيىنگى ورىندارعا پارا دزيۋدوشىلار (20 مەدال, ونىڭ 6-ۋى التىن) مەن پارا تاەكۆوندوشىلار (16 مەدال, ونىڭ ەكەۋى التىن) جايعاسقان.
سونىمەن قاتار وتاندىق پاراسپورتشىلار پارا ۆولەيبول (1 التىن), پارا شاڭعى جارىسى جانە پارا بياتلون (8 مەدال, ونىڭ بىرەۋى التىن), پارا ۇستەل تەننيسى (5 مەدال, بارلىعى – قولا), پارا ساداق اتۋ (2 مەدال, بىرەۋى التىن) جانە پارا كاراتە (1 التىن جۇلدە) تۇرلەرىنەن دە حالىقارالىق جارىستاردا ءتۇرلى-ءتۇستى جۇلدەلەرگە قول جەتكىزگەن.
قازاقستان پاراسپورتشىلارى ءۇشىن 2022 جىلداعى ەڭ تابىستى كەزەڭ – قاراشا (61 مەدال), ماۋسىم (35) جانە قازان (32) ايلارى بولدى. ويتكەنى ءدال وسى ۋاقىت ارالىعىندا جەرلەستەرىمىز جىلدىڭ ەڭ ءىرى تۋرنيرلەرىندە ونەر كورسەتىپ, ۇزدىكتەر قاتارىنان كورىنۋگە مۇمكىندىك الدى. ايتالىق, ماۋسىم ايىندا پاۋەرليفتينگتەن ازيا مەن مۇحيت ايماعى اشىق چەمپيوناتى ءوتىپ, وندا ءبىزدىڭ پاراسپورتشىلار 4 التىن, 8 كۇمىس جانە 6 قولا جۇلدەگە يە بولدى. قازان ايىندا جەرلەستەرىمىز بىرقاتار سپورت تۇرىنەن ۇيىمداستىرىلعان الەم چەمپيوناتتارىنا قاتىستى. بۇل دودالاردا قازاقستان قورجىنىنا 10 مەدال ءتۇستى.
ال قاراشادا قازاقستان پاراسپورتشىلارى ءار ەكى جىل سايىن حالىقارالىق اربادا وتىرعاندار مەن امپۋتانتتار سپورت فەدەراتسياسى وتكىزەتىن IWAS دۇنيەجۇزىلىك ويىندارىندا باق سىنادى. بۇل سىندا ەل قۇراماسىنىڭ وكىلدەرى جالپى سانى – 42 مەدال (11 التىن, 17 كۇمىس جانە 14 قولا) ولجالاپ, جالپىكوماندالىق ەسەپتە ۇزدىكتەر قاتارىنان كورىندى.
«قازاقستاندا كەيىنگى بىرنەشە جىلدا پاراسپورت تۇرلەرى قارقىندى دامىپ كەلەدى. سونىڭ ناتيجەسىندە سپورتشىلارىمىز ءىرى حالىقارالىق جارىستاردا ءجيى جەڭىس تۇعىرىنا كوتەرىلىپ ءجۇر. ارينە, ءبىز مۇنىمەن توقتاپ قالمايمىز. كەرىسىنشە, ءارى قاراي دا پاراسپورتقا كوبىرەك كوڭىل ءبولۋدى جالعاستىرا بەرەمىز. اسىرەسە, پاريجدەگى پاراليمپيادا قارساڭىندا دايىندىقتى كۇشەيتۋىمىز كەرەك», دەدى مادەنيەت جانە سپورت ۆيتسە-ءمينيسترى سارسەن قۇرانبەك.