بۇل تۋرالى تۇركيانىڭ قازاقستانداعى ەلشىسى ۋفۋك ەكيدجي حابارلادى, دەپ جازادى Egemen.kz.
قازاقستان مەن قىرعىزستان ەرىكتىلەرى جىبەرگەن كيىز ۇيلەر كاحرامانماراش قالاسىندا ورناتىلدى.
«سونىمەن قاتار ءبىز الماتىدان 100-گە جۋىق كيىز ءۇي جونەلتۋدى ۇيىمداستىرىپ جاتىرمىز. بۇل ءبىزدىڭ ەلشىلىك ارقىلى وتەتىندەر عانا. باسقا دا ادامدار وزدەرى جىبەرەتىن كيىز ۇيلەر بولۋى مۇمكىن», دەدى ۋفۋك ەكيدجي.
بۇعان دەيىن قازاقستان مەن قىرعىزستان تۇركياداعى زارداپ شەككەندەرگە كومەك كورسەتۋ ءۇشىن 84 كيىز ءۇي جىبەرگەن ەدى.
سوڭعى مالىمەتتەر بويىنشا, تۇركيادا بولعان جويقىن جەر سىلكىنىستەرى 43,5 مىڭنان استام ادامنىڭ ءومىرىن قيعان. اپات ايماعىنان 448 مىڭنان استام ادام ەۆاكۋاتسيالاندى.
پوليتسەيلەردىڭ مالىمەتىنشە, 564 ادام جەر سىلكىنىسىنەن زارداپ شەككەن اۋدانداردا ءۇي سالۋ نورمالارىن بۇزدى دەگەن كۇدىككە ىلىنگەن. كۇدىكتىلەردىڭ 160-ى قاماۋعا الىندى, كەيبىرى ءالى ىزدەستىرىلىپ جاتىر.
ۇيىندىلەر اراسىنان ادامداردى ىزدەۋگە توتەنشە جاعدايلار مينيسترلىگىنىڭ قازاقستاندىق قۇتقارۋشىلارى دا اتتانعان. قر توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمباەۆ قازاقستاندىق قۇتقارۋشىلار جەر سىلكىنىسى بولعان اۋماقتا تاۋلىك بويى جۇمىس ىستەگەنىن ايتتى.
ال 20 اقپاندا تۇركيا مەن سيريا شەكاراسىندا ماگنيتۋداسى 6,4 بولاتىن تاعى ءبىر جەر سىلكىنىسى تىركەلگەن ەدى.