قامكوڭىل وتباسى قولداۋ كۇتەدى

سودان باستاپ جەتى جىل پاتەر جالداپ, كىسى ۇيىندە كۇنەلتكەن وتباسى مۇشەلەرى وسى ۋاقىت ارالىعىندا تاعى ەكى سابيمەن تولىعادى. الايدا ەرلى-زايىپتى فارحاد ءتاجىمۇراتوۆ پەن ءاسيا تورەنيازوۆانىڭ بەس بالاسىنىڭ ۇشەۋى «دتسپ», ياعني, بالالارداعى تسەرەبرالدى پاراليچ اۋرۋىنا شالدىعىپ, قيىندىقتىڭ قامىتىن كيەدى. بىرەۋ ەمەس, ءۇش بالانىڭ مۇنداي كۇيگە ءتۇسۋى اتا-انانىڭ ەڭسەسىن ەزىپ, سارى ۋايىمعا سالادى.

بەس بالامەن پاتەر جاعالاعان وتباسىنىڭ الەۋمەتتىك تۇرمىس-جاعدايى ەسكەرىلىپ, 2017 جىلى تالعار قالاسىنان 2 بولمەلى, جالپى الاڭى 58,90 شارشى مەتر ارەندالىق پاتەر بۇيىرعان. ونىڭ ىشىندە تۇرعىن بولمە الاڭى 33,54 شارشى مەتردى قۇرايدى. باستارىنا باس قالقا تابىلعانىنا قۋانعان ءاسيا مەن فارحاد بار كۇشىن ناۋقاس بالالارىن ەمدەتۋگە جۇمىلدىرادى. الايدا ۋاقىت ءبىر ورنىندا تۇرمايدى. جىلدان-جىلعا بالالار ەسەيىپ كەلەدى. تۇلا بويى تۇڭعىشى نۇريا بويجەتىپ, كوللەدج ءبىتىرىپ, بيىل 21 جاسقا تولسا, ۇلى سەرىك 11-سىنىپتا وقيدى. ال 2007 جىلعى قايرات, 2012 جىلعى اسەت پەن 2016 جىلى دۇنيەگە كەلگەن ۆەنەرانىڭ سال اۋرۋىنا شالدىعۋى وتباسى ءۇشىن اۋىر قاسىرەتكە اينالعان. تۋعاننان سوڭعى ەكى-ءۇش جىلدا انىقتالعان دياگنوزدارىنىڭ ەمىن تاپپاي جۇرگەن اتا-انا جانىن شۇبەرەككە ءتۇيىپ كەلەدى. اينالدىرعان ەكى بولمەنىڭ ءبىرى – جاتىن ورىن بولسا, ەكىنشى بولمەسى ناۋقاس بالالاردىڭ جاعالاپ جۇرۋىنە, قيمىل-قوزعالىسىن جاتتىقتىرۋعا ارنالعان تەمىر-تەرسەك قۇرىلعىلارعا تولىپ تۇر. وسىندا جاتادى, وينايدى ءارى جاتتىعادى. ارينە, ايتۋعا وڭاي. شىن مانىندە, اۋرۋ بالالاردىڭ ءبىرى جىلاسا, ەكىنشىسى تىرىسپاسى ۇستاپ اتا-انا مەن باۋىرلارىنىڭ ەسىن ەكەۋ, ءتۇسىن تورتەۋ قىلاتىن ساتتەر ءجيى قايتالانادى. جۇرەككە ينەدەي قادالاتىن مۇنداي جاعدايعا كوندىككەن وتباسى مۇشەلەرى ءۇشىن باسپانانىڭ تارلىعى كۇننەن-كۇنگە تۇرمىسىن قىسا تۇسۋدە.

–  ءۇيدى جولداسىم فارحاد ءتاجىمۇراتوۆتىڭ اتى­نان العانبىز. ول كىسىنىڭ كوزى ناشار كورەدى, لين­­زامەن جۇرەدى. مۇگەدەكتىككە كوميسسيادان وتكەن­دە وپە­راتسيا جاساتۋ قاجەتتىگىن ايتقان. الاي­­دا ءبىز با­لا­لاردى ەمگە اپارامىز. ەگەر وپەرا­تسيا جا­سالسا, تومەنگە قاراۋعا, اۋىر كوتەرۋگە بول­­مايدى ەكەن. سول جاعىنان قيىندىق تۋىپ تۇر. مۇ­گەدەك بالا­لاردىڭ ۇلكەنى قايراتتىڭ تالماسى ءجيى ۇستاپ قالادى, ونى كوتەرۋگە اكەسىنىڭ عانا شاماسى جەتەدى. وعان قوسا بالالاردى ەم-دومعا دا اكەسى تاسى­مالدايدى, – دەگەن بەس بالانىڭ اناسى ءاسيا تورەنيازوۆا ءسوزىن ودان ءارى ساباقتاي ءتۇستى. – سول جىلى ءۇيلى بولعانداردىڭ كوبى باسپاناسىن جەكە­شەلەندىرىپ الدى. ال بىزگە كەلگەندە ونداي مۇمكىندىك بولماي تۇر. ءۇيىمىزدى جەكەشەلەندىرۋ ءۇشىن بىلتىر كوميسسيادان وتكەندە اۋداننان مىنانداي قورىتىندى الدىق: بالالاردىڭ اتا-اناسى بار, مۇمكىندىگى شەكتەۋلى بولسا دا قاراۋشىسى بار ەسەبىندە بولعاندىقتان وتباسىمىزعا ءۇي تەگىن بەرىلمەيدى ەكەن. ءۇيدىڭ يەسى بولىپ تابىلاتىن كۇيەۋىم مۇگەدەكتىك الۋى كەرەك. ناشار كورەتىن كوزىنە وپەراتسيا جاسالسا, بالالارعا قيىن بولايىن دەپ تۇر. سونىمەن ءارى-ءسارى كۇي كەشۋدەمىز. «تالعار اۋدانىنىڭ تۇرعىن ءۇي-كوممۋنالدىق شارۋاشىلىق, اۆتوموبيل جولدارى, جولاۋشىلار كولىگى جانە تۇرعىن ءۇي ينسپەكتسياسى ءبولىمى» مەملەكەتتىك مەكەمەسى تۇرعىن ءۇيدى جەكەشەلەندىرۋ تۋرالى №2376610662 شارت جاساپ, ءۇيدىڭ باعالاۋ قۇنىنىڭ 30 پايىزىن, ول 1 240 672 تەڭگە, 2022 جىلدىڭ 29 جەلتوقسانىنا دەيىن تولەپ, قالعان قۇنىن 10 جىلعا, 2032 جىلعا دەيىن, اي سايىن 24 124,10 تولەۋگە كەستە شىعارىپ بەردى. ياعني تولىق جەكەشەلەندىرۋ ءۇشىن 4 ملن تەڭگەدەن ارتىق اقشا تولەۋىمىز كەرەك. سودان وتكەن جىلدىڭ جەلتوقسان ايىندا نەسيە الىپ 30 پايىزىن, ياعني 1 ملن-نان ارتىق اقشانى قۇيدىق.

اياداي ەكى بولمەدە ءومىر ءسۇرىپ جاتقان جەتى جان بولسا, ولاردىڭ ىشىندە ءۇش بالاسى مۇگەدەك, كۇيەۋى دە كورۋ قابىلەتى تومەن, مۇگەدەكتىك الۋدىڭ الدىندا تۇرعانىن ايتىپ, جانارى جاساۋراعان كوپبالالى انانىڭ بار ارمانى – بالالارىنىڭ دەنساۋلىعى تۇزەلىپ, كەرەگەسى كەڭ ۇيدە ءومىر ءسۇرۋ, ناۋقاس بالالارعا قولايلى جاعداي جاساۋ. 2017 جىلى كىرگەننەن ەكى بولمەگە ەشقانداي جوندەۋ جۇمىستارى جۇرگىزىلمەگەن. ءتىپتى ءبىرىنىڭ قابىرعالارىنداعى قۇرىلىس ماتەريالدارى دا اعارماعان كۇيدە قالعانى جانعا باتتى. ناۋقاس بالالى وتباسىنىڭ بۇل كۇيىن كورۋ كىمگە بولسا دا وڭاي سوقپاسى انىق. ال بويجەتكەن قىز بەن ەرجەتكەن ۇلدىڭ دا جەكە بولمەسى بولۋ قاجەتتىگىن ويلاۋدىڭ ءوزى ارتىق.

مۇقتاجدىقتىڭ مۇڭىن ارقالاپ, زارىن يلەپ جۇرگەن وتباسىنا جاناشىر, اتىمتاي جومارت ازاماتتار تابىلىپ قولۇشىن بەرۋدىڭ ورايى كەلسە, قانە؟! ەڭ بولماعاندا دەنى ساۋ بالالاردىڭ جاعدايى جاسالىپ, قىسىلىپ-قىمتىرىلماي ساباعىن وقۋىنا, ەڭبەك ەتۋىنە, ءسويتىپ, اتا-اناسىنىڭ ءبىر جاعىنا شىعۋىنا جاعداي جاسالار ما ەدى؟ وسىلايشا, تاعدىردىڭ باسقا سالعان اۋىرتپالىعىن ارقالاپ جۇرگەن وتباسىنىڭ بار ارمانى – باسپاناسىن جەكەشەلەندىرۋ. سوندا ونى ساتىپ نەمەسە اۋىستىرىپ بولسا دا كەڭىرەك ۇيگە قول جەتكىزەر ەدىك, دەيدى.

ۇلبوسىن يسابەك,

جۋرناليست

الماتى وبلىسى,

تالعار اۋدانى