جالاقى كوپ, ناتيجە جوق

سونىمەن قاتار تۇراقتى بىرىنشىلىكتە ەڭ جوعارى جالاقى الاتىن توپ-10 حوككەيشىنىڭ قاتارىندا انتون بۋرداسوۆ («تراكتور»), الەكساندر رادۋلوۆ («اك بارس»), ۆلاديمير ەدۋاردوۆيچ تكاچيوۆ («اۆانگارد», ۇشەۋىنىڭ دە جالاقىسى – 80 ملن رۋبل (478 ملن تەڭگە), دميتري ياشكين (سكا – 77 ملن رۋبل نەمەسە 460 ملن تەڭگە), ستەفان دا كوستا («اۆانگارد»), دامير جافياروۆ (سكا), الەكسەي مارچەنكو («لوكوموتيۆ»), ۆلاديمير الەكساندروۆيچ تكاچيوۆ («تراكتور») جانە ۆاديم شيپاچەۆ («اك بارس», تورتەۋىنىڭ دە جالاقىسى – 75 ملن رۋبل نەمەسە 448 ملن تەڭگە) بار.

رەسەيلىك باسىلىم ۇسىنعان جىلىنا ەڭ كوپ تابىس تاباتىن حوككەيشىلەر تىزىمىندە قازاقستان قۇراماسىنىڭ ەكى وكىلى بار ەكەن. ولار – ماسكەۋدىڭ تسسكا كلۋبىنىڭ نامىسىن قورعايتىن قورعاۋشى داررەن ديتس پەن «بارىس» كو­­مانداسىنىڭ شا­­­بۋىلشىسى ءارى كاپي­تانى نيكيتا مي­حايليس. كەيىنگى ەكى جىلدا تسسكا ساپىندا ونەر كور­سەتىپ, بىلتىر «گاگارين كۋبوگىن» جەڭىپ العان ءديتستىڭ ەسەپشوتىنا ماسكەۋ كومانداسى جىلىنا 70 ملن رۋبل (418 ملن تەڭگە) اۋدارادى. ال ەلوردانىڭ «بارىسى» ءوزىنىڭ ەڭ ۇزدىك سۇرمەرگەندەرىنىڭ بىرىنە 50 ملن رۋبل (298 ملن تەڭگە) كولەمىندە جالاقى تولەيدى. سونداي-اق استانالىق ۇجىمنىڭ تاعى ءبىر وكىلى, كانادالىق شابۋىلشى ليندەن ۆەي دە ءدال سونداي جالاقى الادى.

جىلىنا 20 ملن رۋبلدەن (120 ملن تەڭگە) كوپ جالاقى الاتىن 245 حوككەيشىنىڭ تىزىمىنە «بارىس» كلۋبى ساپىندا مۇزايدىنعا شىعاتىن تاعى بەس حوككەيشى ەنگەن. اتاپ ايتقاندا, كانادالىق شابۋىلشى مايكل شاپيۋ (26 ملن رۋبل نەمەسە 155 ملن تەڭگە), سلوۆاكيالىق قاقپاشى يۋليۋس گۋداچەك پەن امەريكالىق شابۋىلشى ەنتوني لۋيس (25 ملن رۋبل نەمەسە 149 ملن تەڭگە), كانادالىق قورعاۋشى دجەسسي گرەم (23 ملن رۋبل نەمەسە 137 ملن تەڭگە) جانە امەريكالىق شابۋىلشى دجەرەمي براككو (22 ملن رۋبل نەمەسە 131 ملن تەڭگە).

وسى ورايدا بيىلعى قۇرلىقتىق حوككەي ليگاسىنىڭ «شىعىس» كون­فەرەنتسياسىنداعى 66 ويىننىڭ تەك 27-سىندە عانا جەڭىپ, 61 ۇپايمەن كوش سوڭىندا قالىپ قويعان «بارىس» كلۋ­بىنىڭ ويىنشىلارى ءوز جالاقىلارىن ادال الىپ ءجۇر مە دەگەن سۇراق تۋىندايدى. ول ءۇشىن جوعارىدا اتى اتالعان حوككەيشىلەردىڭ ستاتيستيكاسىنا كوز جۇگىرتىپ كورەيىك.

ماسەلەن, «بارىس» قۇرامىن بيىلعى ماۋسىمدا تولىقتىرعان قاقپاشى يۋليۋس گۋداچەك كۇنى كەشەگە دەيىن تۇراقتى بىرىنشىلىك اياسىنداعى 42 ماتچقا قاتىسىپ, ءوز قاقپاسىنا 93 شايبا وتكىزىپ العان. ال گۋداچەكتەن الدەقايدا از جالاقى الاتىن نيكيتا بوياركيننىڭ قاقپاسىنان وزگە حوككەيشىلەر 31 ويىن­دا 65 مارتە ساڭىلاۋ تاپقان ەكەن. قاۋىپتى سوققىلاردى قايتارۋ (91.4 – 90,9) جانە سەنىمدى ويناۋ (2.46 – 2,58) جاعىنان بوياركيندە ازداعان باسىمدىق بايقالادى.

قورعاۋشى دجەسسي گرەم 64 ماتچتا مۇزايدىنعا شىعىپ, بىردە-ءبىر ويىندا شايبا سوعا الماعان. دەسە دە 19 گولدىڭ سوعىلۋىنا جاعداي جاساعان. ايتكەنمەن, ناتيجە كورسەتۋ جاعىنان قازاقستان حوككەيشىسى ءادىل بەكەتاەۆ قورعاۋشىلار اراسىندا كوش باستاپ تۇر. ول 62 ماتچتا ءۇش مارتە مەرگەندىگىمەن كوزگە ءتۇسىپ, 17 مارتە اسسيستەنتتىك جاساعان.

شابۋىلشىلار نيكيتا ميحايليس, ليندەن ۆەي, ەنتوني لۋيس جانە دجەرەمي براككو ستاتيستيكالىق كورسەتكىش بويىنشا ءبىر-ءبىرىنىڭ ءىزىن قۋىپ كەلەدى. 56 ماتچ­تا 18 شايبا سوعىپ, ارىپتەستەرىنە 22 مارتە ناتيجەلى پاس بەرگەن ۆەي مەرگەندەر كوشىن باستاپ تۇر. كەيىنگى ورىنعا د.براككو جايعاسقان. ول 59 ماتچتا 14 رەت نىسانانى ءدال كوزدەپ, 26 مارتە كوماندالاستارىنىڭ شايبا سوعۋىنا مۇمكىندىك جاراتىپ بەرگەن. نيكيتا ميحايليس 56 ويىندا 14 گول سوعىپ, 24 مارتە ءدال پاس بەرسە, لۋيس 56 ويىندا (9+21) 30 ۇپاي جيناعان.

ال جىلىنا 155 ملن, ايىنا 13 ملن تەڭگە شاماسىندا جالاقى الاتىن مايكل شاپيۋ ءبىر ماۋسىمدا بار-جوعى 10 ويىنعا قاتىسىپ, ءۇش مارتە مەرگەندىگىمەن كوزگە تۇسكەن ەكەن.

ايتا كەتەيىك, بەيرەسمي دەرەك بويىن­شا جىلىنا 10 ملرد تەڭگە كولەمىندە قارجى بولىنەتىن ەلوردانىڭ «بارىسى» قۇرلىقتىق حوككەي ليگاسىنىڭ بيىلعى ماۋسىمىندا «شىعىس» كونفە­رەن­تسياسىنىڭ تۋرنير كەستەسىندە ەڭ سوڭعى ورىندا قالىپ قويدى. قحل تاريحىندا «بارىس» بۇعان دەيىن ەشقاشان مۇنداي ساتسىزدىككە ۇشىراماعان.