ۇكىمەتتە كوكتەمگى ەگىس جۇمىستارىن قامتاماسىز ەتۋ شارالارى قابىلداندى, دەپ حابارلايدى Egemen.kz ۇكىمەتتى ءباسپاسوز قىزمەتىنە سىلتەمە جاساپ.
الداعى ناۋقانعا بارلىعى 140 ملرد تەڭگە قاراستىرىلعان. جەڭىلدەتىلگەن باعامەن 413 مىڭ توننا ديزەل وتىنى ءبولىندى. فورۆاردتىق ساتىپ الۋعا 20 ملرد تەڭگە جانە سۋبسيديالار تۇرىندە 87 ملرد تەڭگە قاراستىرىلعان.
«مەملەكەتتىك قولداۋ فەرمەرلەر تاراپىنان دا بەلگىلى ءبىر شارتتاردى ورىنداۋدى تالاپ ەتەدى. بۇل – اگروتەحنولوگيالاردى قاتاڭ ساقتاۋ جانە تىڭايتقىشتاردى ۋاقىتىلى قولدانۋ», دەپ اتاپ ءوتتى پرەمەر-مينيستر ءاليحان سمايىلوۆ.
ۇكىمەت باسشىسى رەسپۋبليكا بويىنشا تىڭايتقىشتاردى قولدانۋ كولەمى عىلىمي قاجەتتىلىكتىڭ نەبارى 26%-ىن قۇرايتىندىعىنا نازار اۋداردى. ال ەلدە تىڭايتقىش وندىرەتىن 12 زاۋىت جۇمىس ىستەيدى. مەملەكەت ءونىمدى ساتىپ الۋ ءۇشىن فەرمەرلەرگە سۋبسيديا بەرەدى.
ء«وندىرىستىڭ ءبارىن, ەڭ الدىمەن, وتاندىق نارىققا باعىتتاۋ قاجەت. ساراپشىلاردىڭ باعالاۋى بويىنشا مينەرالدى تىڭايتقىشتاردىڭ جەتكىلىكتى دەڭگەيدە سەبىلمەي قالۋىنان ءبىزدىڭ ديحاندارىمىز 10 ملن تونناعا جۋىق جوعارى ساپالى بيداي ءوندىرۋ مۇمكىندىگىنەن ايىرىلىپ وتىر. بۇل – جينالعان ءونىمنىڭ جارتىسىنا جۋىق», دەدى پرەمەر-مينيستر.
سونىمەن بىرگە توپىراقتىڭ توزۋى مەن ەگىس القاپتارىن ارامشوپتەردىڭ باسىپ كەتۋى دە ءونىمنىڭ ساپاسى مەن كولەمىنە كەرى اسەر ەتىپ وتىر. سۋدى كوپ قاجەت ەتەتىن داقىلداردىڭ القاپتارىن ازايتۋ تەتىكتەرى دۇرىس جولعا قويىلماي كەلەدى, فەرمەرلەر اراسىندا ءتۇسىندىرۋ جۇمىستارى دۇرىس جۇرگىزىلمەگەن. ولارعا جۇمىس جۇرگىزۋدىڭ باسقا, بالاما نۇسقالارى ۇسىنىلماعان.
وسىعان بايلانىستى پرەمەر-مينيستر اۋىل شارۋاشىلىعى مينيسترلىگىنە مۇددەلى مەملەكەتتىك ورگاندارمەن جانە ءوڭىر اكىمدىكتەرىمەن بىرلەسىپ وسى باعىتتاعى جۇمىستى كۇشەيتۋدى تاپسىردى.
جەڭىلدىكتى ديزەل وتىنىن ءبولۋ جۇمىستارى دا ەرەكشە باقىلاۋدا بولۋى ءتيىس.
«الىپ-ساتۋ مەن قولدان جاسالعان تاپشىلىققا جول بەرمەۋ كەرەك. بولىنگەن ديزەل وتىنىن باسقا جاققا «جاسىرىن ساتاتىن» وپەراتورلارعا بارىنشا قاتاڭ شارا قولدانۋ كەرەك», دەدى ءاليحان سمايىلوۆ.