جاراتۋشى جەر بەتىنە جىبەرگەن ءار پەندەنىڭ كوڭىل تۇكپىرىنە ادام بولۋدىڭ قاسيەتتەرىن شەگەلەپ بەرەدى دەسەدى. اقىن اباي ايتپاقشى, «ىستىق قايرات, نۇرلى اقىل, جىلى جۇرەك» – وسى ءۇش قاسيەت جۇمىر باستى تىرشىلىك يەسىنىڭ ءومىر بويى ۇمتىلاتىن ميسسياسى بولۋعا ءتيىس. قالامساپ – ءومىردى قالاي باعىتتاساڭ, عۇمىردىڭ ءتۇتىنى سولاي تۇزىلەدى ەمەس پە. جەر بەتىندە ادام بولىپ تۋ جەتكىلىكسىز.
وبلىستىق س.تورايعىروۆ اتىنداعى كىتاپحانادا قازاقستان جازۋشىلار وداعىنىڭ مۇشەسى, جۋرناليست, mazhab.kz پورتالىنىڭ رەداكتورى امانتاي تويشىباي ۇلىنىڭ «ادام بول» كىتابىنىڭ تۇساۋى كەسىلدى. تاربيەلىك-پسيحولوگيالىق كىتاپ عيبراتتى اڭگىمەلەر مەن ءومىردىڭ وزىنەن الىنعان ماعىنالى مىسالداردان تۇرادى. قىسقا دا نۇسقا اڭگىمەلەرى تۇسىنە بىلگەن جانعا وي سالاتىنى حاق. مۇندا الەم جاۋھارلارىنىڭ حالقىمىزدىڭ ۇلتتىق مەنتاليتەتىنە بەيىمدەپ اۋدارىلعان نۇسقالارى, ۇلىلاردىڭ ءسوز مارجاندارى تەرىلىپ جازىلعان.
– ەسەيە كەلە سۋ استىنداعى ۇلۋ قۇساپ تىنىش قانا ءومىر سۇرەسىڭ بە, الدە قىران بۇركىتتەي قيادا قالىقتايسىڭ با, ادام ءومىرىنىڭ الدىندا ەكى تاڭداۋ تۇرادى. ارينە, ادام بولىپ قالىپتاسۋدا مەيىرىمدىلىك, ماحاببات, سۇيىسپەنشىلىك, كەشىرىم, سابىرلىلىق, توزىمدىلىك, تاباندىلىق, سانالىلىق, پاراساتتىلىق قاسيەتتەرىن ءسىڭىرۋ ابدەن ماڭىزدى. ەگەر بۇل قابىلەتتەر پەندەگە جاستايىنان دارىماسا, ەلىم, جەرىم دەگەن ازامات قايدان شىقپاق؟ اتا-بابالارىمىز ات جالىن تارتۋعا جاراپ قالعان ۇلانداردى وسىعان تاربيەلەگەن. «ادام بولۋ» دەگەن نە؟ ول – ءوز بويىنداعى بارلىق مىنەز-قۇلقىڭ مەن ءىس-ارەكەتىڭدى جەكە جاۋاپكەرشىلىگىنە الۋ دەگەن ءسوز. سابىرسىزدىق پەن جالقاۋلىعىڭدى, توزىمسىزدىگىڭدى وزگەدەن كورۋگە بولمايتىنىن قۇلاققا ءسىڭىرىپ وسسەڭ عانيبەت. بۇل كىتابىم, پەداگوگتەر مەن پسيحولوگتەرگە, ۇل-قىز اسىراپ وتىرعان اتا-انالارعا, مەكتەپتىڭ جوعارى سىنىپ وقۋشىلارى مەن ستۋدەنتتەرىنە نەعۇرلىم پايدالى بولار دەگەن ۇمىتتەمىن, – دەيدى اۆتور.
امانتاي تويشىباي ۇلى مونعوليانىڭ بايان-ولگەي ايماعىندا تۋىپ-ءوسىپ, تاۋەلسىزدىكتەن كەيىنگى ۇلى كوشتىڭ الدىڭعى لەگىندە اتامەكەنىنە شالقىعان قۋانىشپەن جەتكەن ازاماتتىڭ ءبىرى. انا تىلىمەن قاتار, اعىلشىن, نەمىس, قىتاي, ورىس, مونعول تىلدەرىن جەتىك مەڭگەرگەن. شەتەل تىلىندەگى نەبىر عيبراتتى دۇنيەلەردى ءوزىمىزدىڭ ۇلتتىق سالت-داستۇرگە ورايلاستىرا اۋدارىپ, الەۋمەتتىك جەلىدەگى پاراقشالارىنا قيسىندى مىسالدار, قىسقا اڭگىمەلەردى تۇراقتى جاريالاپ تۇراتىن جازۋشى-بلوگەر رەتىندە دە تانىمال. وسى ۋاقىتقا دەيىن توعىز كىتاپ شىعارىپ, رۋحاني-ادامگەرشىلىك تاربيەدەن بولەك, تاريحي زەرتتەۋلەرگە دە قالام وزدىردى. بۇل كىتاپتاردىڭ بارلىعى ءبىرىن-ءبىرى تولىقتىرىپ وتىراتىنى بايقالادى. ەڭ العاشقى كىتابى وتانشىلدىق, اتاجۇرت, ءتىل تاقىرىبىندا 1999 جىلى جارىق كورگەن قالامگەر بۇگىندە جازعان ەڭبەكتەرىنىڭ ناتيجەسىندە فيلولوگيا عىلىمدارىنىڭ كانديداتى اتاندى.
شارا بارىسىندا «اقساقالدار تاعىلىمى» ۇيىمىنىڭ توراعاسى ەرمەك جۇماتوۆ پەن اقىن, رەسپۋبليكاعا تانىمال باتاگوي اقساقال بالتاباي سىزدىقوۆ كىتاپتىڭ تۇساۋىن كەستى.
پاۆلودار