ازەربايجاننىڭ باس شاھارى – باكۋدە باتۋتتاعى گيمناستيكادان الەم كۋبوگىنىڭ العاشقى كەزەڭى ءوز مارەسىنە جەتتى. دۇنيە ءجۇزىنىڭ 16 ەلىنەن كەلگەن 60 گيمناست شەبەرلىك بايقاسقان جارىستا قازاقستان قۇراماسىنىڭ وكىلدەرى باق سىنادى.
جىلداعى ءداستۇر بويىنشا باكۋدەن باستاۋ العان الەم كۋبوگىنىڭ ءبىرىنشى كەزەڭى جەرلەستەرىمىز ءۇشىن وتە ءساتتى ءوتتى. كاسپي تەڭىزىنىڭ جاعالاۋىندا جالاۋى جەلبىرەگەن دودادا قازاقستان سپورتشىلارى ەكى التىن مەدال جەڭىپ الدى. الدىمەن جەكەلەي سىندا جارىس جولىنا شىققان وتانداسىمىز دانيل مۇساباەۆ 59,240 ۇپاي جيناپ, الەم كۋبوگىنىڭ جەڭىمپازى اتاندى. د.مۇساباەۆ بىلتىر ءدال وسى باكۋدە وتكەن باسەكەدە قولا جۇلدەنى قاناعات تۇتقان بولاتىن. يسپانيالىق حورحە مارتين (58,530) مەن فرانتسيالىق اللان مورانتە (58,270) ەكىنشى جانە ءۇشىنشى ورىنداردى ءوزارا ءبولىستى.
سونداي-اق جۇپتىق سايىستا باق سىناعان دانيل مۇساباەۆ پەن پيرمامماد اليەۆ سينحروندى سەكىرۋدە تۇعىردىڭ ەڭ بيىك ساتىسىنان كورىنىپ, باكۋ تورىندە ءانۇرانىمىزدى شىرقاتتى. ولار فينالدا 51,940 ۇپاي جينادى. بۇل سىندا كۇمىس جۇلدەگە گەرمانيالىق سپورتشىلار (51,080 ۇپاي) قول جەتكىزسە, پورتۋگاليالىقتار (50,730) ۇزدىك ۇشتىكتى تۇيىندەدى. وسىلايشا, قازاقستان قۇراماسى الەم كۋبوگى كەزەڭىندە 2 التىن جۇلدە يەلەندى.