ەلورداداعى «Qazaqstan» جەڭىل اتلەتيكا كەشەنىندە ۇلتتىق عىلىمي پراكتيكالىق دەنە تاربيەسى ورتالىعىنىڭ ۇيىمداستىرۋىمەن «سپورت عىلىمى نەگىزىندە وقىتۋ ادىستەرى» اتتى حالىقارالىق سەمينار ۇيىمداستىرىلدى. ەكى كۇنگە جالعاسقان ساباقتا جاپونيانىڭ يوكوگاما توين ۋنيۆەرسيتەتى سپورت عىلىمدارى جوعارى مەكتەبىنىڭ پروفەسسورى تومونوبۋ ساكۋراي ەلىمىزدىڭ ءار وبلىسى مەن قالاسىنان كەلگەن جاتتىقتىرۋشىلارعا, نۇسقاۋشىلارعا, ادىسكەرلەر مەن دەنە شىنىقتىرۋ پەداگوگتەرىنە ءدارىس وقىدى.
«سپورتقا عىلىمي كوزقاراس, عىلىمي تالداۋلار مەن زەرتتەۋلەردى جاپونيالىق عالىمداردان ۇيرەنۋدى دۇرىس دەپ ەسەپتەيمىن. وسى باعىتتا ەلىمىزدەگى دەنە شىنىقتىرۋ جانە سپورت سالاسى ماماندارى ءۇشىن قۇندى ءبىلىم كوزى بولادى دەگەن نيەتپەن تومونوبۋ ساكۋرايدى استاناعا شاقىرتىپ وتىرمىز», دەدى ۇلتتىق عىلىمي پراكتيكالىق دەنە تاربيەسى ورتالىعىنىڭ باس ديرەكتورى ساعدات سادىقوۆ.
جاپونيا سپورتشىلارىنىڭ حالىقارالىق جارىستاردا جوعارى جەتىستىككە جەتۋىنە ءوز ۇلەسىن قوسىپ جۇرگەن تومونوبۋ ساكۋراي – يوكوگاما توين ۋنيۆەرسيتەتى سپورت عىلىمدارى جوعارى مەكتەبىنىڭ پروفەسسورى, دەنە شىنىقتىرۋ جانە سپورت سالاسىنداعى عىلىمي-زەرتتەۋلەر جونىندەگى جاپونيا قوعامىنىڭ ديرەكتورى, جاپونيانىڭ فيزيولوگيالىق قوعامى جانە جاپونيا دەنە شىنىقتىرۋ جانە سپورت مەديتسيناسى قوعامى كەڭەسىنىڭ مۇشەسى, دەنە شىنىقتىرۋ جانە سپورتقا ارنالعان وقىتۋ عىلىمى جۋرنالىنىڭ باس رەداكتورى.
ايگىلى عالىم سەمينارىنا قاتىسقان 100-گە جۋىق سالا مامانىنا بالالارعا قالاي دەنە شىنىقتىرۋمەن دۇرىس شۇعىلدانۋدى ۇيرەتۋگە جانە قىزىقتىرۋعا بولاتىنىن عىلىمي-زەرتتەۋلەرى ارقىلى جەتكىزدى. سونداي-اق ول بالالاردىڭ دەنە فيزيولوگياسىنىڭ دامۋىنا قاراي قانداي جاتتىعۋلارعا ءمان بەرۋ كەرەگىن مىسالمەن ءتۇسىندىردى. بۇل قاتاردا ءار سپورت تۇرىندەگى وليمپيادا جانە الەم چەمپيوندارىنا جۇرگىزىلگەن زەرتتەۋلەر بار.
«دەنە شىنىقتىرۋ پانىنە كەلگەندە عىلىمي بازا بولسا, تاربيە جۇمىسىن جۇرگىزۋ وڭاي. جالپى, سپورتتى دامىتۋدىڭ دا باستى جولى وسىندا جاتىر. قازىر سپورت پەن عىلىم جىلدام دامىپ جاتقانىن بىلەمىز. مەنىڭ قازىرگى زەرتتەۋلەرىم مەن ستاتيستيكام ەكى وليمپيادا اراسىن قامتيدى. بۇل جوبا مەنىڭ 4-5 جىل بويعى ەڭبەگىم دەۋگە بولادى. دەسە دە, دەنە شىنىقتىرۋعا كەلگەندە نەگىزگى زەرتتەۋ وزگەرمەيدى», دەيدى جاپونيالىق عالىم.
تاعىلىمى مول سەمينارعا قاتىسىپ, دەنە شىنىقتىرۋ سالاسىنداعى ءبىلىمىن تولىقتىرعان ورال قالاسى ءبىلىم بەرۋ ءبولىمىنىڭ دەنە شىنىقتىرۋ پاندەرى ادىسكەرى تاراس قۋانعاليەۆ جاپونيا سياقتى سپورتتى عىلىمي تۇرعىدان دامىتقان ەلدەردىڭ تاجىريبەسىنە قانىقسام دەگەن ويى ورىندالعانىن ايتادى.
«30 جىلعا جۋىق جەكە ءوزىمنىڭ ءىس-تاجىريبەمدە قولدانىپ الايدا عىلىمي تۇرعىدان دالەلىن بىلگىم كەلىپ جۇرگەن ءبىرشاما تەحنيكالار جاپوندىق پروفەسسوردىڭ اۋزىنان تولىقتاي راستالعاندا ءوزىم شىنىمەن قۋاندىم. سەبەبى بۇل تەحنيكالار كەڭەستىك ادىستەمەمەن ءبىلىم العان بىزدەرگە مۇلدەم كەرەعار ەدى. جالپى, جاپوندىق ادىستەمەلەر كەڭەستىك ادىستەمەدەن ءبىرشاما بولەك, ءتىپتى كەيبىر نارسەلەر قاراما-قايشى ەكەندىگىنە كوز جەتكىزدىم», دەدى ول.
ەكى كۇنگە سوزىلعان رەسپۋبليكالىق سەمينار سپورتتى دامىتۋ ديرەكتسياسىنىڭ ديرەكتورى ورالباي جاقسىمبەتوۆتىڭ قولداۋىمەن وتكەنىن اتاپ كورسەتكەن ءجون.