استانا. 20 ماۋسىم. بۇگىن تاڭ الدىندا ناتالدىڭ «ارەنا داس دۋناس» ستاديونىندا اياقتالعان جاپونيا مەن گرەكيا قۇرامالارىنىڭ كەزدەسۋىندە الەم چەمپيوناتىنداعى ءتورتىنشى تەڭ ويىن جانە ەكىنشى 0:0 دەگەن ەسەپ تىركەلدى. بۇل تۋرالى egemen.kz حابارلادى.
جاپونيا – گرەكيا 0:0.
20 ماۋسىم. ناتال. «ارەنا داس دۋناس» ستاديونى. 39 485 كورەرمەن. تورەشى – حوەل اگيلار (سالۆادور).
جاپونيا: ەيدزي كاۆاسيما, اتسۋتو ۋتيدا, مايا يوسيدا, ياسۋيۋكي كوننو, يۋتو ناگاتومو, حوتارۋ ياماگۋتي, ماكوتو حاسەبە (ياسيحيتو ەندو, 46), سيندزي وكادزاكي, كەيسۋكە حوندا, ەسيتو وكۋبو, يۋيا وساكو (سيندزي كاگاۆا, 57).
گرەكيا: ورەستيس كارنەزيس, ۆاسيليس توروسيديس, كوستاس مانولاس, سوكراتيس پاپاستاتوپۋلوس, حوسە ولەباس, ياننيس فەتفاتسيديس (گەورگيوس كراگۋنيس, 41), ياننيس مانياتيس, كوستاس كاتسۋرانيس, پانايوتيس كونە (ديميتريوس سالپينگيديس, 81), گەورگيوس ساماراس, كوستاس ميتروگلۋ (تەوفانيس گەكاس, 35).
ەسكەرتۋلەر: ماكوتو حاسەبە (12) – كوستاس كاتسۋرانيس (27), گەورگيوس ساماراس (55), ۆاسيليس توروسيديس (89).
قۋىلۋ: كوستاس كاتسۋرانيس (38).
ءبىرىنشى تۋردا ۇتىلىستا ۇشىراعان ەكى كوماندانىڭ بۇل كۇنگى جەكپە-جەگى ونشالىقتى تارتىمتى بولا قويعان جوق. مۇنداعى ماسەلە ءتىپتى قاقپالارعا دوپ تۇسپەگەنىندە عانا ەمەس. دەگەنمەن, جاپونداردى دا, گرەكتەردى دە تارتىنىپ وينادى دەپ كەسىپ ايتا الماساق كەرەك. بىزدىڭشە, ەكى جاق تا قولدارىنان كەلگەندەرىن ىستەپ باققان سياقتى. بىراق سوندا دا ويىن سۇرەڭسىزدەۋ بولىپ ورنەك ءتۇزدى. ايتپەسە وسى كەزدەسۋدەگى جەڭىس سامۋرايلارعا دا, ەللادالىقتارعا دا اۋاداي كەرەك ەدى.
كوماندالار وزدەرىنىڭ ويىن سورەدەن شىققان كەزەڭىن بارىنشا مۇقيات وتكىزدى. قارسىلاستار سول ابايلاپ باسقان قيمىل-ارەكەتتىڭ بارىسىندا ءبىر-بىرلەرىنىڭ ايىپ الاڭدارىنا بىرنەشە رەت باسا-كوكتەپ كىرىپ تە جاتتى. الايدا, ۇجىمدارعا بۇدان ءتيىمدى قورىتىندى شىعارۋدىڭ رەتى كەلە قويمادى. سونداي جورىقتاردىڭ بىرىندە گرەكتەرگە بۇرىشتاما بەرۋدىڭ ءساتى ءتۇستى. ايتكەنمەن, دوپقا جالپى جاپوندار كوبىرەك ەگەلىك ەتتى. البەرتو دزاككەرونيدىڭ شاكىرتتەرى ويىن تىزگىنىن ءوز قولدارىنا الىپ العاندارىمەن, ولارعا قارسى جاقتىڭ تىعىز تۇرعىزىلعان قورعانىس دۋالدارىنان ارى قاراي اتتاپ ءوتۋ وڭايعا سوقپادى. ال گرەكتەر «ساتتىلىك كىلتىن» كوبىنە قارسى شابۋىلداردان ىزدەپ تۇردى. سولاردىڭ بىرىندە ەجەلگى ەللادالىقتاردىڭ ۇرپاقتارى ەسەپ اشىپ تا كەتە جازدادى. ول پانايوتيس كونەنىڭ جولدان ءىلىپ اكەتكەن دوبىمەن الاڭ ورتاسىنان اعىپ ءوتىپ كەلىپ, شامامەن 25 مەتر جەردەن داربازاعا دىقاتتاپ سوققى جاساۋىمەن كورىنىس بەردى. بىراق قاقپاشى ەيدزي كاۆاسيما مۇنداي سوققىنى قابىلداۋعا ءازىر بولىپ شىقتى. كوپ ۇزاماي گرەكتەر قاۋىپتى تۇستان قاقپاعا قاراي ايىپ دوبىن ۇرۋ مۇمكىندىگىنە دە قول جەتكىزدى.
تايمنىڭ ەكۆاتورىنا تايانعان تۇستا جاپوندار تىزگىندى قايتادان وزدەرىنە قاراي تارتىپ اكەتتى. ولاردىڭ بۇل ارەكەتتەرىنە وسىدان كەيىن گرەكتەردىڭ كوماندا كاپيتانى كوستاس كاتسۋرانيستىڭ ەكىنشى مارتە «سارى قاعاز» الۋ ارقىلى الاڭنان قۋىلىپ كەتۋى وتقا ماي قۇيعانداي اسەر ەتتى. وسىدان كەيىن كۇنشىعىس ەلىنىڭ ۇلاندارى وزدەرىنە اسا كەرەكتى جەڭىستى ج ۇلىپ اكەتۋ ءۇشىن ايانىپ قالعان جوق. بۇعان گرەكيا فۋتبولشىلارى ساۋاتتى قورعانا وتىرىپ, ۇدايى قاۋىپتىڭ بۇلتىن ءوز ايىپ الاڭدارى ماڭىنان قاشىقتاتىپ تۇرۋعا بارىنشا كۇش سالۋمەن جاۋاپ قايتاردى.
كەزدەسۋدىڭ ەكىنشى بولىگىندە دە وسى ويىن ءوزىنىڭ جالعاسىن تاپتى. ونىڭ العاشقى مينۋتتارىنان ويىنشىلارىنىڭ سانى ارتىق جاپونداردىڭ كوپ كۇشپەن شابۋىلعا شىعىپ تۇراتىنى, ال گرەكتەردىڭ تاسقامال قورعانىسقا تىرەك ارتا وتىرىپ, سيرەك بۇرق ەتە قالاتىن قارسى شابۋىلدارعا سۇيەنەتىنى بەلگىلى بولىپ قالدى. سونىڭ پاتىندە سامۋرايلار جاپپاي جورىققا باس قويدى. الايدا, ولاردىڭ شابۋىلدارىندا وتكىرلىك پەن تاپقىرلىق جەتىسپەي جاتتى. كىل بىروڭكەي جۇيەمەن ۇرعان تاسقىننىڭ بەتىن قايتارۋ سوندىقتان ەللادالىقتارعا تىم قيىنعا سوققان جوق. مۇنى از دەسەڭىز, گرەكتەر قارسى شابۋىلداردى دا ءجيى قولدانىپ تۇردى. سونداي ساتتەردىڭ بىرىندە ولار قاتارىنان ءۇش رەت بۇرىشتاما دوبىن بەردى. فەرناندۋ سانتۋشتىڭ شاكىرتتەرى سول ىرعىندا كاۆاسيما قورعاعان قاقپانى قاقىراتىپ وتۋگە دە ءسال قالدى.
جاپوندار تايمنىڭ ورتاسىندا عانا ويىندى تەڭەستىرىپ, قىسىم جاساۋىن قايتا جالعاستىرا باستادى. بىراق قارسى جاقتىڭ وتە ۇيلەسىمدى تۇرعىزىلعان قورعانىس شەبىن سەتىنەتىپ وتۋگە اقىرى شامالارى كەلمەدى.
دامير قوجامقۇل.
دەرەككوز: چەمپيونات.رۋ.
فوتو:Sportbox.ru.