ەلوردادا 18 اقپان كۇنى Tartyl Fest رەسپۋبليكالىق ءتۋرنيرىنىڭ گراند-فينالى وتەدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
بۇل تۋرنير قر پرەزيدەنتى جانىنداعى «DARA» تالانتتاردى قولداۋ قورىنىڭ باستاماسىمەن ۇيىمداستىرىلعان. جوبا يدەياسىن بەلگىلى قازاقستاندىق پروديۋسەر نۇرلان قويانباەۆ ۇسىنعان, ال جوبانىڭ برەند-ەلشىسى – «Street Workout» بويىنشا رەكوردسمەن ايتىم جاقىپوۆ.
گراند-فينالعا وڭىرلىك ىرىكتەۋ جارىستارىندا ۇزدىك ناتيجە كورسەتكەن 170 سپورتشى قاتىسادى. قاتىسۋشىلاردىڭ جاسى – 14-51 جاس ارالىعىندا.
وتكەن جىلى تۋرنيككە تارتىلۋدان جارىس قازاقستاننىڭ 20 قالاسىندا وتكەن. وندا 7 مىڭنان استام قازاقستاندىق توعىز سالماق دارەجەسىندە سايىسقا ءتۇستى. تارتىلۋ سانى بويىنشا رەكورد 33 جاستاعى تارازدىق ەۆگەنيگە تيەسىلى – ول 50 رەت تارتىلعان.
نۇرلان قويانباەۆ Tartyl Fest رەسپۋبليكالىق ءتۋرنيرىنىڭ تالانتتاردى ىزدەۋ مەن ءوزىن-ءوزى تانىتۋ مۇمكىندىگىندەگى ماڭىزىن اتاپ ءوتتى. بۇل «DARA» قورى ۇيىمداستىرعان العاشقى جوبا جانە ول راسىندا دا حالىققا كەڭ تاراپ, مەملەكەت باسشىسىنىڭ بۇقارالىق سپورتتى دامىتۋ مىندەتتەرىن ىسكە اسىرۋدىڭ تابىستى ۇلگىسى بولدى.
Tartyl Fest اقتىق سايىسى 2023 جىلدىڭ 18 اقپانىندا EXPO اۋماعىنداعى كونگرەسس ورتالىقتا ساعات 12:00-دە باستالادى. جارىس «Jibek Joly» تەلەارناسىنىڭ تىكەلەي ەفيرىندە كورسەتىلەدى.
گراند-فينالدىڭ جالپى جۇلدە قورى – 54 ملن تەڭگە. وندا ءبىرىنشى ورىن جەڭىمپازى 3 ملن تەڭگە الادى, ەكىنشى ورىن ءۇشىن سىياقى - 2 ملن تەڭگەنى, ءۇشىنشى ورىن ءۇشىن 1 ملن تەڭگەنى قۇرايدى.
سونىمەن قاتار گراند-فينال چەمپيوندارى Street Workout بويىنشا الەم چەمپيوناتىندا قازاقستان اتىنان سايىسقا تۇسە الادى.