قۇرلىقتىق حوككەي ليگاسىندا (قحل) وينايتىن ەلوردانىڭ «بارىسى» ءوز ايدىنىندا مينسكىنىڭ «ديناموسىنان» جەڭىلىپ, جارىستىڭ پلەي-وفف كەزەڭىنە شىعۋ مۇمكىندىگىنەن ايىرىلدى.
وسىلايشا, اندرەي سكابەلكا شاكىرتتەرى قحل تاريحىندا ءۇشىنشى مارتە «گاگارين كۋبوگىنىڭ» پلەي-وفف كەزەڭىنە شىعا المادى. «بارىس» ويىنشىلارى بۇعان دەيىن 2015/2016 جىلعى ماۋسىمدى – توعىزىنشى, 2017/2018 جىلعى ماۋسىمدى 10-ورىنمەن اياقتاپ, ۇزدىك سەگىزدىكتىڭ قاتارىنان تىس قالعان ەدى. بيىلعى تۇراقتى بىرىنشىلىكتە «بارىس» حوككەيشىلەرى 64 ماتچتان كەيىن 59 ۇپاي جيناپ, «شىعىس» كونفەرەنتسياسىنىڭ سوڭىندا كەلەدى (11-ورىن). ماۋسىمنىڭ اياقتالۋىنا ءالى ءتورت تۋر بار. بىراق «بارىس» ءۇشىن ەندى بۇل ويىنداردىڭ ەش ماڭىزى جوق.
«بارىس ارەنا» مۇز سارايىندا مينسكىنىڭ «ديناموسىمەن» وتكەن ماتچتا «بارىس» حوككەيشىلەرى قارسىلاستارىنان 5:2 ەسەبىمەن جەڭىلىپ قالدى. بۇل ماتچتا قوناقتار ساپىنان رايان سپۋنەر مەن رومان گوربۋنوۆ ءدۋبلدىڭ اۆتورلارى اتانسا, نيك مەركلي ءبىر مارتە مەرگەندىگىمەن كوزگە ءتۇستى. ال ايدىن يەلەرىنەن نيكيتا ميحايليس پەن ليندەن ۆەي دالدىك تانىتتى.