ENRC قۇرامىنا قارايتىن (ERG ەنشىلەس كومپانياسى) «قازحروم» تۇك «اق فيليالى – اقسۋ فەرروقورىتپا زاۋىتىندا جۇمىسشىلاردىڭ كاسىبي شەبەرلىگىن كورسەتە الاتىن «ۇزدىك جاس جۇمىسشى» اتتى ەرەكشە بايقاۋ ءوتتى. بايقاۋدا ەلىمىزدىڭ جانە رەسەيلىك جاس ماماندار ءوز ماماندىقتارى بويىنشا سىنعا ءتۇستى.
نەگىزىندە, بۇل بايقاۋعا قاتىسۋشىلاردىڭ بارلىعى دا كومپانيانىڭ اقسۋ جانە اقتوبە فەرروقورىتپا زاۋىتتارىنىڭ, ءدوڭ, جايرەم كەن بايىتۋ كومبيناتتارىنىڭ, «قازمارگانەتس» كەن باسقارماسىنىڭ, سونداي-اق, رەسەيدىڭ سەروۆ فەرروقورىتپا زاۋىتىنىڭ كاسىپورىندارىندا وتكەن وڭىرلىك ىرىكتەۋ كەزەڭدەرىنىڭ جەڭىمپازدارى. ال, وندىرىستىك بىلىكتىلىك جارىستارى 5 ماماندىق تۇرلەرى بويىنشا وتكىزىلدى. ءوز ماماندىقتارىنىڭ بىلگىرى اتانۋ ءۇشىن قىرناۋشىلار, ەلەكتر-گازبەن دانەكەرلەۋشىلەر, ەلەكتر كوپىرلى كران ماشينيستەرى, ەلەكترمونتەرلەر ءوزارا جارىستى. جاس جۇمىسشى جاستار تەوريالىق بىلىمدەرى مەن تاجىريبەلىك بىلىكتىلىكتەرىنىڭ جوعارى دەڭگەيىن كورسەتتى.
– ەلباسى ءبارىمىزدى, قازاقستاندىقتاردى جالپىعا ورتاق ەڭبەك قوعامىن قۇرۋعا شاقىردى. ماقسات – جۇمىسشى ماماندىقتارىنا دەگەن قۇرمەتتى قايتا جانداندىرۋ, جۇمىس ادامىنىڭ ابىرويىن كوتەرۋ. ال, ءبىز وتكىزگەن جۇمىسشى ماماندىقتارىنا ارنالعان بۇل بايقاۋلار جاستاردىڭ ەڭبەك جولدارىنىڭ قالىپتاسۋىنا, وندىرىستە ءارى قاراي ءوز جولدارىن تابۋلارىنا مۇمكىندىك بەرەدى, – دەپ اتاپ ءوتتى «قازحروم» تۇك» اق پرەزيدەنتى ۆيكتور تيل.
ال قۇرامىندا ءدوڭ كەن بايىتۋ كومبيناتى (اقتوبە وبلىسى, حرومتاۋ ق.), «قازمارگانەتس» كەن باسقارماسى (قاراعاندى وبلىسى), اقسۋ (پاۆلودار وبلىسى) جانە اقتوبە فەرروقورىتپا زاۋىتتارى بار الىپ «قازحروم» فەرروقورىتپا ءوندىرىسى, حروم, مارگانەتس كەنىن ءوندىرۋ بويىنشا الەمدە كوشباسشى بولىپ تابىلادى. الىپ كومپانيادا 18 577 ادام جۇمىس جاساۋدا. سونىمەن, بايقاۋ بارىسىندا اقسۋ فەرروقورىتپا زاۋىتىنىڭ وكىلدەرى, ياعني قىرناۋشى دەنيس كوۆالەۆ, ەلەكتر-گازبەن دانەكەرلەۋشى ۆالەري ماكسيموۆ, كوپىرلى كران ءماشينيسى ليديا كوچۋبەي كوزگە ءتۇستى. ەلەكترمونتەرلەر اراسىندا ءدوڭ كەن بايىتۋ كومبيناتىنىڭ جۇمىسشىسى قانات ۋرازمۋرزين, ال, شەبەرلەردىڭ ەڭبەك جارىسىندا ءدوڭنىڭ جۇمىسشىسى جاسۇلان جاۋلىباەۆ, ارتەم بەلكين (سەروۆ فەرروقورىتپا زاۋىتى) جەڭىپ شىقتى.
وندىرىستىك بايقاۋ جەڭىمپازدارى مەن جۇلدەگەرلەرى ديپلومدارمەن جانە اقشالاي سىيلىقتارمەن ماراپاتتالدى.
فاريدا بىقاي,
«ەگەمەن قازاقستان».
پاۆلودار وبلىسى,
اقسۋ قالاسى.