اتىراۋ وبلىسىندا بىلتىردان بەرى «تەڭىز» كەن ورنىنان جۇمىسشىلار بوساتىلىپ جاتىر. سەبەپ – جالپى قۇنى 45 ملرد دوللاردى قۇراعان كەلەشەك كەڭەيۋ جانە ۇڭعى ەرنەۋىندەگى قىسىمدى باسقارۋ جوبالارىن ىسكە اسىرۋدىڭ سوڭعى مەجەسىنە جاقىنداۋى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆتىڭ ايتۋىنشا, «تەڭىزدەن» بوساتىلعانداردىڭ اراسىندا تەك قازاقستاندا عانا ەمەس, شەتەلدەردەگى كومپانيالاردا جۇمىس ىستەۋگە نيەت بىلدىرگەندەر بار. ماسەلەن, 10 ادام رەسەي فەدەراتسياسىنداعى «تاتنەفت» كومپانياسىنا جۇمىسقا ورنالاسقان. ال «ۆەلەسستروي» كومپانياسى بىلىكتى مامانداردى رەسەيگە, «شليۋمبەرجە لودجەلكو» جۇمىسشىلاردى وزبەكستان رەسپۋبليكاسىنا جۇمىس ىستەۋگە جىبەرگەن.
ارينە شەتەلگە بارىپ, ماماندىعىنا سايكەس جۇمىس تابۋ وڭاي ەمەس. دەسەك تە, ىرگەدەگى كورشىلەس ەلدەرگە ەمەس, ۇشقان قۇستىڭ قاناتى تالاتىن الىستاعى ۋرۋگۆايعا كاسىبىنەن ءناسىپ تابۋعا بارعان اتىراۋلىقتار از ەمەس. سولاردىڭ ءبىرى – ايمۇرات الدوڭعار ۇلى.
ونىڭ ماماندىعى – وقشاۋلاۋشى. ءبىر قاراعاندا, بۇل قاتارداعى كوپ ماماندىقتىڭ ءبىرى سانالادى. بىراق ءىرى جوبالارعا وسى كاسىپتى مەڭگەرگەندەر اۋاداي قاجەت-اق. ءدال وسى ماماندىقتى جەتىك مەڭگەرگەن ايمۇرات الدوڭعار ۇلى بۇرىن بىرنەشە جىل «تەڭىز» كەن ورنىندا جۇمىس ىستەگەن. الايدا جوبانىڭ اياقتالۋىنا بايلانىستى جۇمىستان بوساتىلعان. بىراق ءوز ءىسىنىڭ قىر-سىرىن بىلەتىن مامان قول قۋسىرىپ وتىرماي, جان-جاقتان جۇمىس ىزدەي باستاعان. ءتىپتى شەتەلدەگى تانىستارىمەن بايلانىس ورناتقان.
– ۋرۋگۆاي ەلىندەگى دۋراسنو قالاسىنىڭ ماڭىندا جاڭا زاۋىتتىڭ قۇرىلىسى ءجۇرىپ جاتىر. سول زاۋىتتىڭ قۇرىلىسىندا وقشاۋلاۋشى ماماندىعىمەن جۇمىس ىستەپ جۇرگەن تانىستارىم بار. سولار ارقىلى جاڭا زاۋىت قۇرىلىسىن جۇرگىزىپ جاتقان كومپانياعا تۇيىندەمە جىبەرگەن ەدىم. كوپ ۋاقىت وتپەي, كومپانيادان جۇمىسقا شاقىرتۋ كەلدى. مۇنى وزىمە بەرىلگەن مۇمكىندىك رەتىندە قاراستىرىپ, كوپ ويلانباستان, ۋرۋگۆايعا بارۋعا جينالدىم. ويتكەنى كومپانيا ماعان سەنىم ارتىپ وتىر. بۇعان «تەڭىز» كەن ورنىندا جيناعان تاجىريبەمنىڭ سەپتىگى تيگەنىن جاسىرمايمىن. جول بيلەتى مەن قۇجاتتاردى رەتتەۋگە جۇمسالعان شىعىندى كومپانيا كوتەرىپ الدى, – دەيدى ايمۇرات الدوڭعار ۇلى.
قازىر ونىمەن بىرگە ليتۆالىقتار, شۆەدتەر جۇمىس ىستەيدى. شەتەلدەگى جۇمىسىنىڭ «تەڭىز» كەنىشىندەگى جوبادان ايىرماشىلىعى كوپ. بۇرىن «تەڭىزدە» تۇسكى ۇزىلىسكە بەرىلەتىن ۋاقىت ۇزاقتاۋ بولعان. ءتىپتى اراسىندا شاي ىشۋگە رۇقسات بەرىلەتىن. ال دۋراسنو قالاسىنداعى زاۋىت قۇرىلىسىندا تالاپ ءدال مۇنداي ەمەس. مۇندا تۇسكى اس ءىشۋ جارتى ساعاتقا عانا سوزىلادى.
– قازاقستان مەن ۋرۋگۆايدىڭ كليماتىن سالىستىرۋ مۇمكىن ەمەس. قازىر دۋراسنو قالاسىندا كۇن ىستىق بولىپ تۇر. سوعان قاراماستان, مۇندا كۇنىنە 10 ساعات جۇمىس ىستەۋگە تۋرا كەلەدى. شەتەلدە جۇمىس ىستەگەندىكتەن, جالاقىدا دا ايىرماشىلىق بار. «تەڭىز» كەن ورنىنداعى جوبادا جيناعان تاجىريبەمنىڭ پايداسىن, اسىرەسە ەڭبەك قاۋىپسىزدىگى جونىندە العان ءبىلىمنىڭ جەمىسىن كورىپ ءجۇرمىن, دەيدى ول.
ۇنەمى العا ۇمتىلىپ, ماقساتىنا جەتۋدى كوزدەگەن ايمۇرات الدوڭعار ۇلى الداعى جوسپارىمەن ءبولىستى. قازاقستانعا ناۋرىزدا, نە مامىردا كەلۋدى جوسپارلاپ وتىرعان كورىنەدى.
– بىزدە قاراپايىم ماماندىقتى يگەرگەن قىز-جىگىتتەر وتە كوپ. بىراق سونداي ماماندىق يەلەرىنىڭ كوبىندە تەك ءوز ەلىمىزدە, مۇمكىندىك بولسا, «تەڭىز», «قاشاعان» سەكىلدى جوبالاردا جۇمىس ىستەۋ قاجەت دەگەن تۇسىنىك قالىپتاسقان. شەت ءتىلىن بىلسەڭ, تاڭداعان ماماندىعىڭدى جەتىك مەڭگەرسەڭ, وزگە ەلدە دە جۇمىس ىستەۋگە بولادى. تەگىندە, ىزدەنگەن ادام العا قويعان ماقسات-مۇراتىنا جەتەدى. تاڭداعان ماماندىعىمەن جۇمىس تابادى. سول سەبەپتەن, شەتەلگە بارۋدان, جۇمىسقا ورنالاسۋدان تارتىنباۋ كەرەك. ويتكەنى ەل, جەر كورەسىڭ. سول ەلدىڭ مادەنيەتىنە, تاريحىنا قانىق بولاسىڭ. شەتەلدەگى كومپانيالاردا جۇمىس ىستەسەڭ, تاجىريبەڭ دە تولىعا تۇسەدى. وسىنىڭ ءبارى ادامنىڭ ءبىر ورىندا تۇراقتاپ قالماي, دۇنيەتانىمىن كەڭەيتۋىنە, العا جىلجۋىنا ىقپال ەتەدى, – دەيدى ا.الدوڭعار ۇلى.
اتىراۋ وبلىسى