بۇرىن ءىرى كاسىپكەرلىكتىڭ دامىپ, ال شاعىندار ونىڭ شاڭىنا ىلەسە الماي قالعانى ءجيى ايتىلاتىن. قازىر ولاي دەپ شاعىناتىن ءجون دە, جوبا دا جوق. ويتكەنى كەيىنگى ۋاقىتتا مەملەكەت شاعىن كاسىپكەرلىكتىڭ دامۋىنا دەن قويىپ وتىر. اسىرەسە قايتارىمسىز گرانتتار ءبىراز ادامنىڭ كاسىپ باستاۋىنا باسپالداق بولىپ كەلەدى.
بۇگىندە اۋىلداردا كاسىپ باستاپ, ءتاۋىر تۇرمىس كەشكەندەر قاتارى مولايىپ كەلەدى. بۇل ورايدا قوعامنىڭ كەز كەلگەن مۇشەسىنە مۇمكىندىك جاسالعان. ماسەلەن, قاراعاندى وبلىسىنىڭ نۇرا اۋدانىندا تۇراتىن مۇمكىندىگى شەكتەۋلى جاندار گرانت ارقىلى بيزنەسىن ۇرشىقشا ءيىرىپ وتىر.
ەكىنشى توپتاعى مۇگەدەكتىگى بار ەلەنا كولەسنيكوۆا نۇرا اۋىلىندا تۇرادى. ونىڭ ماماندىعى ەكونوميست ەكەن. الايدا بۇل ماماندىقپەن جۇمىس ىستەپ كورمەپتى. ءۇيدىڭ شارۋاسىمەن وتىرعان ءۇش بالانىڭ اناسى. دەسەك تە, «باستاۋ بيزنەس» ارقىلى ءبىلىم الىپ, ودان سوڭ ساڭىراۋقۇلاق وسىرەتىن كاسىبىن اشىپتى.
– جاسىم 38-دە, ءۇش بالام بار. بىرنەشە جىل ءۇي شارۋاسىمەن ءجۇردىم. ەكىنشى توپتاعى مۇگەدەكتىگىم دە بار. بىلتىر ارنايى ءدارىس الىپ, گرانتقا ءوتىنىش بەردىم. كوميسسيا مەنىڭ بيزنەس-جوسپارىما قولداۋ كورسەتتى. سول ارقىلى ءوز ءىسىمدى باستاپ كەتتىم. گاراجدى ساڭىراۋقۇلاق وسىرۋگە بەيىمدەپ, بەرىلگەن گرانتقا قاجەتتى جابدىق ساتىپ الدىم. بۇگىندە ءبىر جارىم ايدا ءبىر رەت 100 كەلىگە جۋىق اسپا ساڭىراۋقۇلاق وسىرەمىن. نەگىزى, كاسىپ باستاعىسى كەلگەندەرگە تاۋەكەل ەتۋ تۋرالى كەڭەس بەرەر ەدىم. ەڭ باستىسى – ماقسات قويۋ. سودان سوڭ وعان قادام جاساۋ, – دەيدى ەلەنا.
ەلەنانىڭ ساڭىراۋ-قۇلاقتارىن اۋداننىڭ تۇرعىندارى تۇتىنادى. ونى ساۋداعا شىعاراتىن كەلىسىلگەن ساۋدا ورىندارى بار. بۇيىرتسا, ەلەنا الداعى ۋاقىتتا ساڭىراۋقۇلاق ءوسىرۋ ءوندىرىسىن ۇلعايتۋدى ويلايدى. بۇعان قوسا تۇزدالىپ, ساقتالاتىن ساڭىراۋقۇلاق شىعارۋدى كوزدەپ وتىر.
ءدال وسىنداي گرانت ارقىلى ماسساج بولمەسىن اشقان ساپاربەك جاقۇدين – بۇرىنعى ءورت ءسوندىرۋشى. ول ءورت كەزىندە كوزىنەن زاقىم الىپ قالعان ەكەن. بۇگىندە ساپاربەك استانادان قىتايلىق ماسساج كۋرستارىن وقىپ, وسى ورايدا بيزنەس-يدەياسىن ىسكە اسىرا الىپتى. الدىمەن «باستاۋ بيزنەس» جوباسى نەگىزىندە كاسىپكەرلىك ساۋاتتىلىقتى مەڭگەرسە كەرەك. سوڭىنان يدەياسى ارقىلى 1 ملن 225 مىڭ تەڭگە گرانت جەڭىپ الىپ, ماسساج بولمەسىن اشقان كورىنەدى. گرانتتار كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى اياسىندا تابىستالاتىنىن اتاپ وتكەن ءجون.
رەسمي ۇيىمدار جاريا ەتكەن دەرەكتەرگە جۇگىنسەك, بىلتىر نۇرا اۋدانىندا «باستاۋ بيزنەس» جوباسى ارقىلى بارلىعى 167 ادام ءبىلىم العان. 59 ادامعا گرانت بەرىلگەن. ونىڭ ىشىندە 16 ادام مۇمكىندىگى شەكتەۋلى جاندار تىزىمىندەگىلەر.
– بيزنەس-جوبالاردى تابىستى ىسكە اسىرۋدىڭ تاعى ءبىر مىسالى – قاروي اۋىلىنداعى تىگىن تسەحى. ونى تۋتيكوۆتار وتباسى اشتى. وتباسىنداعى ءتورت ادام مۇگەدەك. بارلىعىنىڭ تۋا بىتكەن كەمىستىگى بار, سويلەۋ جانە ەستۋ قابىلەتى تومەن. ولار قازىر تاپسىرىسپەن كيىم, توسەك-ورىن, كورپە-جاستىقتار تىگەدى, – دەيدى نۇرا اۋدانىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى دينارا ەرمەكوۆا.
سونىمەن قاتار نۇرا اۋدانىندا بيىل مۇمكىندىگى شەكتەۋلى تۇرعىنداردىڭ 15 جوباسىن قارجىلاندىرۋ جوسپاردا بار. گرانتتار سوماسى 1 ملن 400 مىڭ تەڭگەگە دەيىن ۇلعايماقشى.
قاراعاندى وبلىسى