بيىلدان باستاپ مەرزىمدى اسكەري مىندەتىن اتقارعان ازاماتتار قورعانىس مينيسترلىگىنىڭ وقۋ ورىندارىنا ەمتيحانسىز قابىلدانادى. ياعني جاقسى اسكەري دايىندىق كورسەتكەندەردىڭ وقۋ اقىسىن ينستيتۋتتار وزدەرى وتەيدى. سونداي-اق اسكەري كافەدرالاردا ءبىلىم الۋ ستۋدەنتتەر ءۇشىن تەگىن بولادى. بۇل تۋرالى ورتالىق كوممۋنيكاتسيالار الاڭىندا قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى جۇمابەك احمەتوۆ مالىمدەدى.
قازىر ەلىمىزدە مامان دايارلايتىن ءۇش اسكەري ينستيتۋت بار. ولارعا قۇجات تاپسىرۋ ءۇشىن ازاماتتار تۇرعىلىقتى جەرى بويىنشا 30 ساۋىرگە دەيىن جەرگىلىكتى اسكەري باسقارۋ ورگانىنا ءوتىنىش جازۋى كەرەك.
كەيىن دەنساۋلىعى جارامدى, ۇبت-نىڭ 5 پانىنەن كەمىندە 50 بالل جيناعاندار (ونىڭ ىشىندە نەگىزگى پاندەردىڭ بىرىنەن كەمىندە 7 بالل جانە قالعان پاندەردىڭ ارقايسىسىنان كەمىندە 4 بالل) اسكەري ينستيتۋتقا 15-20 شىلدە ارالىعىندا قۇجات تاپسىرادى. ازاماتتاردى وقۋ ورىندارىنا قابىلداۋ ارنايى ءتارتىپ بويىنشا ىسكە اسادى. اشىپ ايتساق, تالاپكەرلەر پسيحولوگيالىق, مەديتسينالىق تەكسەرىس پەن دەنە شىنىقتىرۋ دايىندىعىنان جانە كونكۋرستىق ىرىكتەۋدەن وتۋگە ءتيىس. ال قابىلدانعان جاستار اسكەري ينستيتۋتتاردىڭ اۋماعىندا ورنالاستىرىلىپ, تاماقپەن تولىق قامتاماسىز ەتىلەدى.
– تالاپكەرگە ءار كەزەڭنەن وتۋگە ءبىر رەت رۇقسات ەتىلەدى. الدىڭعى كەزەڭنەن وتپەگەن جاس كەلەسى كەزەڭگە جىبەرىلمەيدى. كونكۋرستىق ىرىكتەۋمەن قابىلداۋ كوميسسياسى اينالىسادى جانە وقۋعا تۇسۋشىلەردىڭ ەڭ جوعارىدان ەڭ تومەنگە دەيىنگى بالدارىنىڭ رەيتينگىن جاسايدى. رەيتينگ اسكەري ينستيتۋتتىڭ قابىلداۋ كوميسسياسىنىڭ حاتتاماسىندا رەسىمدەلەدى. كوميسسيانىڭ شەشىمى 6 تامىز ساعات 10.00-گە دەيىن اسكەري ينستيتۋتتىڭ ينتەرنەت رەسۋرستارىندا جاريالانادى. قورعانىس مينيسترلىگى اسكەري وقۋ ورىندارىنىڭ نەگىزگى مىندەتتەرىنىڭ ءبىرى كاسىبي داعدىلارى كوشباسشىلىق قاسيەتتەرى بار, تەرەڭ ءبىلىمدى قارۋلى كۇرەس پەن جاڭا تەحنولوگيالاردىڭ وزگەرمەلى تالاپتارىنا بەيىمدەلە الاتىن مامانداردى دايىنداۋدى ماقسات ەتەدى, – دەدى ج.احمەتوۆ.
بۇعان قوسا ءباسپاسوز ءماسليحاتىندا قورعانىس مينيسترلىگىنىڭ قاراماعىنداعى ەكى اسكەري كوللەدجگە ءتۇسۋ شارتتارى دا ايتىلدى. سپيكەردىڭ سوزىنشە, ششۋچە قالاسىنداعى ش.ءۋاليحانوۆ اتىنداعى جانە استانا قالاسىنداعى س.نۇرماعامبەتوۆ اتىنداعى اسكەري كوللەدجدەرىنە ازاماتتاردى قابىلداۋ 1-20 تامىز ارالىعىندا وتكىزىلەدى.
– كوللەدجگە قابىلدانعان جىلى 17 جاسقا تولعان, بىراق 22 جاستان اسپاعان ازاماتتار مەن 24 جاسقا دەيىن بورىشىن وتەگەن جانە وتەپ جاتقان اسكەري قىزمەتكەرلەر تاپسىرا الادى. اسكەري قىزمەتىن اتقارىپ جۇرگەن اسكەري قىزمەتشىلەر 25 جاسقا تولعانعا دەيىن شارت جاسايدى. س.نۇرماعامبەتوۆ اتىنداعى اسكەري كوللەدجدە «اسكەري ىستەگى اۆتوماتتاندىرۋ جانە ينفوكوممۋنيكاتسيالىق تەحنولوگيالار», «قارۋ-جاراق پەن اسكەري تەحنيكاعا قىزمەت كورسەتۋ», «اسكەري ىستەگى كىشى بۋىن مەنەدجمەنتى» – وسى ءۇش ماماندىق بويىنشا 2 جىل 10 اي وقۋ مەرزىمىمەن نەگىزگى ورتا ءبىلىم نەگىزىندە تەحنيكالىق جانە كاسىپتىك ءبىلىم بەرۋ باعدارلاماسى جۇزەگە اسىرىلادى. كوللەدج جەتكىنشەكتەردى وقۋ ورنىنىڭ 9-سىنىبىن قابىلداۋ جىلى بىتىرگەن, نەگىزگى ورتا ءبىلىمدى اياقتاعانى تۋرالى اتتەستات العان, جاسى 15-تەن كىشى ەمەس, بىراق 16 جاستان اسقان قازاقستان رەسپۋبليكاسىنىڭ ازاماتتارىن قابىلدايدى, – دەدى ول.
سونداي-اق «جاس ۇلان» رەسپۋبليكالىق مەكتەپتەرىنە قابىلداۋ 1-20 تامىز ارالىعىندا جۇرگىزىلمەكشى. بۇل قاتارعا ىلىگۋ ءۇشىن ءجاسوسپىرىمنىڭ جاسى 15-تەن كىشى بولماۋى كەرەك. وعان قوسا 9-سىنىپتى اياقتاعانى جونىندە كۋالىگى بولۋى شارت. دەنساۋلىعى تولىق جارامدى ۇمىتكەر قۇجاتتارىن تامىزدىڭ بىرىنەن بەسىنە دەيىنگى ۋاقىتتا وتكىزۋگە ءتيىس. قابىلداۋ كەزەڭىندە نەگىزگى ورتا ءبىلىم باعدارلاماسىمەن ماتەماتيكا جانە وقۋ تىلىنەن تەست تاپسىرادى.
جالپى مەكتەپتە وقۋ مەرزىمى – 2 جىل. مۇندا ورەندەر ينتەرنات جۇيەسى بويىنشا تاربيەلەنۋشىلەردىڭ ءجىتى باقىلاۋىندا بولادى. ءارى بەلگىلەنگەن نورمالارعا سايكەس شىعىن بيۋدجەت قاراجاتىنان وتەلەدى.
ال ۇلتتىق قورعانىس ۋنيۆەرسيتەتى ءتورت ماماندىق بويىنشا دوكتورانتۋرا جانە باسقارۋدىڭ جەدەل-تاكتيكالىق, ستراتەگيالىق جانە جەدەل-ستراتەگيالىق دەڭگەيلەرىندەگى ماگيستراتۋرا باعدارلامالارىن وقىتادى. وعان دايىندىق قارۋلى كۇشتەر تۇرلەرىنىڭ نەگىزگى ماماندىقتارىن قامتيتىن ءۇش اسكەري ينستيتۋتتا جۇزەگە اسىرىلادى.
– الماتى قالاسىنداعى قۇرلىق اسكەرلەرىنىڭ اسكەري ينستيتۋتى كوماندالىق ماماندىقتار بويىنشا كادرلار دايارلاۋدىڭ جۇيە قۇراۋشى جوعارى وقۋ ورنى بولىپ سانالادى. ينستيتۋت 6 ماماندىق جانە 14 بىلىكتىلىك بويىنشا وفيتسەرلىك كادرلار دايارلايدى. ال اقتوبە قالاسىندا ورنالاسقان كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى – اك اۋە قورعانىسى كۇشتەرى, ءىىم اۆياتسياسى جانە قر ۇقك شەكارا قىزمەتى ءۇشىن ۇشۋ جانە ينجەنەرلىك-تەحنيكالىق قۇرامدى دايارلاۋ ورتالىعى. ينستيتۋت 5 ماماندىق جانە 11 بىلىكتىلىك بويىنشا وفيتسەرلىك كادرلار دايارلايدى. الماتى قالاسىنداعى راديوەلەكترونيكا جانە بايلانىس اسكەري-ينجەنەرلىك ينستيتۋتى اۋە قورعانىسى, بايلانىس, اۆتوماتتاندىرىلعان باسقارۋ جۇيەلەرى, اقپاراتتى وڭدەۋ جانە قاۋىپسىزدىك ماماندارىن دايارلاۋ ورتالىعى بولىپ تابىلادى. ينستيتۋت 6 ماماندىق جانە 9 بىلىكتىلىك بويىنشا وفيتسەرلەردى دايارلايدى, – دەدى گەنەرال-مايور جۇمابەك احمەتوۆ.
بۇدان باسقا, قارۋلى كۇشتەردىڭ قاجەتتىلىكتەرىن ەسكەرە وتىرىپ, قورعانىس مينيسترلىگى ۇشۋ, تەڭىز, قۇرلىق, ينجەنەرلىك, مەديتسينالىق جانە گۋمانيتارلىق ماماندىقتار بويىنشا ءتيىستى دەڭگەيدەگى ءبىلىم بەرۋ باعدارلامالارى بويىنشا شەتەلدە اسكەري كادرلار دايارلاۋدى ىسكە اسىرادى.
ايتا كەتەرلىگى, اسكەري جوعارى وقۋ ورىندارىن تاڭداۋدىڭ ءوز ارتىقشىلىقتارى دا بار. ماسەلەن, جاستار تەگىن ءبىلىم الادى جانە قاجەتتى قۇرال-جابدىقتارمەن قامتاماسىز ەتىلەدى. بۇعان قوسا ازىق-ت ۇلىك, دەمالىس ۋاقىتىندا جىلىنا ەكى رەت جول جۇرۋگە مۇمكىندىك بەرىلەدى. ەڭ باستىسى, تۇلەكتەرىنىڭ 100 پايىزى جۇمىسقا ورنالاستىرىلادى. باستاپقى وفيتسەرلىك لاۋازىمداردا اسكەري قىزمەت وتكەرۋدى جالعاستىرۋعا كەپىلدىك بەرىلەدى. ءارتۇرلى باعدارلاما بويىنشا تۇرعىن ءۇي الۋ دا قاراستىرىلعان.