«استانا وپەرا» تەاترى ساحناسىنا جالپىادامزاتتىق قۇندىلىقتاردى ارقالاعان «دالا ءۇنى» بالەتى اراعا ءۇش جىل سالىپ, جاڭا نۇسقادا قايتا ورالادى. بالەتمەيستەر پاتريك دە بانانىڭ اسىل مۇراتتارعا جەتەلەگەن بۇل قويىلىمى زاماناۋي رەڭكتەرگە بويالىپ, وزگەرە ءتۇستى. تىرشىلىكتىڭ سان سيقىرى, ماحاببات كۇشى مەن بابالار دانالىعى تىعىز ورىلگەن سپەكتاكل كوپشىلىككە 18-19 اقپان كۇندەرى ۇسىنىلماق. وسى ورايدا جاڭا كەيىپتە قايتا ورالعان قويىلىمنىڭ دايىندىق بارىسىن بىلۋگە اسىقتىق.
قويۋشى حورەوگراف پاتريك دە بانا ءوز قويىلىمدارىنا اركەز ورالعان سايىن وعان مىندەتتى تۇردە وزگەرىس ەنگىزەدى ەكەن. كەۋدەسىندە ىلعي جاندۇنيەسىنەن بۇلقىنىپ شىققان تۋىندىسى تولىققاندى ءومىر ءسۇرسىن دەگەن ۇلكەن قۇشتارلىق تۇرادى.
–ۋاقىت العا جىلجىپ, بيشىلەر اۋىسادى, سوعان ساي حورەوگرافيانى جاڭارتۋدىڭ قاجەتتىلىگى تۋادى. ءبىز بۇرىنعىداي ەكى اكتىنى قالدىردىق. بىراق بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆامەن بىرگە قويىلىمدى ءسال قىسقا ءارى ىقشام ەتىپ جاساۋدى ۇيعاردىق, – دەدى پاتريك دە بانا. – ءۇش جىل بۇرىن پرەمەرا ۇلكەن تابىسقا يە بولعان ەدى, بۇعان قۋانىشتىمىن. البەتتە, وسىناۋ بالەتتى بارىنشا كوپ ادامنىڭ كورگەنىن, ونىڭ ىشىندە گاسترول اياسىندا شەتەلدىكتەردىڭ دە تاماشالاعانىن قالار ەدىم. ويتكەنى سپەكتاكل قازاقستاندى تانىستىرادى, وسى ەلدىڭ اسەمدىگىن جىرلايدى, – دەيدى بالەتمەيستەر.
ەسكە سالا كەتەيىك, سپەكتاكلدى بەزەندىرۋمەن شەتەلدىك تالانتتى شەبەرلەر – دەكوراتسيالار بويىنشا سۋرەتشى ريكاردو سانچەز كۋەردا مەن كوستيۋمدەر بويىنشا سۋرەتشى ستەفاني باۋەرلە اينالىستى. ستسەنوگراف ۇلتتىق ءستيلدىڭ اسەم ەلەمەنتتەرىن بايقاپ, قازاق دالاسىنىڭ كەڭدىگىنەن شابىت الىپ, ساحنا جابدىعىن ءبىرىنشى اكتىدە ادەمى تابيعات جانە كەسەنە كارتينالارىمەن شىنايى ەتىپ بەزەندىرگەن. ال ەكىنشى اكتىدە ساحنا كەلەشەكتى بولجايتىنداي بولىپ كورىنەدى. سۋرەتشى ستەفاني باۋەرلە جانۋار-كەيىپكەرلەر مەن باقسىعا ارناپ ولاردىڭ بەينەسىن ءبىر قاراعاندا كوز الدىڭا اكەلەتىن كوستيۋمدەر جاسادى.
سونداي-اق قالانىڭ نوبايىن سالۋ كورىنىسىندە جانە شاباداندارمەن بولاتىن ايگىلى وقيعاداعى قىزدار كوستيۋمدەرىنىڭ بوياۋى قانىق. ۇلتتىق كوستيۋمدەردىڭ دە نوبايى بولەك.
پاتريك دە بانا بۇل بالەتتىڭ الەمدىك ساحنالار قاتارىنان ۇيلەسىمدى ورىن الاتىنىن اتاپ ءوتتى.
– پاريج وپەراسىنا نەمەسە لوندوندىق كوۆەنت-گاردەنگە گاسترولگە بارىپ كەلگەن قولايلى بولار ەدى, بۇل – ۇلكەن تەاترلار, ولاردا وسى دەكوراتسيالارعا ورىن جەتەرلىك, – دەدى حورەوگراف.
دەسەك تە بۇل بالەت ءتۇرلى ساحنالارعا كەلە بەرەدى. پاريج بەن لوندونداعى كورەرمەندەرگە عانا ەمەس, بارشا الەمگە ورتاق تاقىرىپ. قويىلىمنىڭ نەگىزگى جەلىسى ومىرلىك قۇندىلىقتار مەن ەشقاشان وزگەرمەيتىن ادىلەت, ار سىندى قاساڭ قاعيدالارعا قۇرىلعان. سوعان قوسا رۋحاني, مادەني ىزگىلىكتەرمەن قاتار اۋەزدى مۋزىكا مەن ۇلتتىق ناقىشتىڭ بىرگە تولقۋى بالەتتى وڭدەندىرە تۇسەدى.
سونىمەن بالەتتىڭ مۋزىكالىق نەگىزىندە تولەگەن مومبەكوۆ, قۋات شىلدەباەۆ, رەنات گايسين, كارلوس پينو-كينتانانىڭ تۋىندىلارى, ودان بولەك «تۇران», «حاسساق» فولكلورلىق-ەتنوگرافيالىق انسامبلدەرى مەن «Steppe Sons» ەتنو-دجاز توبىنىڭ رەپەرتۋارىنداعى كومپوزيتسيالارى بار.
بالەت ونەرىندە مۋزىكانىڭ ءرولى ۇلكەن. ءبيشىنىڭ ءار قيمىلى اۋەننىڭ ءار نوتاسىمەن ىشتەي قابىسىپ, ۇندەسىپ جاتادى. «دالا ءۇنى» قويىلىمىندا ۇل/شەبەردىڭ پارتياسىن ورىنداۋعا عالىمجان نۇرمۇحامەت پەن بەكزات ورىنباەۆ دايىندالىپ جاتىر. ال مۋزا – ايگەرىم بەكەتاەۆا مەن اناستاسيا زاكلينسكايا. باقسى – سۇلتانبەك عۇمار, سەرىك ناقىسپەكوۆ. انا – اسەل شايكەنوۆا, ادەلينا تولەپوۆا, انەل رۇستەموۆا. اكە – ولجاس تارلانوۆ, جانىبەك احمەديەۆ, جانىبەك يمانقۇلوۆ. قارسىلاس – ەۆگەني رىبكين, دياس قۇرمانعازى, ولەگ لەونتەۆ, سۇڭعات قىدىرباي جانە تاعى باسقالارى. ليبرەتتونىڭ حورەوگرافيالىق اداپتاتسياسىن جان-فرانسۋا ۆازەل جاساعان.