الەمگە ايگىلى Google كومپانياسىندا جۇمىس ىستەۋ ءاربىر IT-مامان ءۇشىن ۇلكەن مارتەبە. دەگەنمەن ول بيىكتى باعىندىرعان قازاق بالالارى جەتەرلىك. سونىڭ ءبىرى – تالدىقورعان قالاسىنداعى نازارباەۆ زياتكەرلىك مەكتەبىنىڭ تۇلەگى ەرنياز نۇرعابىلوۆ. جاقىندا جاس ءبىلىمپاز وقۋشىلارمەن كەزدەسىپ, وي ءبولىستى.
اياداي عانا اۋىلدان شىققان بالانىڭ بولاشاقتا الەمنىڭ الپاۋىت كومپانيالارىنىڭ بىرىندە قىزمەت ەتۋى بۇرىن ورىندالماس ارمانداي كورىنەتىن. ال قازىر بۇل قولدان كەلەتىن ءىس, باعىندىرۋعا بولاتىن بەلەس بولدى. كەزدەسۋدە وتانداسىمىز بالالارعا Google-دا جۇمىس ىستەۋ قولجەتپەس ارمان ەمەس ەكەنىن ايتتى.
ەرنياز Nazarbayev University-ءىنىڭ Computer Science فاكۋلتەتىن بىتىرگەن. كەيىن ءبىلىمىن شىڭداعان سوڭ, ياندەكس-تە تاعىلىمدامادان وتەدى. ارتىنان Google كومپانياسىنان شاقىرتۋ الىپ, 2022 جىلدىڭ ناۋرىز ايىنان باستاپ, پولشاداعى Google كەڭسەسىندە باعدارلاماشى-قۇراستىرۋشى رەتىندە جۇمىسقا تۇرادى.
– جۇمىسقا شاقىرتۋ العان سوڭ, كومپانيانىڭ كادرمەن قامتۋ بولىمىمەن بايلانىس ورناتاسىز, مۇنداعىلار قۇجاتتاردى تۇگەندەپ, كومپانيا جۇمىسىمەن تانىستىرادى. سوسىن كەلەسى كەزەڭدە قىرىق بەس مينۋت بويى ونلاين رەجىمدە ەسەپ شىعارۋىڭ كەرەك. كەيىن كەڭسەگە شاقىرتىلاسىز, مۇندا كۇنى بويى سوندا جۇمىس ىستەيتىن بەس-التى مامان سىزگە باعدارلامالاۋعا قاتىستى ءارتۇرلى سۇراق قويادى. وسى كەزەڭدەردەن وتكەننەن كەيىن ارنايى كوميسسيا ناتيجەنى باعالاپ, الگى مامانداردىڭ بەرگەن باعاسىن سارالاپ, سوڭعى كەزەڭ – كەلىسىمشارت جاساسۋعا باعىتتايدى, – دەيدى ە.نۇرعابىلوۆ.
تالدىقورعان قالاسىنداعى زياتكەرلىك مەكتەبىندە وقىعان جىلدارى ەرنياز ماتەماتيكا پانىنەن كوپتەگەن حالىقارالىق وليمپيادانى باعىندىردى. ءتىپتى, قازاقستان قۇراما كومانداسىنىڭ بەلدى مۇشەسى دە بولعان. الەمنىڭ وننان استام ەلىندە ءبىلىم دوداسىنا ءتۇستى. ەڭ جارقىن جەتىستىكتەردىڭ ءبىرى – حالىقارالىق International Mathimatical Olympiad وليمپياداسى. وعان الەمنىڭ تۇكپىر-تۇكپىرىنەن 150-دەن استام مەملەكەتتىڭ زياتكەرلەرى قاتىسادى. تالانتتى ەرنياز بۇل وليمپيادادا ەكى رەت, 10-شى جانە 11-سىنىپتاردا باق سىناعان. العاشقى جارىسىندا ارگەنتينادا كۇمىس مەدال السا, 11-سىنىپتا كولۋمبيادا قولا جۇلدەگەر اتانعان.
بۇگىندە Google كومپانياسى ەرنيازدى بارلىق جاعدايمەن قامتاماسىز ەتىپ وتىر. ىڭعايلى جۇمىس كەستەسىن, تاماشا كەڭسە, تەگىن تاماق ۇسىنادى جانە كوشۋگە كومەكتەسەدى. ءوزى بولاشاقتا ەلگە ورالىپ, وتانىمىزدىڭ الەۋەتىن ارتتىرۋعا كۇش سالعىسى كەلەدى.
– مۇندا ايلىق, ەڭبەك دەمالىسى بويىنشا ساۋدالاسۋىڭا بولادى. ەلدە ەڭبەكاقى اي سايىن بەرىلەدى عوي, ال بۇل جاقتا ولاي ەمەس. تابىس تۇرلەرى كوپ, اپتا, ەكى اپتا سايىن بەرىلەتىنى بار. سوسىن قىزمەتكەرگە كومپانيا اكتسيا ۇسىنادى. بۇعان قوسا جىل سايىن بەلگىلى ءبىر كولەمدە بونۋس بەرەدى, – دەيدى ە.نۇرعابىلوۆ.
مەكتەپتى سۇيىسپەنشىلىكپەن ەسكە العان تالاپتى تۇلەك بولاشاق ماماندارعا NIS ۇسىناتىن بارلىق مۇمكىندىكتى پايدالانۋعا كەڭەس بەردى.
جەتىسۋ وبلىسى