قۇرلىقتىق حوككەي ليگاسىندا (قحل) ونەر كورسەتەتىن ەلوردانىڭ «بارىسى» كەزەكتى تۋر ويىنىن «بارىس ارەنادا» وتكىزىپ, سانكت-پەتەربۋرگتىڭ سكا كلۋبىنا ەكىنشى رەت ەسە جىبەردى.
ءبىر اپتا بۇرىن سىرت ايدىندا ماسكەۋدىڭ تسسكا كومانداسىن وۆەرتايمدا جەڭىپ, قىسقا مەرزىمدى ۇزىلىسكە كوتەرىڭكى كوڭىل كۇيمەن شىققان اندرەي سكابەلكا شاكىرتتەرى قايتادان ەسكى ادەتىنە باستى. ءوز ايدىنىنداعى ماتچتار سەرياسىن جالپى ليگانىڭ كوشباسشىسى سكا حوككەيشىلەرىمەن باستاعان جەرلەستەرىمىز 10 شايبا سوعىلعان ماتچتا 6:4 ەسەبىمەن جەڭىلىپ قالدى.
اسا تارتىستى وتكەن كەزدەسۋدى بەلسەندى باستاعان قوناقتار ءبىرىنشى كەزەڭدە يۋليۋس گۋداچەك قورعاعان قاقپادان ءۇش مارتە ساڭىلاۋ تاۋىپ, ەسەپتە العا ۇزاپ كەتتى. سونداي-اق سكا ويىنشىلارى ەكىنشى كەزەڭدە – ءبىر, ءۇشىنشى كەزەڭدە ەكى شايبا سوعىپ, ماتچ جەڭىمپازى اتاندى. ال ايدىن يەلەرى ساپىنان ەكىنشى كەزەڭدە الەكس گرانت (22-مينۋت), ءۇشىنشى كەزەڭدە – نيكيتا ميحايليس (42), دجەرەمي براككو (47) جانە كيريلل ساۆيتسكي (54) مەرگەندىگىمەن كوزگە ءتۇستى. وسىلايشا, «بارىس» سكا كلۋبىنان تۇراقتى چەمپيوناتتىڭ وسى ماۋسىمىندا ەكىنشى رەت جەڭىلىپ وتىر. 2022 جىلدىڭ قىركۇيەگىندە سانكت-پەتەربۋرگتە وتكەن ماتچتا ايدىن يەلەرى 3:1 ەسەبىمەن جەڭىسكە جەتكەن ەدى.
«بارىس» كەلەسى ويىنىن بۇگىن «باتىس» كونفەرەنتسياسىنىڭ تۋرنير كەستەسىندە 8-ورىندا تۇرعان مينسكىنىڭ «ديناموسىمەن» وتكىزەدى.