تەننيستەن «دەۆيس كۋبوگى» باسەكەسىنىڭ ءبىرىنشى الەمدىك توبىندا باق سىنايتىن قۇرامالاردىڭ جەرەبەسى تارتىلىپ, كۇز مەزگىلىندە وتەتىن ەلەكتىك ويىنداعى قازاقستان قۇراماسىنىڭ قارسىلاسى انىقتالدى.
جەرەبە قورىتىندىسى بويىنشا, يۋري ششۋكيننىڭ شاكىرتتەرى جوعارى توپتاعى ورنىن ساقتاپ قالۋ ءۇشىن ءبىرىنشى الەمدىك توبىنىڭ جەڭىمپازى بولگاريامەن سىرت الاڭدا كەزدەسەتىن بولدى. وسىعان دەيىن ەكى قۇرامانىڭ جولدارى اتالعان تۋرنيردە تۇيىسپەگەن. ماتچ وسى جىلدىڭ 16-17 نەمەسە 17-18 قىركۇيەك كۇندەرى وتەدى دەپ جوسپارلانعان. جەڭىسكە جەتكەن قۇراما 2024 جىلدىڭ اقپانىندا كوماندالىق الەم چەمپيوناتىنىڭ ىرىكتەۋ ماتچىنا قاتىسادى.
قاتارىنان ءۇش مارتە «دەۆيس كۋبوگىنىڭ» فينالىنا شىققان قازاقستاننىڭ ەرلەر قۇراماسى بيىلعى ىرىكتەۋ سايىسىندا چيلي قۇراماسىنا ەسە جىبەرىپ, 2023 جىلعى فينالدىق كەزەڭنەن تىس قالعان بولاتىن. لا سەرەنا قالاسىنداعى قۇمداۋىت كورتتا وتكەن ماتچتا چيلي تەننيسشىلەرى جەرلەستەرىمىزدەن 3:1 ەسەبىمەن باسىم ءتۇستى.
ال بولگاريا قۇراماسى ءبىرىنشى الەمدىك توپتا جاڭا زەلانديا جىگىتتەرىن ءدال سونداي ەسەپپەن قاپى قالدىرعان. 3:1 ەسەبىمەن جەڭگەن سوڭ, الەمدىك رەيتينگتە بىردەن 15 ورىن جوعارىلاپ, 41-ساتىعا جايعاستى.