قازىر ورتا ازيانىڭ كۇرت كونتينەنتالدى كليماتى, تەمپەراتۋرانىڭ قۇبىلمالىلىعى قالىپتى. بىراق وسى قىستا ايازدىڭ كۇرت كوتەرىلۋى توسىن جاعداي بولدى. سەبەبى سوڭعى جىلدارى قىس جىلى وتكەن ەدى. بيىل جەلتوقسان مەن قاڭتار ايلارىندا تەمپەراتۋرا -20-35 گرادۋسقا دەيىن تومەندەدى, دەپ حابارلايدى Egemen.kz.
تاشكەنتتە مۇنداي سۋىق اۋا رايى جارتى عاسىردان بەرى بولعان جوق, ال تۇركىمەنستاننىڭ كەيبىر ايماقتارىندا ەڭ تومەنگى تەمپەراتۋرانىڭ جاڭا رەكوردى تىركەلگەن.
بيىل قازاقستان, قىرعىزستان جانە وزبەكستاننىڭ كەيبىر ايماقتارىندا قۇبىرلار قاتىپ, جارىلىپ, جۇزدەگەن ۇيلەر مەن مىڭداعان ادامدار جىلۋ مەن سۋسىز قالدى.
قولايسىز اۋا-رايى كەزىندە تۋىنداعان ماسەلەلەر ورتا ازيانىڭ ەنەرگەتيكا سەكتورىنىڭ ءالسىز ەكەنىن كورسەتتى. تالاي جىلدان بەرى جوندەۋ كورمەگەن جەس-تەر اۋىر جۇكتەمەنى كوتەرە المايدى.
ستاتيستيكالىق مالىمەتكە سۇيەنسەك, ورتا ازيا ەلدەرى ەنەرگەتيكالىق قۇرىلىمى وتە باياۋ داميتىن نەمەسە مۇلدەم دامىماعان ەلدەردىڭ قاتارىندا تۇر.
پرەمەر-مينيستر ءاليحان سمايىلوۆ قازاقستان بويىنشا جۇمىس ىستەپ تۇرعان 37 جەو-نىڭ 19-ى قىزىل ايماقتا ەكەنىن ايتقان. جەس-تەردىڭ جارىلىسىنان كەيىن باسشىلارى اۋىسىپ, جاڭا ينۆەستورلاردى تارتۋ قولعا الىنعان. راسىندا, بۇل كەزەك كۇتتىرمەيتىن ماڭىزدى ماسەلە.
«بۇل بارلىق ەلدەر ءۇشىن قيىن قىس بولدى جانە ينۆەستيتسيالاردىڭ جەتىسپەۋشىلىگىنەن تۋىنداعان ەنەرگەتيكالىق ماسەلەلەردى ەندى ەلەمەۋگە بولمايدى. قاراپايىم تىلمەن ايتقاندا, ەنەرگەتيكا سەكتورى كەڭەس وداعىنان قالعان جۇيەمەن كەلە جاتىر», دەدى Visor Kazakhstan ينۆەستيتسيالىق كومپانياسىنىڭ ەكونوميسى ءارى سەرىكتەسى الماس چۋكين.