عىلىم جانە جوعارى ءبىلىم ءمينيسترى ساياسات نۇربەك ارمانجان بايتاسوۆقا بەرگەن سۇحباتىندا قازاقستانداعى ۇلتتىق بىرىڭعاي تەستىلەۋ جۇيەسىنە قاتىستى پىكىر ءبىلدىردى. ونىڭ ايتۋىنشا, ۇبت فورماتى جىل سايىن جەتىلىپ كەلەدى. دەگەنمەن, ەڭ ءتيىمدىسى – SIT (System integrated test) جۇيەسىنە كوشۋ. قازاقستان بۇل جۇيەگە شامامەن ءۇش جىلدان سوڭ كوشۋى مۇمكىن, دەپ حابارلايدى Egemen.kz.
«قازىر ۇبت «سۇرىپتاۋ» سياقتى جۇمىس ىستەيدى. دەسە دە ول تالاپكەردىڭ ءبىلىمىن جاقسى نە ناشار دەپ قانا باعالايدى. سوندىقتان ءبىز ءۇشىن ەڭ دۇرىسى – SIT جۇيەسىنە ءوتۋ. ال SIT سەرتيفيكاتتارىن ماقۇلداۋ ءتىپتى دە ءتيىمدى شەشىم بولار ەدى», دەپ ءتۇسىندىردى مينيستر.
ونىڭ ايتۋىنشا, ەگەر قازاقستان SIT جۇيەسىن قولدانۋعا كوشسە, تالاپكەر مىندەتتى ۇبت تاپسىرمايدى. ونىڭ ورنىنا تۇلەك اۆتوريزاتسيالانعان SIT ورتالىقتارىندا ەمتيحان تاپسىرىپ, قاجەتتى بالل جيناۋى كەرەك.
«شەتەلدە سولاي. ءبىز دە وسى مودەلگە كوشەمىز. ءار بالا ءوز الدىنا ماقسات قويىپ, سوعان جەتۋگە ۇمتىلۋى كەرەك», دەدى عىلىم جانە جوعارى ءبىلىم ءمينيسترى.
قازىر قازاقستاندا ۇبت جۇيەسىن SIT ستاندارتتارىنا جاقىنداتۋ جۇمىستارى ءجۇرىپ جاتىر. ول ءۇشىن بيىلدان باستاپ «بەس سۇراق – ءبىر دۇرىس جاۋاپ» فورماتىنداعى سۇراقتاردان بولەك, تالاپكەردىڭ اناليتيكالىق ويلاۋ قابىلەتىن تانىتۋىنا نەگىزدەلگەن ساۋالدار دا ەنگىزىلەدى.
«راسىن ايتقاندا, ازىرگە بۇدان ارتىق جۇيە ويلاپ تاپپاعاندىقتان, ۇلتتىق بىرىڭعاي تەستىلەۋ وتكىزەمىز. ويتكەنى قازاقستانداعى ءبىلىم بەرۋ جۇيەسى ورتالىقتاندىرىلعان. ال دامىعان ەلدەردە ءار ۋنيۆەرسيتەت وقۋعا قابىلداۋ تالاپتارىن, ۋاقىتىن ءوزى بەلگىلەپ, سول ارقىلى ستۋدەنتتەردى جيناي الادى. سوندىقتان ەكى ماڭىزدى باستامانى قولعا الىپ وتىرمىز. ۇبت فورماتىن حالىقارالىق SIT ستاندارتتارىنا جاقىنداتۋ ءۇشىن كەمبريدج ۋنيۆەرسيتەتىمەن جۇمىس ىستەدىك. تالاپكەر ءوز ءبىلىمىن كورسەتە الۋى ءۇشىن سىناقتاعى ءماتىندى جاتتاپ الۋىنا ەمەس, ونى تۇسىنۋگە, جاۋاپتارعا دەدۋكتسيا جاساۋىنا كوڭىل بولەمىز. بيىل بۇل فورماتتى پيلوتتىق سىناقتان وتكىزەمىز دەپ ويلايمىن», دەدى ساياسات نۇربەك.