تەننيستەن قازاقستاننىڭ ەرلەر اراسىنداعى ءبىرىنشى, الەمنىڭ 50-راكەتكاسى الەكساندر بۋبليك فرانتسيانىڭ مونپەل قالاسىندا ءوتىپ جاتقان ATP ءتۋرنيرىنىڭ العاشقى اينالىمىندا جەڭىلىپ قالدى.
وتانداسىمىز بىلتىر ءدال وسى ءتۋرنيردىڭ فينالىنا شىعىپ, الەمدىك رەيتينگتە 17-ساتىعا جايعاسقان گەرمانيالىق الەكساندر زۆەرەۆتى ەكى سەتتە 6:4, 6:3 ەسەبىمەن تىزە بۇكتىرىپ, جارىس جەڭىمپازى اتانعان بولاتىن. وكىنىشكە قاراي وتانداسىمىز بيىل سول جەتىستىگىن قايتالاي المادى.
بيىلعى ءتۋرنيردىڭ 6-راكەتكاسى بولىپ تىركەلگەن ا.بۋبليك ءبىرىنشى اينالىمدا كورت قوجايىنى, دۇنيەجۇزىلىك رەيتينگتە 75-ورىنعا جايعاسقان گرەگۋار باررەرمەن شەبەرلىك بايقاستى. اسا تارتىستى وتكەن كەزدەسۋدە جەرلەسىمىز قارسىلاسىنا ءۇش سەتتە 4:6, 7:6 (14:12), 6:7 (3:7) ەسەبىمەن جول بەردى. 2 ساعات 30 مينۋتقا جالعاسقان ماتچتا الەكساندر 19 رەت ەيسپەن ەرەكشەلەنىپ, 14 مارتە قوس قاتەلىك جاسادى. ال باررەر 5 ەيستى جۇزەگە اسىرىپ, نەبارى ءتورت مارتە عانا قوسارلانعان قاتەلىككە بوي الدىردى.
ءار تۋرنير سايىن الەمدىك رەيتينگتە جوعارى قاراي ورلەۋدىڭ ورنىنا تومەن قاراي قۇلديلاپ بارا جاتقان الەكساندر بۋبليك بۇل ساتسىزدىگىنەن كەيىن كەلەسى اپتادا تاعى دا 10-15 ورىنعا تومەندەيدى. سەبەبى ATP ەرەجەسى بويىنشا تەننيسشىلەر بىلتىرعى جەتىستىگى مەن جيناعان ۇپايىن كەلەسى جىلى قورعاي الماسا, ATP رەيتينگتىك ۇپايىن كەرى قايتارىپ الادى.