«وتان وتباسىنان باستالادى» – ورىندى ايتىلعان دانا ءسوز. وتباسىنان العان ۇلگىلى, ونەگەلى تاربيە – كەز كەلگەن بالانىڭ الداعى ۋاقىتتا بەلگىلى ءبىر جەتىستىككە جەتۋىنە, سونداي-اق ومىرىندە ءوز ورنىن اداسپاي تابۋعا جەتەلەيتىنى ءسوزسىز. وعان دالەل بۇگىنگى اڭگىمەگە ارقاۋ بولار اسكەري قىزمەتشىلەردىڭ وتباسى.
ۇلتتىق ۇلاننىڭ 6506 اسكەري بولىمىندە ءبىر وتباسىنان ەكى بىردەي ازامات ەل تىنىشتىعىن قورعاۋ جولىندا اسكەري قىزمەت اتقارىپ ءجۇر. ولار اسكەري ءبولىمنىڭ ارتيللەريالىق-زەنيتتىك ديۆيزيونىنىڭ اعا مامانى ستارشينا نەماتجان رەجاماتوۆ پەن ونىڭ ۇلى لەيتەنانت زۋلفارجان حاديماتوۆ.
ستارشينا نەماتجان رەجاماتوۆ شيرەك عاسىرعا جۋىق ۋاقىت 6506 اسكەري ءبولىمىنىڭ اۆتوموبيلدىك پاركىندە قىزمەت اتقارىپ كەلەدى. ول 1994-1996 جىلدارى تاراز قالاسىندا 5485 اسكەري بولىمىندە مەرزىمدىك قىزمەت اتقاردى. العاشقى قىزمەت جولىن جەدەل ماقساتتاعى باتالوندا بروندىتەحنيكانىڭ جۇرگىزۋشىسى بولىپ باستايدى, ودان اۆتوموبيل تەحنيكاسىن جوندەۋ شەبەرحاناسىنىڭ باستىعى, كەيىن قايتا جۇرگىزۋشىلىك قىزمەتكە اۋىسادى. سودان بەرى اسكەري بولىمدە جۇرگىزۋشى-نۇسقاۋشى لاۋازىمىن ابىرويمەن اتقارىپ كەلە جاتقان بەدەلدى اسكەري قىزمەتشىلەردىڭ قاتارىندا. جالپى, اسكەري جۇرگىزۋشى – ارقاشان امبەباپ مامان, جەكە قۇرام تاسىمالدايتىن كولىكتى دە, بروندالعان اۋىر تەحنيكانى دا جۇرگىزۋمەن قاتار, ونىڭ بۇزىلعان جەرىن جوندەپ قاتارعا قويۋعا ءتيىس. اسكەري ورتادا بۇل ماماننىڭ وزىنە ءتان اۋىرتپالىعى دا بار. الايدا وسى ءبىر قىزمەتتى 25 جىلدان اسا ۋاقىت تىزگىندەپ كەلە جاتقان ستارشينا نەماتجان رەجاماتوۆتىڭ اسكەري ءبولىمنىڭ جاۋىنگەرلىك جولىنداعى ەڭبەگى دە ەرەن. ءبولىمنىڭ تاريحي جولدارىنىڭ كۋاسى بولعاندىقتان, جاۋىنگەرلەرگە ۇيرەتەرى كوپ, تاجىريبەسى مول اسكەري قىزمەتشىلەردىڭ ءبىرى. جاسى 45-ءتى القىمداسا دا, اۋىر تەحنيكانىڭ قۇلاعىندا وينايتىن ناعىز كاسىبي مامان ەكەنىن الىستان بايقاۋعا بولادى. اۆتوموبيل پاركىندەگى كەز كەلگەن قىزمەتتە جۇرگەن جاس اسكەري قىزمەتشىلەرگە ۇلاعاتتى ۇستازدان كەم ەمەس, بىلگەنىمەن بولىسۋدەن جالىقپاعان.
ارتيللەريالىق-زەنيتتىك ديۆيزيونىنىڭ كومانديرى, مايور جۇپاربەك باقىتجان: «بۇل اسكەري قىزمەتشىنىڭ مەن ءۇشىن ورنى بولەك. «كوپ جاساعاننان سۇراما, كوپتى كورگەننەن سۇرا» دەپ ايتادى عوي. ويتكەنى وزگە تۇگىلى ءوزىم دە ول كىسىنىڭ اقىل-كەڭەسىن تىڭدايمىن. ديۆيزيوندا سەرجانتتىق قۇرام اراسىندا ابىرويى مەن بەدەلى بولەك, تاعىلىمدى تاجىريبەسى بار ستارشينالاردىڭ قاتارىندا. جاستارعا ۇلگى بولار ناعىز ەڭبەك ادامى دەسەم دە بولادى», دەيدى.
اسكەري بولىمدە جىلىنا ەكى رەت جاساقتالاتىن جاس جۇرگىزۋشىلەر ۆزۆودىنىڭ ساربازدارىنا ۇنەمى جەتەكشىلىك ەتەدى. ءاربىر ساربازدى تەحنيكالارعا بەكىتكەندە دە ءۇش اي بويى وقىتىپ, دايارلاۋعا اتسالىسقان ستارشينا نەماتجان رەجاماتوۆتىڭ كەڭەسى اۋاداي قاجەت.
تۇڭعىش ۇلى لەيتەنانت زۋلفارجان حاديماتوۆ بولسا, اكەنىڭ ىزىنەن الىستاماي, كوماندالىق تاكتيكالىق اۆتوموبيلمەن قامتاماسىز ەتۋ ماماندىعىن اسكەري وقۋ ورنىندا جوعارى ءبىلىم ارقىلى يگەرىپ شىقتى. ۇلتتىق ۇلاننىڭ اكادەمياسىنان جاقىندا عانا تۇلەك بولىپ ۇشقان جاس وفيتسەر زۋلفارجان حاديماتوۆ – بۇگىندە اۆتوموبيلدەگى جەدەل ماقساتتاعى باتالوندا ۆزۆود كومانديرى.
جاس لەيتەنانت: «بالالىق شاعىم اكەمنىڭ قىزمەتىندە, وسى اسكەري ءبولىمنىڭ قابىرعاسىندا ءوتتى دەسەم دە بولادى. مەكتەپتەن بوس ۋاقىتىم بولا قالسا, اكەممەن بىرگە اسكەري بولىمگە كەلۋشى ەدىم. مۇنداعى ساربازدار, ولاردىڭ اتقاراتىن قىزمەتتەرى, اسكەري كيىمدەرى ماعان وتە تاڭسىق كورىنەتىن. اكەمنىڭ كولىگىنە وتىرىپ, ساربازدارمەن بىرگە جۇرەتىنمىن. سولارعا ىلەسە ءجۇرىپ اسكەري تەحنيكالاردى جوندەۋدى, ونىڭ بولشەكتەرىن الىپ-سالۋدى ۇيرەنىپ الدىم. سول كەزدەن باستاپ-اق مەنىڭ بولاشاقتاعى ماماندىعىمدى اسكەري سالادان باسقادا ەلەستەتە المادىم. اسكەر سالاسىندا ماماندىق تاڭداۋىمدى 11-سىنىپقا جاقىنداعاننان باستاپ اكەمە ايتا باستادىم, الايدا العاشىندا قارسى بولعانىمەن, كەيىن قولداۋ ءبىلدىرىپ, اسكەري وقۋ ورنىنا تۇسۋىمە كومەگىن اياماي, قاسىمدا ءجۇردى. وسىلايشا, مەكتەپتى اياقتاعان سوڭ ويلانباستان ۇلتتىق ۇلاننىڭ اكادەمياسىنا وقۋعا ءتۇستىم. اسكەري انتىمدى قابىلداپ بولعان سوڭ اكەمنىڭ: «اسكەري قىزمەتكە قىزىعۋشىلىق تانىتىپ, شەشىم قابىلدادىڭ, وزىڭە ارتىلاتىن جۇكتىڭ سالماعىن دا سەزىن. ەندى ارتقا قايتۋعا كەش. ءومىرىڭدى وتان قورعاۋعا ارناعان سوڭ, وفيتسەر دەگەن اتاقتىڭ ابىرويى مەن بەدەلىنە نۇقسان كەلتىرۋشى بولما!» دەگەن ءسوزى ۇنەمى سانامدا سايراپ تۇردى», دەيدى.
ستارشينا ن.رەجاماتوۆتىڭ ەكىنشى ۇلى زياتجان – مەديتسينا سالاسىندا III كۋرس ستۋدەنتى. ول دا ديپلوم العان سوڭ اسكەري مەديتسينا جولىنا بارۋعا قارسى ەمەستىگىن ايتىپ قالدى. اسكەري قىزمەتشىلەردىڭ وتباسى سىيلاستىق, شىدامدىلىق, ءوزارا سەنىم مەن تۇسىنىستىك ورناعان سەنىمدى تىل مەن كىشىگىرىم وداق ەكەنى ءسوزسىز. ۇلتتىق ۇلان قاتارىندا قىزمەت اتقارىپ جۇرگەن اكەلى-بالالى اسكەري قىزمەتشىلەر قاشاندا وزگە اسكەري قىزمەتشىلەرگە ۇلكەن ونەگە.
ماليكا شىنجىگىتوۆا
شىمكەنت