Digital Almaty 2023 فورۋمى اياسىندا ۇلتتىق بانكتىڭ تولەم جانە قارجى تەحنولوگيالارىن دامىتۋ ورتالىعى, Binance Kazakhstan Technologies Ltd, Astana Hub حالىقارالىق تەحنوپاركى جانە باس پروكۋراتۋرا جانىنداعى قۇقىق قورعاۋ ورگاندارى اكادەمياسى تورتجاقتى كەلىسىمگە قول قويدى.
بىرلەسكەن قىزمەت شەڭبەرىندە ۇيىمدار ورتالىق ازيا وڭىرىندەگى جاھاندىق قاتەرلەرگە قارسى ءىس-قيمىل جونىندەگى وڭىرلىك حاب بولىپ سانالاتىن باس پروكۋراتۋرا جانىنداعى قۇقىق قورعاۋ ورگاندارى اكادەمياسى ءۇشىن ءبىلىم بەرۋ باعدارلامالارىن ازىرلەيدى. قازىرگى الەمدەگى وسىنداي قاۋىپتەردىڭ ءبىرى – كيبەرقىلمىس.
– قۇقىق قورعاۋ ورگاندارى وكىلدەرىنىڭ زاماناۋي قاۋىپ-قاتەرلەرگە دايىن بولماۋى تسيفرلىق سالانى كريميناليزاتسيالاۋعا اكەلۋى مۇمكىن. بۇل قاۋىپ-قاتەرلەرگە قارسى تۇرۋ ءۇشىن قۇقىق قورعاۋ ورگاندارى تسيفرلىق تەحنولوگيالار سالاسىندا جەتكىلىكتى بىلىمگە يە بولۋى كەرەك. قول قويىلعان مەموراندۋم كريپتوۆاليۋتالاردىڭ كوپتەگەن قۇقىق قورعاۋ اسپەكتىسىن شەشۋ ءۇشىن قاجەتتى ءبىلىم مەن داعدىلاردى جيناقتاۋ ءۇشىن بەرىك نەگىز بولاتىنىنا, سونداي-اق كيبەرقىلمىستاردى اشۋ مەن تەرگەۋ ەرەكشەلىكتەرىن وقىتۋ بويىنشا جاڭا مۇمكىندىكتەر اشاتىنىنا سەنىمدىمىن, – دەيدى اكادەميا رەكتورى مارات سەكسەمباەۆ.
كريپتويندۋسترياداعى حالىقارالىق زەرتتەۋلەردىڭ ناتيجەلەرى بويىنشا كيبەرقىلمىس كولەمى 2022 جىلى تاريحي تۇرعىدان ەڭ جوعارى دەڭگەيگە جەتتى. اتالعان جاھاندىق پروبلەمانى شەشۋ ءۇشىن نارىقتىڭ ءىرى ويىنشىلارىن تارتۋ پروتسەسى باستالادى, سونداي-اق قۇقىق قورعاۋ ورگاندارىنىڭ وكىلدەرىن كيبەرقىلمىستارمەن كۇرەستە بلوكچەيننىڭ جاڭا قۇرالدارىنا ۇيرەتۋگە باسا نازار اۋدارىلادى.
– Binance بۇكىل الەم بويىنشا 750-دەن استام قىزمەتكەرى بار سالاداعى جەتەكشى جاھاندىق FATF قاۋىپسىزدىك جانە سايكەستىك كومانداسىنا يە. ءبىز اقشانى جىلىستاتۋعا قارسى كۇرەس, كۇدىكتى ارەكەتتەردى قاداعالاۋ اياسىندا مەملەكەتتىك قۇقىق قورعاۋ ورگاندارىمەن جانە جەكە ۇيىمدارمەن ىنتىماقتاسامىز. سەرىكتەستەرىمىز ۇسىناتىن باستاپقى ەسەپتىك جازبالارعا سۇيەنە وتىرىپ, جەلى ىشىندەگى كۇدىكتى ترانزاكتسيالاردى انىقتاۋعا مۇمكىندىك بەرەتىن تەرگەۋلەر جۇرگىزەمىز. اقشانى جىلىستاتۋعا قارسى كۇرەس (AML) بويىنشا ىشكى انىقتاۋ جانە تالداۋ قۇرالدارىن ۇنەمى جاڭارتىپ, كەڭەيتىپ وتىرامىز, – دەيدى Binance Kazakhstan باس مەنەدجەرى جاسلان ماديەۆ.
ءبىلىم بەرۋ باعدارلاماسى ۇلتتىق بانكتىڭ تولەم جانە قارجى تەحنولوگيالارىن دامىتۋ ورتالىعى, Astana Hub حالىقارالىق تەحنوپاركى قولداۋىمەن, Binance ءبىلىم بەرۋ ماتەريالدارى نەگىزىندە اكادەميا بازاسىندا ىسكە اسىرىلادى.
– ءبىز ايماقتاعى ەڭ ءىرى تەحنوپارك رەتىندە قۇقىق قورعاۋ ورگاندارى مەن تەحنولوگيالىق ەكوجۇيەنىڭ, سونىڭ ىشىندە نارىقتىڭ ەڭ ءىرى ويىنشىلارىمەن ىنتىماقتاستىق ورناتقانىمىزعا قۋانىشتىمىز. كريپتوينتسيدەنتتەردى تەرگەۋ ۇدەرىستەرىنىڭ دامۋى كريپتويندۋستريانىڭ جانە تۇتاستاي العاندا بلوكچەين تەحنولوگياسىنىڭ دامۋىمەن قاتار ءجۇرۋى كەرەك. قازاقستان وڭىردە ۇزدىك تاجىريبە جاساي الادى دەپ سەنەمىن, وعان ءبىز بارلىق قاجەتتى قولداۋدى كورسەتۋگە دايىنبىز, – دەيدى Astana Hub حالىقارالىق تەحنوپاركىنىڭ باس ديرەكتورى ماعجان ماديەۆ.