بەلارۋس استاناسى مينسكىدە ءوتىپ جاتقان فۋتبولدان جاسوسپىرىمدەر اراسىنداعى «دامۋ كۋبوگى-2023» حالىقارالىق تۋرنيرىندە قازاقستان قۇراماسى قاتارىنان ەكىنشى ماتچتا جەڭىسكە جەتتى.
جەرلەستەرىمىز ءبىرىنشى تۋردا رەسەي فۋتبولشىلارىنان 1:0 ەسەبىمەن باسىم تۇسكەن بولسا, بۇل جولى وزبەكستان قۇراماسىن ءىرى ەسەپپەن تىزە بۇكتىردى – 3:0. ماتچتىڭ ونىنشى مينۋتىندا قازاقستان قۇراماسىنىڭ جارتىلاي قورعاۋشىسى ءىلياس ءابىل ەسەپ اشسا, اراعا ون مينۋت سالىپ شابۋىلشى تامەرلان اعىمانوۆ ەسەپتى ەسەلەي ءتۇستى. ال كەزدەسۋدىڭ سوڭعى مينۋتىندا ۆيكتور لاكەەۆ كوزگە ءتۇسىپ, ماتچتىڭ نۇكتەسىن قويدى.
قازاقستان قۇراماسى ساپىنان ءىلياس ءابىل كەزدەسۋدىڭ ۇزدىك ويىنشىسى دەپ تانىلدى. الەكساندر كۋزنەتسوۆ شاكىرتتەرى توپتىق كەزەڭدەگى سوڭعى تۋر ويىنىن بۇگىن بەلارۋس قۇراماسىمەن وتكىزەدى.