سوڭعى ءۇش جىلدا ارنايى حقكو قىزمەتىندە جەمقورلىق سيپاتى بار 18 قىلمىستىق ءىس تەرگەلدى, دەپ حابارلايدى Egemen.kz ANTIKOR ءباسپاسوز قىزمەتىنە سىلتەمە جاساپ.
2020 جىلدان باستاپ سىبايلاس جەمقورلىققا قارسى قىزمەت جۇرگىزۋشى كۋالىكتەرىن زاڭسىز بەرۋگە جانە شەتەلدىك اۆتوموبيلدەردى ەسەپكە قويۋعا بايلانىستى 18 قىلمىستىق ءىستى تەرگەدى.
ماسەلەن, جۇرگىزۋشى كۋالىگىن بەرۋ كەزىندە 60 مىڭعا جۋىق زاڭسىز ءىس-ارەكەت جاسالدى, ال زاڭسىز اكەلىنگەن 2 مىڭنان استام اۆتوكولىك ەسەپكە قويىلدى.
قىلمىستاردىڭ باسىم بولىگى استانا, شىمكەنت قالالارىندا, اقمولا, قوستاناي جانە جامبىل وبلىستارىندا جاسالعانى انىقتالدى. ناتيجەسىندە, 13 ادام قىلمىستىق جاۋاپكەرشىلىككە تارتىلدى.«ەلوردادا كوزدەلگەن الىمدار مەن تولەمدەردى تولەمەي, شەتەلدەن اكەلىنگەن اۆتوكولىكتەردى تىركەۋ ەسەبىنە زاڭسىز قويۋمەن اينالىساتىن ارنايى حقكو قىزمەتكەرلەرى مەن ازاماتتىق تۇلعالاردان تۇراتىن ۇيىمداسقان قىلمىستىق توپتىڭ قىزمەتى توقتاتىلدى. قىلمىستىق توپ ازاماتتاردى شەتەلدىك اۆتوكولىكتەردى ەسەپكە قويۋدىڭ زاڭدىلىعىنا قاتىستى الداۋ جولىمەن, ولاردىڭ اقشالارىن ۇرلاپ, 500-گە جۋىق كولىك قۇرالىن زاڭسىز تىركەۋدى جۇزەگە اسىردى. ءبىر كولىك قۇرالىن رەسىمدەۋ اۆتوكولىك جۇرگىزۋشىلەرىنە 400 مىڭنان 1,6 ملن تەڭگەگە دەيىن شىعىن كەلتىردى. اتالعان ادامداردىڭ قىلمىستىق ءىس-ارەكەتىنىڭ ناتيجەسىندە مەملەكەتكە تولەنبەگەن مەملەكەتتىك باجدار مەن الىمدار تۇرىندە شامامەن 1 ملرد.تەڭگە سوماسىنا زالال كەلتىرىلدى», دەلىنگەن ANTIKOR حابارلاماسىندا.
تەرگەۋ سوتىنىڭ سانكتسياسىمەن قىلمىستىق توپتىڭ 9 قاتىسۋشىسى, ونىڭ ىشىندە ەلوردالىق ارنايى حقكو باسشىسى قاماۋعا الىندى. قازىرگى ۋاقىتتا سوتقا دەيىنگى تەرگەۋ جۇرگىزىلىپ جاتىر.