قازاقستان قۇتقارۋشىلارى تۇركياداعى ءزىلزالادان زارداپ شەككەن ادامدارعا كومەك كورسەتىپ جاتىر, دەپ حابارلايدى Egemen.kz توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
تجم Telegram-ارناسىندا جاريالاگعان ۆيدەوعا قاراعاندا, قازاقستاننان ارنايى جۇمىلدىرىلعان قۇتقارۋشىلار تۇركيالىق ارىپتەستەرىمەن بىرگە قۇتقارۋ جۇمىستارىن جۇرگىزىپ جاتىر.
«تۇركياعا جەتكەن قازاقستاندىق قۇتقارۋشىلار كۇردەلىلىگى جوعارى نىسنادارعا بەكىتىلگەن ەدى. وتكەن تاۋلىكتە ءبىرىنشى توپ جەر سىلكىنىسى سالدارىنان وپىرىلىپ قۇلاعان 6 قاباتتى ءۇيدى زەرتتەدى. ىزدەستىرۋ جۇمىستارى كەزىندە كوز جۇمعان 3 ايەلدىڭ دەنەسى تابىلىپ, شىعارىلدى. قازىر جۇمىسشىلار ۇيىندىلەردى تازارتۋ, قۇرىلىس كونسترۋكتسيالارىن شىعارۋ جۇمىستارىن جۇرگىزىپ جاتىر. ەكىنشى توپ تولىعىمەن قيراعان 9 قاباتتى ەكى ۇيگە جۇمىلدىرىلدى, ولار جەرگىلىكتى قۇتقارۋشىلارمەن بىرگە زارداپ شەككەن ايەلدى شىعارىپ الدى. ءدال سول نىساندا قۇتقارۋشىلار 1 ادامنىڭ دەنەسىن تاپتى», دەلىنگەن حابارلامادا.
قيراندى ورنىندا كۇردەلى جاعداي قالىپتاسقانىن اتاپ ءوتۋ كەرەك. قۇتقارۋشىلار ۇيىندىلەر اراسىنان ادامداردى جىلدام ىزدەستىرۋ ءۇشىن بارلىق قاجەتتى شارالاردى قابىلداپ جاتقانى ايتىلعان. قۇتقارۋ-ىزدەستىرۋ جۇمىستارى تاۋلىك بويى جۇرگىزىلىپ جاتىر.
گۇلشاحرا سانسىزباي