حالىقارالىق كونكيمەن جۇگىرۋشىلەر وداعى مانەرلەپ سىرعاناۋدان 2022 جىلدى قورىتىندىلاپ, جىلدىڭ ۇزدىك سپورتشىلارىن ماراپاتتادى. شۆەيتساريانىڭ تسيۋريح قالاسىندا وتكەن «ISU Skating Awards» ءىس-شاراسىندا بىلتىرعى جارىس جىلىندا ەڭ جوعارى ناتيجەگە قول جەتكىزگەن 8 سپورتشى ءار اتالىم بويىنشا ۇزدىك دەپ تانىلدى.
وتكەن جىلدىڭ جەلتوقسان ايىندا ۇيىمداستىرۋشىلار 2021/2022 جىلعى ماۋسىمنىڭ گران-پري سەرياسىندا ۇزدىك شىققان جانە 2022 جىلعى قويىلىمدار اراسىندا ءتاۋىر ناتيجەمەن كوزگە تۇسكەن 6 اتالىم بويىنشا ۇمىتكەرلەردىڭ ءتىزىمىن جاريالاپ, 2022 جىلدىڭ 31 جەلتوقسانىنا دەيىن الدىمەن جانكۇيەرلەر اراسىندا ونلاين ساۋالداما جۇرگىزدى. سپورت جانكۇيەرلەرى وسى ۋاقىت ارالىعىندا مانەرلەپ سىرعاناۋشى (جۇپقا), جاتتىقتىرۋشى, حورەوگراف, كوستيۋم ديزاينەرىنە ونلاين داۋىس بەرۋ ارقىلى جىل ۇزدىكتەرىن انىقتاپ بەردى.
2023 جىلدىڭ قاڭتار ايىندا داۋىس بەرۋ ناتيجەلەرى جاريالانىپ, جۇلدەدەن ۇمىتكەر سپورتشىلاردىڭ ءتىزىمى بەلگىلى بولدى. ءسويتىپ ءارى قاراي «ISU Skating Awards» سىيلىعىنىڭ جەڭىمپازدارىن 1984 جىلعى وليمپيادا چەمپيونى, ءتورت دۇركىن الەم چەمپيونى ۇلىبريتانيالىق كريستوفەر دين, جەكەلەي سىندا ەكى دۇركىن الەم چەمپيونى جاپونيالىق ميكي اندو, بەس دۇركىن ەۋروپا چەمپيونى, جەكەلەي سىندا ءتورت مارتە الەم چەمپيوناتىنىڭ جۇلدەگەرى اتانعان سۋريا بونالي, الەم چەمپيونى تودد ەلدريدج (اقش), جەكەلەي سىندا ەۋروپا چەمپيوناتىنىڭ ەكى دۇركىن جۇلدەگەرى كيرا كورپي (فينليانديا) جانە 2018 جىلعى وليمپيادا چەمپيونى جانە ەكى دۇركىن الەم چەمپيونى كانادالىق ەريك رەدفورد سەكىلدى مانەرلەپ سىرعاناۋدىڭ داڭقتى وكىلدەرى تاڭداپ الدى.
قازىلار القاسىنىڭ شەشىمى بويىنشا, وليمپيا ويىندارىنىڭ جەڭىمپازى مەن جۇلدەگەرى, الەم بىرىنشىلىگىنىڭ ءۇش دۇركىن چەمپيونى 23 جاستاعى نەيتان چەن (اقش) «ەڭ باعالى مانەرلەپ سىرعاناۋشى» اتالىمىندا ۇزدىك شىقسا, تاعى ءبىر اقش وكىلدەرى مەديسون چوك پەن ەۆان بەيتس 2021/2022 جىلعى ماۋسىمداعى ەرىكتى ءبيى ءۇشىن «ۇزدىك كوستيۋم» اتالىمىندا توپ جاردى. ديزاينەرى – مەديسون چوك.
«ەڭ تارتىمدى باعدارلاماسىندا» گابريەلا پاپاداكيس پەن گيوم سيزەرون (فرانتسيا) جەڭىمپاز اتاندى. سونىمەن قاتار اقش سپورتشىسى يزابو لەۆيتو «جاڭا ەسىم», شە-لينن بۋرن «ەڭ ۇزدىك حورەوگراف», پاتريس لوزون «ەڭ ۇزدىك جاتتىقتىرۋشى», ەكى دۇركىن وليمپيادا چەمپيونى, ءتورت دۇركىن الەم بىرىنشىلىگىنىڭ جانە التى دۇركىن ەۋروپا چەمپيونى كاتارينا ۆيتت «مانەرلەپ سىرعاناۋ اڭىزى» اتالىمدارىندا دارا شىقتى. سونداي-اق «ەرەكشە جەتىستىكتەرى ءۇشىن» اتالىمى مانەرلەپ سىرعاناۋ سپورتىنىڭ تاريحىندا العاش رەت تورتتىك اكسەل باعدارلاماسىن ورىنداعان يليا مالينينگە بۇيىردى.