بۇگىن وتكەن ۇكىمەتتىڭ كەزەكتى وتىرىسىندا پرەمەر-مينيستر ءاليحان سمايىلوۆ حالىقتىڭ الەۋمەتتىك وسال توپتارىن تۇرعىن ۇيمەن قامتاماسىز ەتۋ ماسەلەسىن كوتەردى, دەپ حابارلايدى Egemen.kz.
ۇكىمەت باسشىسى حالىقتىڭ الەۋمەتتىك وسال توپتارىن تۇرعىن ۇيمەن قامتاماسىز ەتۋ ماسەلەلەرىن شەشۋ ماقساتىندا اتقارىلىپ جاتقان جۇمىستاردىڭ كەم تۇستارىن اتادى.
«كەزەكتە تۇرعاندارعا تۇرعىن ءۇيدى ساتۋ كەزىندە ساپاسىز جوسپارلاۋدى مىسالعا الۋعا بولادى. قازىردىڭ وزىندە سالىنعان تۇرعىن ءۇيدى الا الماي جاتقان ازاماتتاردان كوپتەگەن شاعىمدار كەلىپ تۇسەدى, سەبەبى «وتباسى بانكىندە» جەڭىلدەتىلگەن نەسيەلەۋگە قاجەتتى قاراجات بولماعان. مۇنداي جۇمىس تاسىلىنە جول بەرمەۋ قاجەت», دەدى ءاليحان سمايىلوۆ.
جالپى, پرەمەر-مينيستر اتاپ وتكەندەي, قازاقستان بويىنشا تۇرعىن ءۇيدى پايدالانۋعا بەرۋ جوسپارىنا قول جەتكىزىلدى, الايدا 2021 جىلمەن سالىستىرعاندا ءوسۋ قارقىنى ايتارلىقتاي تومەندەپ بارادى. ونىڭ ايتۋىنشا, بيىل 15,3 ملن شارشى مەتر تۇرعىن ءۇي پايدالانۋعا بەرىلەدى, الايدا بۇل 2022 جىلعى كورسەتكىشتەن الدەقايدا تومەن.
«نەگىزگى ماسەلە - قاجەتتى ينفراقۇرىلىمنىڭ بولماۋى. ماسەلەن, ەلوردادا ينفراقۇرىلىم مەن ەنەرگورەسۋرستاردىڭ تاپشىلىعىنا بايلانىستى الداعى جىلدارى جاڭا تۇرعىن ءۇيدى ىسكە قوسۋدىڭ تومەنگى كولەمى جوسپارلانعان. مەملەكەت باسشىسى ەلوردانى ودان ءارى دامىتۋ ماسەلەلەرى جونىندەگى كەڭەستە اتاپ وتكەندەي, مۇنداي پروبلەمالاردى شەشۋ ءۇشىن ينجەنەرلىك ينفراقۇرىلىمدى جۇيەلى جوسپارلاۋ جانە كەشەندى دامىتۋ قاجەت», دەپ قوستى ۇكىمەت باسشىسى.