ەلوردادا «Respublica» پارتياسىنىڭ كەزەكتەن تىس العاشقى سەزى ءوتتى. ساياسي ساحناعا ەندى قادام باسقان جاس پارتيا تىڭ جوسپارلارىن ۇسىنىپ, تۇرعىنداردىڭ ىستىق ىقىلاسىنا بولەنۋگە نيەتتى. بوس سوزدەن گورى ناقتى ىسپەن كوزگە ءتۇسۋدى كوزدەگەن پارتيا مۇشەلەرى قۇرىلتاي كەزىندە ءماجىلىس دەپۋتاتتىعىنا ۇمىتكەرلەردىڭ ءتىزىمىن بەكىتتى. وسىلايشا, پارتيا اتىنان سايلاۋ دوداسىنا 29 كانديدات تۇسپەك.
«Respublica» – مەملەكەت قىزمەتىنىڭ ءتۇرلى سالاسىن قالپىنا كەلتىرۋگە ۇمتىلاتىن بەلسەندى ازاماتتاردى بىرىكتىرگەن جاڭا پارتيا. وعان ەلىمىزدىڭ كاسىپكەرلەرى مەن قوعام قايراتكەرلەرى تارتىلعان. باستى ماقساتى – ءاربىر قازاقستان ازاماتى ساياسي, الەۋمەتتىك جانە ەكونوميكالىق وزگەرىستەرگە ءوزىنىڭ اتسالىسىپ جاتقانىن سەزىنۋى ءۇشىن ەل ساياساتىنا ىقپال ەتۋ تەتىكتەرىن جاساۋ. ۇرانى – «جاڭا ادامدار – جاڭا قادامدار».
ەستەرىڭىزدە بولسا, پارتيانىڭ قۇرىلعانى تۋرالى 2022 جىلدىڭ تامىزىندا جاريالاندى. 2023 جىلدىڭ 18 قاڭتارىندا «Respublica» پارتياسى تىركەۋ قۇجاتتارىن قابىلدادى. پارتيانىڭ 1 توراعاسى جانە 7 تەڭ توراعاسى بار. جاڭا پارتيا بولعاندىقتان, ساياسي قۇرىلىم جايلى از-كەم قىسقاشا اقپارات وسى.
قۇرىلتايدا «Respublica» پارتياسىنىڭ تەڭ توراعالارى, كاسىپكەرلەر سىرىمبەك تاۋ مەن رۋسلان بەردەنوۆ پارتيالىق تىزىمدەر جانە ءبىر مانداتتى اۋماقتىق سايلاۋ وكرۋگتەرى بويىنشا ۇسىنىلعان سەگىزىنشى مارتە سايلانعالى وتىرعان پارلامەنت ءماجىلىسىنىڭ دەپۋتاتتىعىنا كانديداتتاردىڭ ءتىزىمىن تانىستىردى.
– تىزىمگە ءتۇرلى سالانىڭ كاسىپكەرلەرى, بيزنەس-قاۋىمداستىقتاردىڭ, جوعارى وقۋ ورىندارىنىڭ جەتەكشىلەرى, ساراپشىلار مەن ماماندار, ۇيىمداستىرۋشىلار مەن يدەولوگتەر ەندى. ولاردىڭ ارقايسىسى – تاجىريبەلى, ۇزدىك باسقارۋشى, ناعىز كوشباسشى ازاماتتار. ارقايسىسىنىڭ جەكە تابىس تاريحى بار. اركىم مىڭداعان جۇمىس ورنىن اشادى, تەحنولوگيالاردى, بيزنەس سالاسىنا ەڭ زاماناۋي تاسىلدەردى ەنگىزەدى, وزىق تاجىريبەنى قولدانادى, ءوز ايماقتارىندا ازاماتتاردىڭ ءومىرىن جاقسارتادى. ولاردىڭ ءبىلىمى, تاجىريبەسى, كاسىبي قىزمەت اياسى ءارتۇرلى بولۋى مۇمكىن, بىراق ولاردىڭ ءبارى ءبىر ورتاق شارۋاعا جۇمىلۋعا دايىن. اتاپ ايتساق, ەلىمىزگە وڭ وزگەرىستەردى اكەلۋگە, ەسكى قازاقستان يدەيالارىنان قۇتىلۋعا ۇمتىلىپ وتىر, – دەدى سىرىمبەك تاۋ.
پارتيا توراعاسى ايداربەك حودجانازاروۆ «Respublica» پارتياسىنىڭ ميسسياسىنا توقتالدى.
ء«بىز ءۇشىن بۇل جەڭىس نەلىكتەن ماڭىزدى؟ قازاقستاندىقتار ەلدە حالىق قولدايتىن مىقتى, سالاماتتى بالاما بار ەكەنىن ءتۇسىنۋى كەرەك. قازىرگى جۇيەنىڭ بالاما نۇسقاسىن كورگىسى كەلەتىندەردىڭ سانى ارتىپ كەلەدى, سوندىقتان ءاربىر قازاقستاندىقتىڭ مەملەكەت پەن قوعام ومىرىندەگى ءرولى مەن ورنىنا دەگەن كوزقاراسىن وزگەرتۋ ءۇشىن جەڭىس ماڭىزدى. جاڭا قازاقستاننىڭ بارلىق ازاماتتارى ساياسي شەشىمدەر قابىلداۋعا ىقپال ەتە الۋى كەرەك», دەدى پارتيا توراعاسى.
جيىندا سايلاۋالدى باعدارلامانىڭ جوباسى تانىستىرىلدى. پارتيانىڭ تەڭ توراعالارىنىڭ ءبىرى قۋانىش شونبايدىڭ ايتۋىنشا, باعدارلامانى ازىرلەۋ بارىسىندا حالىقتى مازالاعان نەگىزگى ماسەلەلەر نازارعا الىنعان. «ەل ازاماتتارىنىڭ مۇددەسى ءۇشىن زاماناۋي جانە كۇشتى مەملەكەتتى قالاي قۇرۋعا بولادى؟ بۇل باعدارلاما قازاقستاندىقتاردىڭ قۇقىعى مەن مۇددەسىن قورعاۋ جولىنا باستاماشى بولىپ, پارلامەنت ماجىلىسىندە دە, وبلىستىق جانە قالالىق ماسليحاتتارداعى جۇمىسىمىزعا دا كوزقاراسىمىزدى كورسەتەدى», دەدى ول.
پارتيانىڭ تەڭ توراعاسى دينارا شۇكىجانوۆا بارلىق رەفورما تەز ارادا ايتارلىقتاي ناتيجە كورسەتۋى كەرەك ەكەنىن اتاپ ءوتتى. ول ءۇشىن پارتيا تاراپىنان بار كۇش جۇمسالماق.
«ادامدار بارلىق باستاما جاقسى جاققا وزگەرەتىنىن سەزىنۋى كەرەك. رەفورمالاردىڭ بارشا قازاقستاندىقتىڭ مۇددەسى ءۇشىن جۇرگىزىلۋى وتە ماڭىزدى. سوعان ساي ادامدار ءوز پارتيالارىنىڭ قاجەتتىلىكتەرىنە ساي ارەكەت ەتەتىنىنە سەنىمدى بولۋى قاجەت», دەدى د.شۇكىجانوۆا.
پارتيانىڭ تەڭ توراعاسى ماكسيم بارىشەۆ كاسىپكەرلىك سالاسى ەل ەكونوميكاسىنىڭ شيكىزاتقا تاۋەلدىلىگىن ازايتۋعا كومەكتەسەتىن باعىت ەكەنىن اتاپ ءوتتى.
ء«بىز ەكونوميكا سالالارىنا ارنالعان نورماتيۆتىك زاڭنامانى ۇتىمدىلىق, جاڭارتۋ جانە تيىمدىلىك باعىتىندا قايتا قاراۋدى جوسپارلاپ وتىرمىز. زاڭدار بيزنەستىڭ دامۋىنا كەدەرگى بولماي, ونىڭ ءوسۋىن ىنتالاندىرۋى قاجەت. سالىق جۇكتەمەسىن ازايتۋ باعىتىندا سالىق زاڭناماسىن قايتا قاراعان ءجون. سالىق سالۋ قاراپايىم, تۇسىنىكتى جانە وزگەرىسسىز بولۋى كەرەك», دەدى ول.
سەزد سوڭىندا ايداربەك حودجانازاروۆ «Respublica» پارتياسى جوعارى تەحنولوگيالىق ۇلتتىق ەكوجۇيەنى قۇرۋعا قابىلەتتى ساياسي كۇش ەكەنىن ايتتى.
«الداعى جىلداردا وتكەن قاتەلىكتەردىڭ بارلىعىن تۇزەيتىن ءبىز – ناعىز ءىستىڭ ادامدارى, كاسىپكەرلەر مەن پاتريوتتار. بۇگىن ءبىز ايتىپ وتىرعان باستى ماسەلە – ەلدى وزگەرتۋ ءۇشىن بيزنەستە تابىستى بولعان تاسىلدەردى ساياسات پەن مەملەكەتتىك باسقارۋدا قولدانۋىمىز كەرەك. ءبىز جاس, ءورشىل, جىگەرلىمىز. بىزدە وتە ايقىن ۇستانىم بار. پارلامەنتكە ەنگەن سوڭ, سوعان مىندەتتى تۇردە قول جەتكىزەمىز, ەل مەن حالىقتىڭ يگىلىگىنە قىزمەت ەتەتىن زاڭداردى قابىلدايمىز», دەدى پارتيا توراعاسى.