وتكەن جىلى شىمكەنت قالاسىندا بالالارعا جىنىستىق سيپاتتاعى قىلمىس جاساعان 4 ادامدى حيميالىق جولمەن كاستراتسيالاۋعا قاتىستى سوت ۇكىمى شىققان. بۇل تۋرالى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ توراعاسى ءابساتتار شاحيدينوۆ 2022 جىلعى جۇمىستاردى قورىتىندىلاۋعا ارنالعان بريفينگتە مالىمدەدى.
اسا اۋىر قىلمىستاردى قارايتىن سوت ورگانى بىلتىر جاسوسپىرىمدەر مەن كامەلەت جاسقا تولماعاندارعا قارسى جىنىستىق ارەكەتتەرگە بارعان 20 ءىس بويىنشا ۇكىم كەسكەن. ەڭ وكىنىشتىسى, وڭىردە سەكسۋالدىق جاعدايداعى قىلمىستاردىڭ سانى جىلدان-جىلعا ءوسىپ بارادى.
سوت توراعاسىنىڭ ايتۋىنشا, مۇنىڭ بارىنە كىنالى قوعامداعى ازعىندىق. ال ادامداردى اسىرەسە, جاستاردىڭ تاربيەسىن بۇزىپ جاتقان كادىمگى قالتا تەلەفونى. اتا-اناسىنىڭ باقىلاۋىنسىز قالعان بالا كۇندىز-ءتۇنى تەلەفوننان شىقپاي, ءتۇرلى الەۋمەتتىك جەلىگە كىرىپ, قىلمىسكەرلەردىڭ ارباۋىنا ءتۇسىپ قالادى. كوبىنەسە الەۋمەتتىك جەلىدەگى جاسىرىن تانىسۋ بۇرىشتارى ارقىلى بالالار ارام پيعىلدى جانداردىڭ ارباۋىنا وزدەرى بايقاماي ىلىگىپ قالىپ جاتادى. سوندىقتان سوت توراعاسى اتا-انالارعا بالا تاربيەسىندە قىراعى بولۋعا, بارىنشا تەلەفونداعى ۆيرتۋالدى الەمنەن الشاقتاتۋعا شاقىرىپ وتىر.
سونىمەن بىرگە وتكەن جىلى كىسى ءولتىرۋ دەرەگى بويىنشا 25 قىلمىستىق ءىس قارالعان. مۇنداي ىستەر جالپى سوتقا جولدانعان ىستەردىڭ 36 پايىزىن قۇرايدى. سونداي-اق سوت ۇكىمىمەن مەملەكەت اقشاسىن جىمقىرعان مادەنيەت باسقارماسىنىڭ بىرنەشە قىزمەتكەرىنە جازا تاعايىندالدى. سىبايلاس جەمقورلىققا بايلانىستى بۇل قىلمىس حالىق اراسىندا ۇلكەن قوعامدىق رەزونانس تۋدىرعان بولاتىن.
سپيكەردىڭ مالىمدەۋىنشە, جىلدان-جىلعا سوتقا كەلەتىن ىستەر سانى كوبەيىپ بارادى. ماسەلەن, بىلتىر 70 قىلمىستىق ءىس قارالسا, 2021 جىلى ونىڭ سانى 67 بولعان. سۋديالاردىڭ جەتىسپەۋىنەن ولارعا جۇكتەلەتىن مىندەت تە اۋىرلاي تۇسكەن. ايتالىق, زاڭ بويىنشا ءبىر سۋديانىڭ جۇكتەمەسى ايىنا 1,8 ءىس بولسا, قازىر ول 3,5-كە ارتقان. وتكەن جىلى ءار سۋدياعا ايىنا 2,5 ىستەن كەلگەن ەكەن. ويتكەنى جوعارىدا ايتىلعانداي, قازىرگى تاڭدا قىلمىستىق ىستەر جونىندەگى مامانداندىرىلعان اۋدانارالىق سوتىندا بار-جوعى ەكى-اق سۋديا بار. بۇل جوعارى لاۋازىمدى قىزمەتكە ءۇشىنشى ماماندى تاعايىنداۋ ءۇشىن پرەزيدەنت جارلىق شىعارادى. ال مەملەكەت باسشىسىنا ۇسىنىستى جوعارى سوت كەڭەسى بەرەدى. بريفينگكە ءمالىم بولعانداي بۇل ماسەلە ءالى قارالۋ ۇستىندە ەكەن.
سونداي-اق سۋديالار القا بيلەرگە قاتىستى دا ءسوز قوزعادى. ماسەلەن, بۇرىن اسا اۋىر قىلمىستىق ىستەر 24 ساناتقا بولىنەتىن. قازىر ونىڭ سانى 33-كە كوبەيگەن. وسى رەتتە القا بيلەردىڭ دە سانىن ارتتىرۋ قاجەتتىگى تۋىنداپ وتىر. سونىمەن بىرگە سۋديالار القا بيلەردىڭ زاڭىنان حابارى بار, قوعامدىق جۇمىستا تاجىريبەسى مول, جاۋاپكەرشىلىكتى سەزىنەتىن ازاماتتار بولعانى دۇرىس جانە ونىڭ قۇرامىندا ايەلدەر مەن ەركەكتەردىڭ اراقاتىناسى تەڭ بولسا دەگەن وي-ۇسىنىستارىن ءبىلدىردى.
شىمكەنت