قۇرلىقتىق حوككەي ليگاسىنداعى (قحل) كەزەكتى تۋر ويىنىن استانانىڭ «بارىسى» ماسكەۋدە ايگىلى تسسكا كلۋبىنا قارسى وتكىزىپ, جەڭىسكە جەتتى.
تسسكا-نىڭ جارىس كەستەسىندەگى جاعدايى جەرلەستەرىمىزگە قاراعاندا الدەقايدا جاقسى. 80 ۇپاي جيعان رەسەيلىكتەر باتىس كونفەرەنتسياسىندا ءۇشىنشى ورىندى يەلەنىپ تۇر. ال قورجىنىندا نەبارى 57 ۇپايى بار «بارىس» شىعىس كونفەرەنتسياسىندا ەڭ سوڭعى 11-ورىندى قاناعات تۇتۋدا. سونىمەن قاتار اسكەريلەر كلۋبى بىلتىرعى ماۋسىمدا گاگارين كۋبوگىن ولجالاعانىن دا ايتا كەتكەن ابزال. دەسەك تە بۇل جولى ءبىزدىڭ جىگىتتەر جانكەشتىلىكتىڭ شىنايى ۇلگىسىن كورسەتتى. باسەكە بارىسىندا ايدىن يەلەرى ءۇش رەت العا شىققانىنا قاراماستان استانالىقتار تارازى باسىن تەڭەستىرە الدى. قورىتىندى ەسەپ – 5:5. جەڭىمپاز انىقتالماعان سوڭ ويىن وۆەرتايمعا ۇلاستى. قوسىمشا ۋاقىت باستالعان بەتتە وسى ويىندا بەس ۇپاي جيناعان ن.ميحايليس مەرگەندىك تانىتىپ, «بارىسقا» جەڭىس سىيلادى. قورىتىندى ەسەپ – 5:6.
ەندى ەلوردالىق كوماندا ءوز مۇز ايدىنىندا ەكى ماڭىزدى كەزدەسۋ وتكىزەدى. 13 اقپاندا سانكت-پەتەربۋرگتىڭ سكا-سىمەن سايىسقا تۇسسە, 15 اقپاندا مينسكىنىڭ «ديناموسىن» قابىلدايدى.