قازاقستاننىڭ ەرلەر قۇراماسى دەۆيس كۋبوگىنىڭ ىرىكتەۋ تۋرنيرىنە قاتىسۋ ءۇشىن ءچيليدىڭ لا-سەرەنا قالاسىنا ساپار شەگىپ, جەرگىلىكتى تەننيسشىلەرمەن كۇش سىناسقان ەدى.
العاشقى كۇننىڭ ناتيجەسىندە تارازى باسى تەڭسەلىپ تۇردى. تۇساۋكەسەر كەزدەسۋدە تيموفەي سكاتوۆ كريستيان گاريندى ۇتسا, الەكساندر بۋبليك نيكولاس يارريگە ەسە جىبەردى. كەلەسى كۇن ءبىز ءۇشىن كوڭىلسىزدەۋ باستالدى. جۇپتىق سايىستا اندرەي گولۋبەۆ پەن الەكساندر نەدوۆەسوۆ الەحاندرو تابيلو مەن توماس بارريوسكە 4:6, 5:7 ەسەبىمەن جول بەردى. دەسەك تە اتالعان جارىستىڭ فينالدىق بولىگىنە جولداما الامىز دەگەن ءۇمىتىمىز ءالى دە ۇزىلگەن جوق ەدى. ويتكەنى ءتورتىنشى كەزدەسۋدە الەمدىك رەيتينگتە 50-ورىندا تۇرعان بۋبليك اتر تىزىمىندە 102-ساتىعا جايعاسقان گارينمەن شەبەرلىك بايقاستى. بۇل ماتچتا الەكساندردىڭ مەرەيى ۇستەم بولاتىنىنا ەشكىمنىڭ كۇمانى بولمادى. بىراق شەشۋشى تۇستا جەرلەسىمىز بىلگەنىنەن جاڭىلدى. ءۇش سەتتىك سايىس 4:6, 6:3, 3:6 ەسەبىمەن چيليلىك ويىنشىنىڭ پايداسىنا شەشىلدى. ءسويتىپ, قازاقستان تەننيسشىلەرى ءۇشىن بۇل جارىس اياقتالدى.