قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قانات تۋمىش تۇركى مەملەكەتتەرى ۇيىمىنا (تمۇ) مۇشە جانە باقىلاۋشى مەملەكەتتەردىڭ – ازەربايجان, قىرعىزستان, وزبەكستان, تۇركيا, ماجارستان مەن تۇرىكمەنستاننىڭ قازاقستانداعى ەلشىلەرىمەن كەزدەستى, دەپ حابارلايدى Egemen.kz.
تاراپتار 2022 جىلعى 11 قاراشادا سامارقاند قالاسىندا وتكەن 9-شى ءسامميتىنىڭ قورىتىندىسى بويىنشا تمۇ مەملەكەت باسشىلارىنىڭ بەرگەن تاپسىرمالارىنىڭ ورىندالۋ بارىسىن, سونداي-اق تۇركىستان قالاسىندا تمۇ 10-شى مەرەيتويلىق ءسامميتىن وتكىزۋدىڭ ىقتيمال مەرزىمدەرىن تالقىلادى.
كەزدەسۋ بارىسىندا ق. تۋمىش قازاقستان باۋىرلاس تۇركى مەملەكەتتەرى ىنتىماقتاستىعىنىڭ كوپتەگەن الاڭدارىن قۇرۋدىڭ باس باستاماشىسى رەتىندە كوپجاقتى تۇركى ينتەگراتسياسىن دامىتۋعا ماڭىزدى ءمان بەرەتىنىن اتاپ ءوتتى.
كەزدەسۋگە قاتىسۋشىلار قازىرگى ۋاقىتتا تمۇ ەلدەرىنىڭ جيىنتىق نارىعى شامامەن 160 ملن ادامدى قۇرايتىنىن, ال قاتىسۋشى مەملەكەتتەردىڭ ورتاق جالپى ىشكى ءونىمى 1,3 ترلن اقش دوللاردان استام باعالاناتىنىن اتاپ ءوتتى, بۇل الەمدىك ەكونوميكانىڭ شامامەن 2,3% قۇرايدى.
وسى تۇرعىدا ۇيىم شەڭبەرىندەگى ءوزارا ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ وزەكتى ماسەلەلەرى مەن پەرسپەكتيۆالارى قاراستىرىلدى. تاراپتار ودان ءارى ىنتىماقتاستىقتىڭ قۋاتتى درايۆەرى بولا الاتىن كولىك-ترانزيت سالاسىنىڭ ەرەكشە ماڭىزدىلىعىن اتاپ ءوتتى.
كەزدەسۋ سوڭىندا قاتىسۋشىلار تمۇ شەڭبەرىندەگى بايلانىستاردى جان-جاقتى نىعايتۋ ماسەلەسى قاتىسۋشى ەلدەردىڭ ۇزاق مەرزىمدى سىرتقى ساياسي مۇددەلەرىنە جاۋاپ بەرەتىنىن اتاپ ءوتتى جانە وسى كەزدەسۋ فورماتىنداعى تىعىز ىنتىماقتاستىقتى جالعاستىرۋعا دايىن ەكەندىگىن راستادى.